تجمع الموقنات برحمة الله(خبرات متبادلة حول مراكز العقم في مصر)الجزء 22

ازيكم يا قمرات
الحمدلله هنبدأ شهر رمضان بفرحة خبر حمل بندقه
عشان جرعة التفاؤل تزيد وكل واحد يعرف انه ليه معاد ربنا هيكرمه فيه
اللهم لك الحمد

احكيلكو بئه علي حكاية حملي
انتو تقريبا عارفين شويه منها
هي ليها شقين شق روحاني وشق علاجي

اول حاجه الشق العلاجي
عارفين طبعا ان بعد اخر اجهاض دكتور عادل قالي اخد حبوب ياسمين شهرين انا اخدتها تلاته عشان جوزي كان مازال مسافر والدكتور قالي لا مانع

وبعدين بدأت اخد التنشيط العادي اللي هو حبيتين كلوميد في اليوم وتلات حقن فوستيمون في اليوم 5 و6 و7

وطبعا خلال الفتره اللي فاتت كنت محافظه علي وزني في الاكل ورياضه تقريبا تلات مرات في الاسبوع لحد ما بقيت اكتر من سمبتييك بجد

المهم الجديد اني واحده من صاحباتي رشحتلي دكتور امراض دم ومناعه وكانت ساره علي وماما نصحوني من زمان بس انا كنت بقول منا عملت تحاليل اللي هي الذئبه الحمراء والفوسفولبد وطلعو نورمال يبقي مش محتاجه اروح لدكتور دم

بس قلت اروحله
وطلب مني تحاليل دقيقه جدا كلفتني فوق الف جنيه

وطلعت نتيجة التحاليل زي مانتو عارفين نسبة تجلط فقالي اخد كلكسان 60 وجوسبرين 80
والانتي فوسفولبد بقه في هاي رينج بتاع النورمال مش في النورمال فقالي هنعيد التحليل ده بالذات لما يحصل حمل ممكن يرتفع وده فعلا اللي حصل ارتفع مع الحمل فقالي هناخد سولوبرد 10 مجم كل يوم بعد الفطار لاخر الحمل اللي هو كورتيزون
وطلع عندي حاجه كده مش فاكره اسمها بالظبط بس اللي فهمته انه خلل جيني
قالي هنفضل علي علاجنا مفيش جديد

طبعا انا اتخضيت من الخلل الجيني ده لانه زي منتو عارفين ملوش علاج
بس الخلل ده جاي من الام او الاب مش من الاتنين فاهمني؟؟
المهم بحثت علي النت كتير ملاقيتشي اجابه الا في مواقع اجنبيه

لاقيت بنات عندهم المشكله ده وحملهم نبضه بيقف زيي بالظبط
طلع الخلل الجيني ده بيمنع تقريبا الاستفاده او تكوين الفولك اسد

والحل انهم كانو بياخدو جرعه عاليه من الفولك اسد تعوض النقص ده
وفعلا بديت مع نفسي اخد بدا 500 ميكرو جرام الي 5 مجم قبل ما أنشط بفتره تقريبا شهرين + مالتي فيتامين

ولما سالت دكاترة النسا قالولي ماشي مفيش مانع خدي كده كده مش هيضرنا في حاجه الزياده هتنزل في البول

وبدات اخد التنشيط العادي
وفعلا حسيت بألم في اليوم 9 من الدوره كانه الم تبويض قلت ايه ده ده بدري اوي
وكان جوزي اصلا جاي اليوم ال10

المهم انا كنت عند ماما في اليكس
سافرت كايرو ووصلت علي الساعه 9 ونص وكان جوزي قدامه ساعه ونص عقبال ما يجي من المطار

وطلعت البيت وانا فرحانه بمجي جوزي واتصلت بدكتورتي اللي جنب البيت اقولها علي اني عايزة اشوف التبويض قاليتلي تعالي
وانا جوايا متاكده ان في تبويض ممتاااااز ده حسيت بالام في اليوم 9
معني كده اني فل الفل

رحتلها بسرعه
وكشفت
لاقيتها بتقولي هو جوزك جاي الساعه كام؟؟؟
قلتلها ليه هو التبويض حصل ولا ايه

قاليتلي ماهو يا اما حصل مع اني مش شايفه الكيس الاصفر اللي طلعت منه البويضه يا اما التبويض مش زي كل مره لانها لقت بويضه في اليوم 10 مع التنشيط ده 11 وطبعا ده قليل وقاليتلي انا فاكره انك بيطلعلك بويضات كتير وحجمها اكبر من كده في اليوم 10

قاليتلي علي العموم خدي انهررده حقنتين فوستيمون وبكره كمان وبعدين تعاليلي اشوف ايه الاخبار وبلاش تحكي لجوزك
روحت البيت وانا مصدومه
واعدت اعيط عياط لوحدي في البيت ولا حكيت لأمي ولا حاجه

