من منكن تزوجت في سن الثلاثين أو أكبر/سطري شيئاً من أمل/تعدى الحد المسموح له من الردود

يارب

السلام عليكم

تصدقون، انا سجلت بهالمنتدى عشان اشارك في هالموضوع الرائع،،، تعرفون ليش رائع، لانه صار واقع روتيني نعيشه ومب شي غير طبيعي فنفس الوقت (مثل ما يحسسونا بعض الناس.

انا عاد قصتي قصة،،، انعجب فيني شخص معاي في المكتب الي اشتغل فيه، انعجب فيني لدرجة اني صرت جزء مهم من حياته اليومية، يشاركني كل اموره الي مايشاركها غيري، بديت اخاف منه لانه اصغر مني بكم سنه (هو فاواخر عشريناته وانا فبداية ثلاثيناتي تقريبا)...اتعلقت فيه، ولما سالني عن عمري كذبت عليه اني فنفس عمره لانه شكليا انا ابين اصغر عنه.
المهم، مرت عشر شهور على هالحال وصار الي ماتوقعته، اتقدملي رسميا .....بكيت فقلبي...لاني كنت اعرف شو بتكون ردة فعله هو هله لو عرفو عمري،،،، وصار الي اتوقعته، ماقدرت اصارحه بعمري، خفت اخسره وهذا الي صار، يوم ما اهله جو عشان يخطبوني سالو اخوي (ابوي وامي متوفين فخواني هم الي اجتمعو معاهم مع عمي وعائلته)..سالو اخوي عن عمري وهني انتهى كل شي قبل ما يبدا...والحمدلله..

كلمت الشخص...ذكرته باني نفس الانسانه الي كانت جزء لا يتجزأ من حياته قبل كم يوم...وحسب ما هو قال لي كل المواصفات الي يدور عليها فيني....جمال واخلاق وعلم وعقل....وذكرته بالرسول الي اتزوج خديجه الي مب بس كانت اكبر عنه ب15 سنة...كانت متزوجه قبله اكثر من مرة.....بس....ما اقتنع بكل هالحجج...في البداية حاول يقنع نفسه وهله،،بس هله قالوله انه "بيظلم" نفسه لو اتزوجني....

تدرون....انا كنت طول حياتي انتظر الشخص الي ارتاحله نفس ما ارتحت الا لهالانسان ، حتى اهلي حبو هله وايد،،،بس ماتوقعنا الموضوع بينتهي بهالطريقة القاسية.

السبب الي خلاني اخبركم عن قصتي هو ان الي ما جاها نصيب في الثلاثينات ولا حتى اكبر...لا تخجل من عمرها ولا تحس عمرها اقل من الي اصغر منها ومتزوج،،،،الله الي خلقنا، هو الي قرر انه احنا نتزوج فعمر معين، الي مب عاجبه عمرنا ويقول كبرت وماتزوجت ولا يتشرط ويبى صغيره خلوه لربه.

انا متفائله، صحيح اني سمعت انه الشخص هذا بيتزوج هالصيف وبياخذ وحده عمرها 18 سنه،،، بس صدقوني عندي احساس انه ربي جهزلي شي اروع من توقعاتي...وبيصير قريب باذن الله.

اما انتو يا امهات المستقبل، وكل الي هني بما فيهم انا، لازم نتعلم درس من هذا كله،،،، لازم نزرع اخلاقيات الدين والشرع فعقول عيالنا،،،ان العمر حسب الشرع ماله اي صلة بالتفاهم والحب في الحياة الزوجية، هذي امور سطحية ...البنت في ديننا الرائع الجميل ما يختارونها لعمرها ، البنت يختاروها لدينها واخلاقها وتربيتها.

الله يوفق كل الي اتزوج فهالسن الرائع الناضج الجميل ،،،،والي ينتظر الزواج ، لا تياسين، ترى الي يصبر اكثر يلاقي اكثر،،،قد صبره بالضبط،،،الله ما يخلف وعده نفس البشر.

ادعولي....

الله يجزيك خير على كلماتك وربي يعوضك بالي يحطك في عينه ويسعدك ويرزقك الذرية الصالحة

الله كريم رحيم وربنا قادر على كل شي

يارب عوضنا واسعدنا وارزقنا اكثر مما نتوقع وافضل مما نتخيل انك وحدك القادر ياااااااااااارب