بسم الله الرحمن الرحيم
السلآم عليكم ورحمة الله وبركاتة
طبعا انا عضوة مسجلة من زمان بعالم حواء بس ماعمري نزلت مواضيع
هذا اول موضوع ليا وان شاءالله يكون قد المقام لأني كل مآأفكّر انزل موضوع أحتآر بجدد
المهم مآأبغى اطولها وهي قصيرة وخليكم معآيآ بالموضوع لآتروحوآ بعيد
كان ياماكان في قديم الزمان كان في بنت اسمها سنآبل
تحب ولد الجيران اللي اسمه زكريآ
كانت البنت بالمرحلة المتوسطةة وعاشت قصة غراميه مع زكريا واهلها طبعا مايدروا عن حاجة
كبرت البنت وصارت في الثانوي وصار تفكيرها عقلاني اكثر فقالت لزكريا
سنآبل : زكريا انا كبرت وفهمت ايش هدفك من المكالمات والرسايل الغرامية انت اصلا انسان اناني وهمك نفسك
لااشوفك تتصل عليا مرا ثانية تبغاني تحبني تعشقني اخطبني من اهلي وقففففلت بوجهه
زكريا خاف واتصل ع سنابل وسنابل مقفلة الجوال حاول يكلمها وحاول يوصلها وسنابل راسهههاا ناااشف
لين ماعقل زكريا وقرر يخطبها من أبوها !!
:time:
دقيقة قبل مآأكمل ايش صار وهل وافقوا اهل سنابل ابغاكم تحطوا عينكم ع حاجتين :
1- البنت كانت تعشق وتحب واهلها مو داريين عنها هذا يدل ع ايش أكيد على
ضعف الرقابة وكل واحد لاهي بنفسه
2- زكريا راح يخطب سنابل وهو مو مؤهل اللزواج ابدن ع بالو لعب بزاريين اخطبها اتزوجها وانتهى الموضوع وهذا يدل على ايش
على ضعف الثقافة قبل الزواج
سأل الأب عن زكريا وبحكم انه ولد صديقه اللي هو جارهم ابو زكريا وافق عليه لأنه واثق بصديقه وولده اشد الثقة
راح الأب الى الأم قالها ياام حسان ترا بنتك سنابل متقدملها واحد كفو ومافيه احسن منّه قالت مين قالها زكريا ولد جارنا
وافقت الأم بحكم معرفتها بأم زكريا اللي تعتبر جارتها وصديقتها الروح بالروح وكل يوم العصر تنزل عندها يلفوا ورق العنب
راحت الأم لسنابل وقالتلها تراك انخطبتي من زكريا وابوك وافق ومافيه مجال ترفضين
سنابل فرحت وقالت حتى انا موافقة وصل الخبر لبيت ابو زكريا ان سنابل وافقت وطار زكريا من الفرحة
وبدا يسبح بأحلامه وخيالاته قال اخيرا برتاح بخليها تريحني بكل شي الأكل يوصل لحدي وملابسي نظيفة ومرتبة ومعطرة اممم بفرض رايي عليها
بكون رجال بمعنى الكلمة انا بخليها تهابني كلمتي هي اللي تمشي صحيح احبها بس كنت بزر الحين بنكون متزوجين ومافي حركات حب وعشق وكلام
فاضي لازم تقدرني وتعتبرلي قيمة و.....الخ
اما سنابل فكانت تحلم والله لاخليه يشتريلي كل شي كل يوم ببلد وبسافر واتفشخر ع صحباتي امم بسكن بأحلى بيت وبعلم ولدي انقلش
وبخليه يدفع ويدفع ويدفع لين ماينتتحر وانا وولدي نورث فلوسه واسويلي مشروع بلإرث واصير اغنى غنيات العالم ......الخ
:time:
دقيقة قبل مآأكمل ايش صار خلونا نوقف ع كم نقطة :
1- لو نلاحظ ان الأب والأم حكموا ع زكريا من خلال الأهل وهذا غلططط كبير كثير يطيحوا فيه يعني لو الأب كان مثلا إمام مسجد
لازم ولده يكون مثله ! او نفس شخصيته وتفكيره ! لآ طبعاا فالسؤال هنا يكون ع الولد فقط بغض النظر عن الأهل لأن البنت هي اللي
بتعيش معاه
2- الأم والأب يفرضوا رايهم ع البنت مثلآ بقول مآفي مجال ترفضين لآأبدا البنت لها حق ترفض ولا توافق او حتى تفكر لأن هاذي حياتها هي
حتى لو كان اللي متقدملها واحد صاحب دين وأخلاق وفلوس فمن حقها تفكر كمان
3- زكريا بيتزوج وهو حاط بباله مبدأ والله لكون رجال وسنابل والله لاخليه بسويلي ويسويلي ونلاحظ تناقض بين المبدأين وهذا اكبر غلط
كثثثثثثير لما يتزوجوا يحطوا ببالهم ان هذا مو شخص يكمل معاه طريقه ونصفه الثاني لا هذا عدو له وكل واحد يفرض رايه ع الثاني
تزوج زكريا سنابل وعاشوا اكبر معاني العذاب النفسي كل واحد يفرض رايه ع الثاني كل واحد يشوف انه هو الصح والثاني الغلطط
زكريا حاط بباله ان سنابل عنيدة وسنابل حاطه في بالها ان زكريا انااااني > شوفوا الحوار اللي دار بينهم <
سنآبل : ابغى طقم بـ(00000) لأن عندي زواج بكرة
زكريا : ماقدر اجيبلك المبلغ ذا
سنابل : وانت عمرك اساسا جبتلي شي لاهي بنفسك الله ياخذك انا ايش خلاني اتزوجك غلطة عمري
زكريا : عاد مكتوب لك انك تتزوجيني ايش اسويلك انا ومن البداية محد قالك وافقي
سنابل : كنت مجنونة وعقلت ( تصرخ ) انت اصلا تحببب تفشلني قدام الناس شوف سلفتي ايش تلبس شوف اختي وين تسافر حتى امي اللي هي امي
ابوي جايبلها كل شي انت اساسا منت كفو عشان تفتح بيت وماعندك فلوسس مالت عليك وع وجهك روح طالع بوجهك بالمراية واحمد ربك لقيت وحدة تقبل بك الله لايوفقك
زكريا : ( شد شعرها وهو ضاغط ع اسنانه ) اقول احترمي نفسسك فاهمه ولا لا .. ويلا اليوم ماتروحين الزواج عشان تعرفين ان الله حق
سنابل : ( تبكي) اترك شششششششششششعري
زكريا : ( تركها واخذ جواله وطلع برا البيت )
سنابل : ( تبكي ) والله لاروح ماله دخل والله لآأكسر خشمه هذا الـ( &$لإ^#) والـ(#$%@)
:time:
نوقف شوي قبل مآنكمل :
1- طبعا اكيد كل وحده عارفة راتب زوجها كم فماله داعي تحرجه بمبلغ مايقدر يوفره ابدااا
2- شوفوا سنابل قلبت الموضوع لما قالت ( وانت عمرك اساسا جبتلي شي )
الآن انتي تتناقشي عن الطقم ايش دخل ذا في ذا ..