قلت اعمل ايه ياربي
ساعدني
المهم لاقيتني ببعت لدكتور عادل الله يكرمه واسائله رد عليا بسرعه وقالي فعلا اعمل كده
رحت اتصلت بالصيدليه واخد الحقنتين

وانا ببكي وحاسه اني مخنوقه لاني حسيت ان تبويضي بئه غريب من بعد ما كان بيطلعلي بال5 بويضات احجامهم من 16 -18 -20
بعدين لاقيت نفسي بقول

اهدي في ايه والله لو فيكي خمسوميت بويضه وربنا مش رايدلك حمل مش هتحملي ولورايدلك حمل ومفكيش ولا بويضه هتحملي

والله اعدت اكلم نفسي في البيت بصوت عالي زي المجنونه
كل اللي بقوله ربنا اذا اراد شيئا يقول له كن فيكون
انا مش هعكنن عليا ولا علي زوجي
وهتبسط

المهم محكيتشي لجوزي اي حاجه وكنت باخد الحقن مع نفسي عشان بس معككننشي عليه وهو جاي من السفر وكان حبيبي عملي مفاجاه اننا نروح نقضي تلات ايام في الغردقه

المهم قبل ما اسافر قلتله هروح بس بسرعه لدكتوره هشوف حاجه
المهم راح معايا والدكتوره لقت البويضه بعد ما كانت 11 بقت 14
قليتلي كويس اهي بتكبر قلتلها بس بطيئه في كبرها اوي

قالتلي برده خدي انهرده اتنين فوستيمون وبكره كمان قلتلها مش كتير؟؟؟ قاليتلي احنا لينا حجم البويضه
قلتلها بس احنا مسافرين الغردقه بكره
قاليتلي وماله روحي اي مركز اشعه او مستشفي عشان تقوليلي وصلت لكام

جوزي قالي هو في ايه
قلتله لا مفيش هو بس عشان يمكن حبوب منع الحمل خلت البويضه بطيئه شويه في النمو بس كله تمام متقلقشي :)
مش عايزة ادايقه

المهم رحنا الغردقه وسلمت امري لله قلت هعمل الدكتوره قاليتلي عليه وربنا كريم وفي نفس الوقت اتفسحنا ونزلنا البحر واكوا بارك وبيسين ومطاعم ووو

وجه اليوم اني اشوف التبويض
رحت مستشفي ودكتوره الاشعة قاليتلي البويضه حجمها 24 في 25 في اليوم 16 واتصلت بالدكتوره قاليتلي خدي حقنه الكوريومون واعدت تديعيلي ربنا يباركلي فيها
واخدت الحقنه فعلا

وانا من جوايا قلبي كان خايف انه البويضه تتحول لكيس عشان انا عندي سوابق في موضوع الاكياس
بس سلمت امري لله

وبس كنا طبعا بنعمل الواجب علي اكمل وجه
ورجعنا كايرو بيتنا

وفضلنا نعمل الواجب لحد اليوم 18
وبس

وسبحان الله بجد سبحان الله طلعت حامل
ولما عملت اول سونار اللي هو في الاسبوع 7
لاقيتني حامل في توأم ومش في كيس واحد ومش بمشيمه واحده (( توأم بنات علي فكره )) :)
وبدات ازود جرعة الفولك اسد ل 10 مجم وساعات 15

يعني ايه الكلام ده
يعني كان في غير البويضه اللي كنا بنشوفها
يعني مكنتشي بويضه واحده

طب كانت فين وازاي وامتي
الله اعلمممممممممممممممممممممممممممممممممممممممممممممممم

هكملكو الشق الروحاني بعد الفطار ان شاء الله

توفي
الله اكبر انت حامل في توائم اللهم بارك الف مبروك ياحبيبتي
انت عرفتي انهم بنات في الاسبوع الكام وياريت تعملي توقيع الحمل عشان نعرف انت في الكام دلوقتي لاننا بنتابع بعض
الف الف مبروك وعقبال متجيبيهم بالسلامه ودعواتك حد فيهم يطلع بنت او الاتنين انا بموووووووووووووووووت في البنات

بندقه
لما ترجعي من عند الدكتور طمنينا عليك

ماما وشيمو
الدور عليكم ياحلوين حنكثف ليكم الدعاء شويتين لحد ما نخلص منكم هههههههههههه ربنا يوفقكم

خير الزاد- املي- شادن0- ام حفصه - ميزوا ودادا ربنا يرزقكم الحمل في الشهر الكريم يارب

عاملين ايه في الصيام
انا عدي علي خير الحمد لله بس هي المشكله في الفطار بحس ان دماغي ضربت وبطني حتفرقع

وزه
يارب تقعدي 10 ايام في التاسع بس هههههههههه كفايه عليك لان بسمع ان التطويل بتعب اكتر ربنا يقومك بالسلامه