طريقه للرد على ملاقيف النفاس

حبيبتي ليش مكبره الموضوع
انا لما ولدت ما ظل احد ما اقترح اسم وانا وزوجي متفقين على اسم معين فمشيناه وبولدي الثاني نفس الشي
واول ما تولدين انتي بكريه طبيعي كل واحد يعطيج نصايح عادي جدا اذا بكى وقالو رضعيه يمكن جوعان ...وانتي توك مرضعته عادي قولي توني رضعته ..... وبعدين يا حبيبتي والله من المحبه لج وللي بحضنج ..... بولدي الاول كنت اقول ان شاء الله واسوي اللي براسي ...... بالثاني استخدمت طريقة ثانيه .... وهي اني اسال وادور النصيحه .... وافتح موضوع معاهم عادي كسالفه وبالخصوص ام زوجي والله يا حبيبتي ما اعز من الولد الا ولد الولد

تقبلي مروري ....

أنا والله ما أحب أرد على المواضيع بس بصراحة الموضوع استفزني بحكم التجربة

حبيبتي الحين لو اختك مقترحة عليك اسماء كنتي بتقولين لقافة ولا بتأخذين وتعطين معها

ترى اخت زوجك مثل اختك والولد اللي اختك خالته هي عمته ليش التفرقة في المعاملة

طبعا اعرف ان التسمية للأم اللي تعبت بس انا اقول مافيها شئ الاخذ والعطاء في الموضوع مو لقافة سوالف عاادية ولا انتي مجبورة تسمين اللي يبون بس عااد لا تتحسسين من كلمة وتدورين حل للرد

انا اقول من تجربة زوجة اخوي الكبير ما يسمي عيالها إلا اخواتها واحنا كل ما سألنا اخوي وش بتسمون قال لسه مافكرنا واذا اقترحنا اسماء قال نشوف

وبعدين نكتشف ان اخواتها اللي مسمين

اذا حملت اهلها يعرفون واحنا نعرف اذا شفنا بطنها واللي ببطنها ولد ولا بنت برضه اهلها يعرفون واحنا اذا ولدت عرفنا

بينما زوجة اخوي الصغير تشاورنا مثل ماتشاور اهلها والله اذكر بنتها الثانية واحنا عندها بالمستشفى كان اقتراح اسمين ومشي اخوي بالدور على اللي بالغرفة هاا اختار وسوى تصويت وسمى الاسم الاكثر تصويت حتى امها كانت معنا من ضمن المصوتين

اول ماتحمل نعرف حتى انهم الله يسعدهم اذا شافوا ولد ولا بنت جوا يورونا الصورة

وبصراحة من طيبتها معنا ومعاملتها لنا مثل اهلها والله مانعز عليها شئ ولا تحلى الجلسة إلا بوجودها ولو بيدنا نفتح صدورنا ونحط بناتها داخل بينما زوجة اخوي الكبير لو تغيب شهر ماجبنا خبرها وبناتها على العين والرأس بس المعزة اقل ويغيرون ليش
طيب وش نسوي انتم تشوفونا اهل زوج مو مثل اهلكم نجيب لهم فساتين هدايا ماعمري شفت الفستان على بناتهم بينما الغالية هذيك اول مناسبة نتقابل فيها البنت لابسة الفستان والله لو انه من محل ابو عشرة تجبر بخاطرنا وتلبسه بنتها وتمدحه


الخلاصة عاااادي وش فيها اذا اقترحوا ونصحوا طالما بحدود الأدب ولا غلطوا عليك

انا امي مستلمتني على وليدي ماترضعينه اكيد عطشان انتي مشغولة عنه بالدوام ولا تسوين له اكل واذا جيت من الدوام وتأخرت ساعه مارحت اخذه اول مااجي تقول جات امك اللي مدشرتك وماتدري عنك

تعرفين عااد بقانون الزوجة وأهل زوجها اللي للأسف منتشر لو هي ام زوجي كان اعلنت الحرب عليها بس لأنها امي ادخل واخرج من نفس الاذن

شعر ولدي من ورى طويل شوي وام زوجي لما شافته قالت قصيه قلت إن شاء الله وطنشت ونفس الشئ امي وخواتي وحريم اخواني قلت لا ماني قاصته ابغاه كده عاجبني

والله مافي احسن من الطيب وعاملي الناس بالحسنى ولا تفسري النيات واللي تتقبلينه من اهلك تقبليه من اهل زوجك بكل رحابة صدر

واخيرا أعتذر اذا كلامي ضايقك

وآسفه على الاطالة وإن شاء الله الرد يفيد ويغير كثير من الاخوات

والله عشان يحبونك ومعتبرينك بنتهم ... لازم تتحملينهم ترى نصايحهم كلها في صالحك انتي والنونو لا تصيرين حساسة ترى بتتعبي ولا تسمعين للي يقوونك عليهم انتبهي

يمه تخوفون قسم

مدري ليش هالحساسية من اهل الزوج

طيب اقترحت عليكم اسم ماجبرتكم تسمونه

والباقي كلها سواليف عادية ونصايح مافيها شيء بالعكس دليل الاهتمام والمحبه

متى نصفي قلوبنا وناخذ الدنيا سهاله