أختاه أمسحي دمعتك فالله يبتلي من يحب .. عسى من طيح دمعتك يطيح حظه

انا صاحبة المعرف الاساسي
بالبداية ما اكذب عليكم
بصراحة ما ادخل عالم حواء
أنا سجلت من زمان وبعد فترة تركته واعطيت المعرف لصديقتي عشان تستخدمه لانها تحبه هي و خواتها
و لولا اختلاف الآراء لبارت السلع

المهم
قبل أمس جارتي جت عندي و هي آدمية على قد حالها مرة واذا جات لو معاي المقسوم عطيتها
لكنها ماشاء الله تخاف ربها و خلوقة ما اتوقع فيه احد زي اخلاقها اقل شي مبتسمة رغم الالم و الوضع السيء

يوم جت عندي و انا كنت مشغولة وهي تحب النت حطيتها عند الكمبيوتر بالصالة وقلت لها اشتغلي لين أخلص الكيكة و الشاي وكذا
رحت خلصت شغلي وجيت لقيت وجهها احمر و عيونها فيها دموع !!!!!!!!!
حتى الشاي والبسكوت ماقربت منه !
أستغربت سألتها اش فيك ما ردت قالت مصدعة وبروح البيت و مخنوقة بتبكي !

هي طلعت وما قفلت الكمبيوتر حتى وانا نسيته و قعد الكمبيوتر مفتوح
( لا تجي وحدة مطفية النور وتهاوشني تقول الكمبيوتر يخرب لو قعد يومين مفتوح الماك يقعد شهر لوبغيتي مايجيه شي )
اليوم جيت انتبهت انه مفتوح له يومين وجيت اسكره
و شفت اش الي بكاها
موضوع كتبته هنا بمنتداكم
لكن اش الردود الي جتها من بعض البنات ؟؟
من الي في قلبه ذرة انسانية و يعاير انسان بفقره ؟
من الي بقلبه خوف من الله ويعرف ان الله عزيز و قدير ويقول كذا ؟
شوفوا ترى انا ماني من النوع الي يجامل ..كلمة حق وبقولها
بعض الحريم بعالم حواء زاد وضعهم الحد الي ممكن الواحد يتحمله
يا عالم حواء بقولها لكم كلمة تتقبلونها و لا بكيفكم و كلمة الحق ما تتخبا
المنتدى وضعه تعبان بالذات القسم العام
انتم اثبتوا ان كلام الناس عنكم صحيح !
و ان الكلام الي يقولونه عن حروبكم صح !


الي بكى فقيرة وعايرها باللي رب العزة والجلال ابتلاها فيه الله بينتقم منها عاجلا او آجلا
محد يعاير فقير الا حديث نعمة ولا قليل اصل
من الي ابتلاها بالفقر ؟انا ؟ انتي ؟ هي ؟ ربي فوق سبع سموات اختارها لهذا الامتحان
دمعتها المظلومة و كلمة حسبي الله ونعم الوكيل ما بينها وبين الله حجاب
لا تحسبين انك مختفية خلف معرف مجهول ان الله ما يحاسبك ! ايه حنا ما نعرفك بس الله يعرفك !
جرحتوا بالمسكينة لين قالت بس
عشان كم ريال مسحتوا بكرامة مسلمة الارض ؟
أقول للبعض : اثبتوا انكم مقاطعين عشان الفلوس مو عشان الفقراء .. صفوا النوايا الله يجزاكم خير
قال ايش قال نقاطع عشان الفقراء .. والله مدري اضحك و لا ابكي
يعني الحين يوم انكم مقاطعين ينقالكم مقاطعين عشان الفقراء ؟
يا خي لا تقاطعون دام هذي الاخلاق !
أفتحوا الموضوع وشوفوا الردود الجارحة الي جتها !
الاخت الي مسميه روحها خياطة ما تخافين ربك ؟ اسلوب بحياتي ما شفت زيه !
يعني انتي مقاطعة عشان الفقراء ؟ طيب هذي فقيرة ليه ما راعيتي مشاعرها ؟
و بعدين من جدك انتي تشترين من يهود اعلنوا حربهم وشايفة ان مافيها شي ؟
يعني مجاهرة بالمعصية عيانا جهارا وماتبغين احد ينصح ؟

ياخي تعلموا ثقافة الاحترام عساكم للعافية !
تعلموا ثقافة الاختلاف .. الله ما خلقنا متشابهين فكريا وشكلا لابد ما فيه ناس بتجي آرائهم غير آرئكم ولازم تحترمونهم مو تهاجمونهم ؟!


و ترى ما غلطت صادقة هي وش معنى المراعي ؟
فيه شركات ثانية مغليه على الناس زي البيك و باسكن روبنز و غيره
و من جد ليه تشترون من ستار بكس ؟
وهي مرسوم عليها انها يهودية عيني عينك مالهم كرامة الي يشترون ؟ جيبوا لليهود قهوة عربية يشربون منها ؟
ولا تقولون ما نعرف ستار بكس و نحنا مقاطعين لا تلعبون على بعض
كلنا كل يوم بالمولات ونشوف الزحمة محد مقاطع الا القليلين بسسسسس
لا و بعد مطلعين عذر ان راعيها مسلم .. تلعبون على مين ؟ والمسلم متعاون مع مين ؟ شغلوا عقولكم جزاكم الله خير

هذا الي عندي !
وقلته وما اخاف وقت الحق بكيفكم لو تزعلون
و من ذب عن عرض اخيه ذب الله عن وجه النار يوم القيامة او كما جاء بالحديث


لا تردون على الموضوع
لاني انا كاتبة الموضوع اصلا ما ادخل عالم حواء الا نادرا
يمكن صديقاتي الي يكتبون بإسمي بيدخلون هم بيكفهم
بس انا كاتبه الموضوع مابرد على احد ..
اصلا ماسويت موضوع عشان تردون
سويته عشان تستغفرون لربكم من المسكينة الي طلعت تبكي لا ربي ينتقم لها منكم
سويته عشان تجددون النوايا
سويته عشان تعتذرون منها


سبحانك اللهم و بحمد اشهد ان لا اله الا انت استغفرك واتوب اليك


هذا هو الموضوع عشان تعرفون قصدي
شوفوا كيف تقولكم قاطعوا كل الكفار الي يآذون المسلمين
وشوفوا كيف الردود و التريقة بحالها !!!!!!

http://forum.hawaaworld.com/showthread.php?t=3200694&page=4

1 تعليق 884 مشاهدة

شاركي في النقاش

سجلي الدخول لإضافة تعليق.

التعليقات

1
  1. @bysan2011

    قال صلى الله عليه وسلم في الحديث: {المؤمن الذي يخالط الناس ويصبر على أذاهم خير من المؤمن الذي لا يخالط الناس
    ولا يصبر على أذاهم }
    اصابع يدك مو زي بعض إلا ما تلقين احد يعارض لكن المشكله في الاسلوب للأسف تعبنا وحنا نردد الديموقراطيه الحريه ...بعد اذن صاحبه الموضوع
    بقول لأي وحده تعارض .......تعارض بس بذوق
    خلو الناس يقولون أرأهم بدون تجريح وش الفايده اذا حطيتي رد وجرحتي وسبيتي يعني بتقتنع برأيك مستحيييييييل
    اذا انتي متأكده ان رأيك صح فغيرك متأكد اكثر منك ان رأيه صح بس مو لازم نفرض رأينا على احد .........وفي النهايه اتمنى ان الله يلهمني الصواب في كل كلمه اقولها ..........واتمنى ما تنزل دمعه بسببي.

تابعي تجارب أخرى من هذا القسم.