اولا الشقة اللي انتي ساكنة فيها بفلوسه والأكل والشرب والسيارة اللي تطلعيها بفلوسه
ومهما كان ومهما صار مايجي انك تنكريييين كل جمايله علليك
3- المقارنات وماأدراك مالمقارنات
أكببر غلط تطيح فيه البنت انها تقارن نفسها بأي احد ع وجه الأرض
لأ هاذي صفة مرا مو كويسة انتي كذا تهيني نفسك لأن ربي خلقك انتي لك كيان وذات
وشخصية فليش تقارني بينك وبين اي وحده
4- الشي اللي يستفز الرجل لما احد يعيّب بشخصيته او فقره مثل المرأه لما احد يعيّب بشكلها تنجرح مرا
فالرجال اذا احد عيّب بشخصيتهم او فقرهم ينجرحوا جدا حتى لو مابينوا
5- عدم الوصول الى حل او بالمعنى الأصح عدم التفآهم للوصول الى حل
بالعكس خرج زكريا وهو حاط بباله ان سنابل محتروح وسنابل قعدت وهي حاطه ببالها انها حتروح
تزبطت سنابل وتكشخت لبست احلى فستان عندها وفلتت شعرها الطوويل وتمكيجت ولبست عبايتها بعدين تذكرت ان مافي احد يوصلها
فقعدت تفكر وتفكر وتفكر لين ماقالت اروح ع رجولي نزلت سنابل وهي خايفة ان زكريا يشوفها بس بحكمة من الله
زكريا كان داخل باب العمارة وسنابل كانت خارجة
سنآبل : (قلبها طايح) زكريا !!!!!
زكريآ : سنااااااااااااابل
وطاحت سنابل مغمى عليها وشالها زكريا وطيران ع المستشفى بعد التحليل والكشوفات وكل شي تبين ان سنابل حامل
طار زكرييا من الفرحة وسنابل مو مستوعبة ايش صار ابدا
عدت فترة الحمل من اسرع مايكون طبعا سنابل تعبانة وزكريا ماقصر معاها كل شي يجيبلها هوا
لين ماولدت بالسلامة وجابت بنت سمّتها ( نآنآ )
طبعا كانت سنابل حريصة انها تولد بأحسن مستشفى بالمملكة وي حياتي يازكريا تدين وتقسط وتعب وتسلّف عشان يوفرلها الفلوس
واشترطت سنابل انها تسوي سابع بأفخم القاعات واغلى التكاليف عشان اول بنت لها وتعزم كل الناس وكل العالم عشان يقولوا والله زوجها شايلها فوق راسه
وطبعا زكريا ضغط ع نفسه عشان يحقق لسنابل حلمها وبالفعل حجز افخم القاعات وطلب ميز من افضل المطاعم
وسنابل نايمة ع سريرها مرتاحة هيا وبنتها .. دق زكريا ع سنابل شوفوا الحوار
زكريا : كيف حالك ي قلبي
سنابل : والله تعبانة وحالتي حالة ومكسرة وشعري طاير الآ اقولك سويت اللي قلتلك عليه
زكريا : ايه والله حجزت افخم قاعة لعيونك انتي وبنتنا وتكلفت عشانك وانتي تستاهلي
سنابل : ههههههه بس ترا هذا شي لازم انك تسويه غصبا عنك
زكريا : اها طيب تبغي شي
سنابل : لا باي
:time:
1- آه ياذا حمى المظآهر اللي نعاني منها ترا وربي هذا مرض نسأل الله العافية
يعني مستحيل نكون وصلنا لمرحلة نحكم ع الشخص من خلال مظهره احنا لو تأملنا بعبارة
( الله قسّم الأرزآق ) كآن مآاهتمينا بالمظاهر
2- كلام الناس اللي مايودي ولا يجيب اهم شي الناس قالوا عني والناس قالوآ
وش علينا من الناس اهم شي راحة اسرتي مالهم دخل الناس
3- والله الشكر اكبر هدية يُجازى بها اي معروف
احنا عندنا شوية جهل بمدى تأثير الشكر والمديح بالإنسان يعني هي مجرد كلمات بسيطة
ممكن تجعل الإنسان يطير من السعادة ويروح تعبه كله
( شكرا تسلم ماقصرت والله تعبت نفسك )
/
يتبع
