رسالة في جيب زوجي ( فسروها لي )

السلام عليكم ورحمة الله وبركاته

أخواتي العزيزات ...
بيني وبين زوجي مشاكل أول مالها آخر من الطرفين
لو أحكي لكم 3 أيام ماراح أخلص وحسبي الله ونعم الوكيل
طبعاً قبل فترة طويلة كنت احس بالإستقرار شيئاً ما والحمدلله وبعدين قدر الله
وتعاقدت مع مدرسة ودرست وجاتني عين طبعاً السالفة طويلة لكن إختصارها أني
عرفت وكل الي حولي حسوا انها عين وقوية أثرت على حياتي مع زوجي وتعبت شهور
الى أن جاء ذالك اليوم وأخذت من أثر المدرسة كلها بفضل الله ثم المديرة وتعاونها ورجعت
بعدها حيآتي طبيعية فترة بسيطة شهور تقريباً
وبعدها ماادري ايش صار خربت حيآتي مرة وحدة مستحيل نتفق أنا وزوجي على شيء
مشاكل على الطلعة والنزلة ومشاكل مادية حتى ضاقت علي الأرض بما رحبت
حيآتي منذ 4 شهور وأكثر بكاء وهم وأحزان ومقاطعة بيني وبين زوجي حاولت انسى المشاكل
وارجع اعدل بالحياة لكن مافي اي تجاوب حتى السلام يدخل بعد يوم طويل ولايسلم
أغلب وقته برا مع انو كان بيتوتي درجة أولى ويحب يجلس معي ومع اولادو ونتقهوى وناكل سوا
الآن شهور والله ماجلسنا ولاتقابلنا على وجبة ! بنفس البيت عايشين وننام بنفس غرفة النوم
هو بطرف السرير وانا بطرف مثل الأغراب وأشد !
كأن بيني وبينه حاجز ! طبعاً نيو لوك جديد وتغيير وتجديد هذا كله عملته لكن ماينفع لان عينه ماتنظر لي !
فكرنا بالإنفصال لكن لأجل الأولاد نتراجع ونأجل مع انو حصل طلقة أولى .. نقطة ضعفنا انا وهو الأطفال
يخاف عليهم وانا كمان يكسروا قلبي .. حسيت بعد هذه الشهور الطويلة الفجوة تزداد والصلح يصعب أكثر
حتى بيني وبين نفسي قررت أن اعيش مع اولادي وانساه لأن تفكيري به اتعبني كثير
مداومة على الاستغفار والدعاء لأني قلت يمكن بسبب ذنب او تقصير بحق الله يارب تقبلني وماتردني
وطبعاً مافي طريقة لا رسالة ولامسج ولامقاطع مؤثرة ولالين ولاشدة الاجربتها والله وهو مايستجيب الله يسامحه
بس يقول ويرد علي أنا عاجز أن احل مشاكلنا ! اقله رد علي اقل شيء تبغاني اعيش واكمل معك
ولا خلاص نفترق واروح لأهلي .. يقول ماادري أفكر ! مع ان كان بينا تآلف وحب سبحان الله
و بيننا عشرة عمر فيها حلو وفيها مر لنا 13 سنة متزوجين
المهم قبل أيام كنت الاحظ انو يترك البوك تبعه على التسريحه او على السرير مايآخذه مع انو كان دائماً
بجيبة وانا مااهتميت لكن لفت نظري أكثر صار موجود بإستمرار ومرة جلست انظف الغرفة ومسكت البوك
اقلبه يمكن فاضي ومايبغاه الا القى ورقة مطبقة واضح انو فيها خط يد .. ترددت كثير وتركتها
بعد يومين قلت بشوف اذا لسى معاناه في شيء رجعت قلبتها والورقة لسى فتحتها وانا خايفة
واحساس غريب الا والقى فيها وصية ( وصية الموت ) وكان الكلام من البداية حتى النهاية موجهه لأمه
على فكرة هو يحب امه واغلب هذه الايام شبه ساكن بالنهار عندها وهي تحبه بجنون حتى انها مرة قالت لي
انا افضل واحد في ابنائي وبناتي هو ( زوجي ) المهم كانت الوصيه يوصي امه ويوصي بتسديد دين عليه
ويوصيها كثير انها ماتبكي على فراقة وانو هذه سنة الحياة واني احبك ولاتبكي دمعة وحدة علي
واوصاها على اولاده وفي النهاية كلام مودع وأني أشعر بدنو أجلي وكتب ابنك واسمه !
بصرآحة انا انتفضت وجلست أبكي تخيلت لو صدق يموت مايهون علي لكن بنفس الوقت قلت يحس
بقرب أجله ويسوي كذا فيني ! حاولت اكلمه اتقرب يصد عني ! وبعد لما شفت الوصية حسيت انو
مو معترف اني زوجته حتى الاولاد ماقدر يوصيني عليهم ..
أحترت كثير بهذه الرسالة زوجي مو تبع حركات وكذب وبنفس الوقت تعجبت بطريقته وانو قاصد حتى اشوفها
بالبوك الي مرمي طول الوقت !
الآن احتاج تفيدوني انا بدوامة كبيرة هل اتجاهل هذا التصرف وايش يقصد فيه هل هو مكر الرجال ؟
ولا تتوقعوا شاف حلم وفسره انو بيموت لاقدر الله ؟؟؟
يارب تعبت وتعبت نفسيتي أكثر ارشدوني دلوني مالعمل اخواتي ؟؟
أرجوكن المساعدة بحل او فكرة حكيمة .. ولاتبخلوا علي بدعوة في ظهر الغيب حتى يقول لك الملك ولك مثل ذلك ..