الـــــــــسلام عليكم ورحمة الله وبركاته
اخواتي بقولكم كلام من اخت حالها حالكم متخرجه من سنين وبمعدل عالي وتخصص متعب في الدراسه ومو سهل وعندي دورات
وفوق ذا كله الوظيفه عندي مثل الحلم والامنيه من يوم وانا صغيره يعني شغف وحب وعشق وانتظرها على احر من الجمر..!
لكن تصدقون اني راح اتوظف غصب عن الخدمة عن الوزاره عن الواسطه عن الظلم عن كل شيء
والله راح اتعين وراح اتوظف غصب عنهم جميع.!
لان رزقي والله العظيم مو بيدهم وربي مو بيدهم هم مجرد اسباب وتسخير .
مين راح يسخرهم لي ؟!
غير رب العالمين اللي مايعجزه شيء في الارض ولافي السماء اللي بقدرته يحقق لي حلمي ويسخر لي رزقي من حيث لا احتسب .
يااخوات ترى وربي الوزاره ماتملك رزقنا ولا بيدها تحقيقه الا اذا ربي اراد
تعرفون هذا الشيء اغرسيه بداخل قلبك لا تتعلقين بالوزاره ولا باللي حولها
ولا تكبرين قدرتها الضعيفه اللي ماتملك شيء
ولا تتوكلين عليها وتنتظرين رحماتها الضعيفه .
فيصيبك الياس والقنوط من ميييييييييييين ؟؟!
من رحمة ربي وقدرته وعظمته اللي مايعجزها شيء ربي اذا اراد شيء يقول له كن فيكون .!
يااخوات اللي بقدرته وقوته يزلزل الارض ويخليها رماد .!
مايقدر يحقق لك امنيه وهي بسيطه وماتسوى شيء عند رب العالمين؟!
اللي في ثواني يخلي الارض بحور بعد ماكانت شاهقه وعامره ونسبة التطور فيها عالي
زي اليابان شايفه كيف تطورهم وحالهم وقوتهم شايفه كيف ربي خلاها بحور بقدرته وعظمته
معقوله مايقدر تعالى الله عن ذلك انه يحقق لك امنية تعيينك الهينه
اللي ماتسوى عند الله مثقال ذره.!
فعشان كذا يااخوات ازرعي بداخلك ان رزقي وتعيني وتوظيفي بيد اللي مدبر امري بيد اللي مايعجزه شيء في الارض ولا في السماء بيد رحمن الدنيا ورحيمهما الكبير المتعال جبار السماوات والارض
حرام تكبري صورة وزارة لاحول لها ولاقوة حرام نعطيها قوة فوق حجمها حرام نتوكل على مخلوق ضعيف لايملك لا قوة ولا رشدا ولا تدبير لامري.
فعشان كذا والله الذي لا اله الا هو رب العالمين الذي لايعجزه شيء في الارض ولا في السماء وبعضمته التي ليس مثلها شيء اني راح اتعين وراح ابشركم بتعيني بقدرة ربي مو بقدرة اي انسان
اليوم بكره بعده بعد سنين والله راح ابشر بتعيني
طالما تدبير رزقي وتسخيره بيد ربي خالقي رازقي رب العالمين مدبر امري اللي رحمته اعظم من رحمة امي وابويه عليه ..!
*راح ابشر باذن الله*
ويااخوات تعوذوا من القنوط والياس لانه مو من صفات المؤمن
تياسين من مين من قدرة رب العالمين؟!
تياسين من مين من اللي مايعجزه شيء في الارض ولا في السماء؟!
تعجزين من مين اللي مدبر امرك ومسخرلك الدنيا كلها!
اسمعي هذا الحديث وخليه نصب عينك كل ماطرق القنوط والياس بابك تذكريه
أن رسول الله - صلى الله عليه وسلم - قال :
" ثلاثة لا يسأل عنهم : رجل نازع الله رداءه ، فإن رداءه الكبر ، وإزاره العز ، ورجل في شك من أمر الله ، والقنوط من رحمته " .
يعني الان قنوطنا ويأسنا وانه مستحيل راح اتعين وانه الوزارة هي سبب حرماني من تعيني وان الوزاره هي بيدها تعييني.
هذا كله يدخل والعياذ بالله في القنوط من رحمة الله
من القنوط بقدرة الله من القنوط من عظمته
اذا نزل علينا اي امر اي بلاء فلنتيقن انه من ارحم الراحمين اللي يسخرلي كل خير وهو خير لي
اذا تتحققت امنيه لك معناه ربي اختار لك شيء تحبيه انتي
لكن لما تنحرمين من امنيه وقدر لك المولى شيء اخر فتاكدي اختار لك الله مايحبه هو عزوجل .
ومانزل اسمي في الترشيحات لان ربي مااراد مو عشان الخدمه ولا الوزاره الضعيفه اعطيها حجم فوق حجمها واصور لنفسي والعياذ بالله ان تدبير امري بيدها
لا والله مانزل اسمي لان رزقي مازال في الارحام لم يحين وقت ولادته وسوف تحين باذن الله وقدرته.
ونصيحه لكم اتركوا العالم والناس لاتطالعين الا في اللي ادنى منك عشان نفسك تهدأ وترتاح وترضى باللي ربي كتبه لها
اللي يتعينوا كلهم ربي كتب لهم هذا الشيء وربي سخرلهم الاسباب والا هم اضعف الضعفاء.
هذا اخر كلامي واتمنى يصل لقلوبكم فكتبته لي ولكم
لاننا محتاجين لهذا التذكير وابتسمي وافرحي لان الفارج لكربك والمحقق لامنياتك هو الله جبار السماوات والارض
شاركي في النقاش
سجلي الدخول لإضافة تعليق.
التعليقات
64- كتبتي اللي نفسي اكتبه بارك الله فيك
ومبرووووووووووك للمتعينات والفال لنا ان شاء الله - الله يجزاك خير
يعجبني حسن ظنك بالله
و نحن جميعا عند حسن ظننا بالله - كلامك بلسم وعين العقل
ربي يعوضنا وتطلع اسمأنا في الدفع الجاية - جزاك الله خير
والله يرزقنا من فضله - الله يجزاك خير ويشرح صدرك
ويكتب لنا الخير حيث كان
شكراً لك
مواضيع مشابهة
تابعي تجارب أخرى من هذا القسم.