تجمع الموقنات برحمة الله(خبرات متبادلة حول مراكز العقم في مصر)الجزء 22

السلام عليكم و رحمة الله و بركاته
مهما قلت او وصفت مش هعرف الاقي حاجة توصلكم احساسي انكم واحشني جدا جدا جدا جدا
بس غصب عني غيابي عنكم
انا عارفة ان جملة غصب عني دي كترت اويو سمعتوها مني كتير بس ربنا الاعلم باللي انا فيه
قبل ما اتكلم معاكوا عاوزة اقولكم حاجة مهمة
اقسم بالله الذي خلق السموات و الارض اني مش راجعة عشان مصلحتي و لا عشان عاوزة حاجة من حد
انا ببساطة هنفجر و محتاجة اتكلم و مش لاقية حد من بعد ربنا ممكن احكي معاه و يفهمني غيركم
على الرغم اني اخدت عهد على نفسي ان محدش يعرف عني حاجة مهما حصل ( عشان مبقاش مصلحجية )
بس و الله و الله و الله هيجرالي حاجة
طبعا زمانكوا عمّالين تقولوا احكي
حاضر هحكي
و الاخت اللي قالت اني مصلحجية ياريت اما تلاقي مشاركتي تدور وشها عني و تسيبني في حالي
لانها حتى لو ردت .......... مش هرد عليها
احكي باة و كفاية رغي
فاكرين اخر مرة اخدت تنشيط كان في شهر يناير و وقتها اخدت 18 حقنة فوستيمون و طلعلي 12 بويضة و كانت اكبر بويضة 11 ملم و وقتها د / عادل اوقف كل حاجة لحد اما اخس عشان النتيجة دي مع تنشيط جديد معناها اهدار لوقت و جهد و صحة و مال و كل حاجة
المهم
البيريود مش جت لحد يوم 19 مايو و استمرت بنزيف حاد لمدة شهر
اخدت خلاله كل مضادات النزيف الممكنة و من غير اي فايدة لحد ما في يوم فوجئت بلونها بيتحول للاسود و الم بيقطعني ( نسيت اقولكم انها و لاول مرة تيجي نزيف مع الم مستمر لا ينقطع )
اما كلمت د / عادل و شرحتله الموقف قالي عملية فورا ننضف الرحم و ناخد عينة منه عشان نعرف في ايه
و قد كان و عملتها يوم 20 / 6 و المفروض ان النزيف يتوقف بعد يومين او 3 على اسوأ تقدير
لكن للاسف النزيف توقف لمدة 12 ساعة و بعدها لقيت دم كتيرو وقف تاني
المهم ان د / عادل كان قالي اني هاخد جينيرا بعد العملية عشان نضمن عدم تكون بطانة الرحم مرة تانية و بالتالي تجنب النزف و بالفعل ابتديت اخده من تاني يوم العملية
و فضل الالم مستمر بشدة و مفيش حاجة عاوزة تسكته لحد اليوم ال 19 من البيريود فوجئت بألم مضاعف و نزول دم غامق كلمت د / عادل مرة تالتة او يمكن عاشرة مش فاكرة سألته عن سبب اللي انا فيه دة فقال ان السبب العضوي احنا مطمئنين من ناحيته لان نتيجة تحليل العينة قالت انه خلل هورموني و ان ممكن يكون السبب نفسي لان اللي بيحصل دة معناه ان الرحم ثائر جدا و اداني كورس مسكنات و قال هنمشي ع الجينيرا و عدّل في الجرعات

و من يومها و انا بمووووووووووت الالم كان مخليني ماشية محنية علطول و النزيف مش نافع معاه 12 قرص في اليوم دافلون و دايسينون اقراص مع حقن دايسينون

و نسيت اقولكم انه بعد العملية مباشرة لقيتني بحس بهبوط شديد و ممكن افقد اتزاني و اقع

و عملت صورة الدم و لقيته 5 فابتديت اخد معوضات دم و النتيجة اتحسنت ل 7
و مش عارفة وصلت كام دلوقتي

طبعا مش عارفة اقولكم حالتي كانت ازاي و نفسيتي كانت تحت الحضيض بمراحل و الاحلام بأة مش قادرة اقولكم لدرجة اني لقيت جوزو في يوم بيصحيني و بيصرخ فيّ فوقي بأة فوقي
طلعت كنت بصرخ ( لا يارب متعملش في كدة انا بحبك و متأكدة انك مش هتعمل في كدة ) ........ كنت بحلم ان د / عادل بيكلمني و بيقولي الحل اننا نشيل الرحم و مفيش حل تاني
و المشكلة ان ربنا كان بيحط ادامي كلام كله بيؤدي لنفس الكابوس دة
يعني مثلا الاقي حماتي تقولي انا كنت كدة و الحل اني شلت الرحم ( طبعا هي مش قصدها حاجة لانها على نياتها و طيبة اوي و بتتكلم بسلامة نية )
فكنت مقضياها نوم و عياط و صمت تاااااااااااااااااام

طبعا وسط كل دة كنت بتعرض لضغط شديد من ماما و بابا و جوزو ان في حاجة غلط و غامضة و اني لااااااازم اخد رأي دكتور تاني و ان دة لا ينقص من شأن د / عادل في شيء

هي الفكرة اني اكره ما علىّ التنطيط عند الدكاترة مش اكتر و لا اقل

المهم روحت لدكتور رشحتهولي صديقة مامتي اسمه جلال البطوطي
راجل كبير محترم حنون سمعته كويسة جدا جدا جدا و الكل بيشيد بعلمه و طيبة قلبه ( بس مش بيفهمني حاااااااااااجة )

طبعا كشف علىّ و عملّي سونار و سمع مني كل اللي عاوزة اقوله و بعد الكشف قالي هنوقف الجينيرا تماما و عدّل جرعات مضادات النزف و زوّد عليها نوع تاني و اداني سيدولوت - نور
و طلب يشوفني بعد 4 ايام و ان شاء الله هيكون الدم اتوقف و لكن هيهاااااااااااات روحتله في الميعاد و قالي الرحم لسة فيه دم هنكمل اسبوع كمان
و بعد اسبوع حسيت ان الدم بطّل ينزل فرحت و قلت ياما انت كريم يارب و بعد الكشف قالي انا مش فاهم انت ايه حكياتك الرحم ما زال مليان دم هنكمل 3 ايام كمان
و روحتله يوم الخميس و قال كله تمام و اداني خطة علاج
و اخيرا نطق و فهمني هو ناوي على ايه
ناوي اني و لمدة 4 شهور مش آخد اي ادوية و لا حتى فيتامينات !!!!!!!!!
عشان عاوز ينقّي جسمي من كل اثار الادوية و الهورمونات اللي اخدتها و طلب مني اروح لدكتور تغذية عشان عاوز اني استعيد صحتي بالغذاء السليم مش بالادوية و يبقى منه اخس و منه استعيد طاقتي و صحتي ولما انزل للوزن المطلوب نبقى نشوف موضوع التنشيط
و قال لجوزي كلمتين
( البنت دي غلبانة و طيبة اوي بس هي علطول متوترة و مشدودة )
بس كدة
ان شاء الله بكرة هروح لدكتور تغذية اعرض عليه الامر و اشوف هنعمل ايه
طبعا طولت عليكوا و داخلة مش عارفة اي حاجة عنكم
بس كنت عاوزة اشيل الهم اللي راكز على قلبي بقاله شهور و ايام
سامحوني سامحوني سامحوني
و كل سنة و انتم بألف خير و سعادة و حب و ايمان و طاعة و غفران و عتق من النار ان شاء الله تعالى
بحبكم في الله من دون غرض او مصلحة

نيفو انتي قلبك كبير معلش سامحي البنت دي جايز تكون اللي قالته دا زله لسان
وربنا يفك كربك و متفكريش في الوحش يانيفو
ربنا فرجه قريب ..... وكويس انك حتاخدي خطوه دكتوره التغذيه دي ... حاولي تظبطي اكلك وكمان الانيميا دي ممكن تكون هي اللي مسببه ان النزيف دا مينتهيش
ربنا معاكي ياحبيبتي و يزيح عنك هذا البلاء

مصرية حاولي متفكريش كتير الله يكرمك عشان انتي بالمنظر دا حنلاقيكي على اخر مده الحمل في السرايه
الحمل رحله طويييييييييييييييله اوي اوي حتعملي في كل الوقت دا ايه...
وموضوع الربط دا سيبيه لتقدير الدكتور .... انا بقيت اسيب نفسي للدكتور و اقول أمين مش لازم كل حاجه نوجع بيها دماغنا كدا
وبعدين لا انا ولا توتا عملنا الربط دا .....انما اوشه و ساره عملوه ...فكل بني ادم حسب حالته ...
وربنا يكملك على خير يابنتي