تجمع الموقنات برحمة الله(خبرات متبادلة حول مراكز العقم في مصر)الجزء 22

ازيكم يا بنات عاملين ايه
قبل ما اكمل حكايتي هجاوبكو علي اسألتكو
انا الحمدلله حامل في 6 شهور وكام اسبوع اكون 7 شهور ان شاء الله
ومش عارفه اعمل شريط الحمل ده :)
عرفت جنسهم لما عملت الفور دي في الاسبوع 16
عملت ربط ولالا؟ اه عملت
لكذا سبب منهم اني كان عندي حاجز رحمي اه عملت عمليه وشلته بس برده كنت خايفه يكون هيأثر في حمل التونز
وعشان مكنشي عندي استعداد اخاطر بالحمل ده ابدا ابدا
فعملت الربط احتياطي
مع اني قريت انه ممكن يعمل التهاب او يحرض الرحم فيحصل اجهاض بعد الشر بس بصراحه محدش من الحواليا حصلهم كده منه
طبعا ببعد استخارة ربنا ربنا يسرلي الموضوع

نكمل بئه الشق الروحاني واللي انا مقتنعه في انه 100% هو سبب بعد ربنا في هذا الحمل

اولا انتو طبعا مش محتاجين اقولكو عن فضل الاستغفار والقران وقيام الليل والدعاء

لان انا اصلا كنت عارفه فضلهم من زمان

بس في فرق كبير اوي بين زمان ودلوقتي في طريقة عبادتي

مش عارفه اقولكم ازاي

يعني انا من زمان عارفه فضل الاستغفار ومقتنعه بيه
بس لما كنت بستغفر زمان مش زي دلوقتي خالص

مش عارفه ازاي اوضح بس تقريبا والله اعلم ربنا بيأخر اجابتنا لحد منوصل لدرجة ايمان معينه هو اعلم بيها

هقولكو كنت بعمل ايه بالظبط
بعد اخر اجهاض الللي كان ايام افريقيا

استغفر الله العظيم
حصلي حاجه ربنا ما يكررها عليا ولا علي حد
ايماني اتهز
ثقتي قلت في ان ربنا هيستجيب دعائي
كنت بقول لجوزي
طب ما هو انا عملت كل حاجه من أخذ بالأسباب والدعاء واستغفار وصدقه ليه بئه ربنا مستجبشي
واتكرر تاني اللي بيحصلي
يعني كاني عايزة اقول دعيت ولا مدعيتشي مهو اتكرر تاني اللي حصلي (( استغفر الله العظيم يارب سامحني))

كنت في حاله ايمان ضعيفه وكنت حاسه ان الشيطان هيبدأ معايا
بجد كنت خايفه جدا علي نفسي وكنت بدعي ربنا يقويني علي نفسي

بس جوزي كان يقولي مش معني انننا عملنا كل حاجه ان ربنا يستجيب في لحظتها
ممكن ياخر الاجابه لانه عارف الخير لينا فين وامتي
احنا نعمل اللي علينا والاجابه ربنا أدرى انهي وقت مناسب


والحمدلله عدا الموضوع ده علي خير بالذات لما اعدت مع نفسي ولاقيت ان ربنا كريم اوي وانه استجابلي اكتر من دعوة دعيتهامن زمان منها اني دعيت ربنا يرزقني بزوج الصالح ودعيت بصحبه صالحه واحسبكم كلكم كده ان شاء الله اي نعم علي النت بس انا بعد معاكم اكتر وبستفاد منكم اكتر من صحابي اللي بخرج معاهم
وحجات تانيه كتير

المهم الموضوع عدا علي خير ولاقيت كذا حاجه جت قدامي كانها بتقولي اعملي كده وهو ده الصح

يعني مثلا
فاطمة الزهراء لما قالت انا الدكتور كاتبلي علي روشته غريبه اللي هي اذكار ( استغفار والصلاه علي الرسول وربي لا تذرني فردا وانت خير الوارثين )
انا قلت طب فعلا ليه معملشي كده كل يوم
اشمعنه لما الدكتور يكتبلي علي دوا باخده بالساعه وبالدقيقه
والاذكار ساعات كنت بنساها

فلقيت نفسي قبل ما انام كل يوم اخد سبحتي واقول وردي من الاذكار بقلبي قبل لساني كل يوم كل يوم كل يوم

بعد شويه لاقيت مميزات قاليتلنا علي موقع حفظ القران وسبحان الله طول عمري حاسه ان حفظ القران صعب بس كنت من زمان ادعي ربنا يارب ارزقني حفظ القران والعمل به
وهوالحمد لله ربنا يسرلي الموضوع و سجلت فيه وانتظمت والي الان حفظت اربع اجزاء وداخله علي الخامس
يعني حاجه عمري مكنت اتخيلها


بعدين قريت قصة واحد بيحكي عن مراته انها كل شويه تحمل وتجهض تحمل وتجهض ونصحها شيخ انها تقرا سورة الانبياء كل يوم عشان السور ده فيها معظم الانبياء كان كل واحد بيدعي ربنا بدعوة وربنا استجابله
وفعلا مراته حملت وكمل حملها علي خير http://www.66n.com/forums/showthread.php?t=200870
فقلت انا هبدا حفظ القران من سورة الانبياء

قيام الليل كنت بعمله بس مش كنت بنتظم اوي
الموضوع اتحسن وبقيت استني الليل يجي عشان اصلي ركعتين اكلم ربنا واشكيله وأدعي بكل اللي نفسي فيه
حتي وانا في الغردقه جوزي يعد يتفرج علي التي في او يكون نايم في الاوتيل
اقوم افرد سجاتي واصلي واطول في السجود وادعي اوي اوي اوي ادعي ليا وليكو وكل اللي زينا وافضل اعيط وبعد ما اسلم احس براحه رهيبه وطمأنينه ان ربنا مش هيخذلني ابدا

الاذكار انتظمت فيها اكتر واكتر اللي هي اذكار الصباح والمساء

سورة البقره من اول محصل الحمل
بدات اقرا كل يوم حزب
يعني تقريبا بخلصها في 5 ايام واعيد من الاول تاني وهكذا
بحيث ميعديش يوم الا وانا قريت حاجه من سورة البقره

الصدقه طبعا منسيتهاش بس جوزي كان اشطر مني في الموضوع ده يعني جوزي هو اللي كان بيتولي الموضوع ده اكتر مني

وبرده من اول محصل الحمل قريت علي زيت الزيتون الرقيه وكل يوم اهن بطني بيه واستودع اجنتي واعيذهم بكلمات الله التامات من شر كل شيطان وهامه ومن كل عين لامه

والحمدلله انا اللي الان مستمره علي الحجات الحلوة ده
يارب أدمها نعمه
لانها فعلا نعمه كبيره اوي مكنت حاسه بيها

السلام عليكم ورحمة الله وبركاته ازيكم يا بنات عاملين اية ف رمضان يارب يكون خيرا علينا جميعا يارب

شيمو ازيك يارب يكمل ليكي علي خير يا شيمو معلش كل تاخيره ف خير ان شاء الله يا جميل وترجعي لنا وانتي حامل كده باذن الله

ربنا يكرمك يا ماما ان شاء الله سبيها ع الله ومتفكريش ف كلام الدكتور بخصوص الوقت مش ف صالحك والكلام ده
لان انا كمان سمعته كثير قوي يا ماما ان الوقت مش ف صالحي وكلام كثير من النوع ده وبصراحة كنت بتبع الاول لم كنت بسمع الكلام ده لكن دلوقتي خلاص زي ما تقولي اتعودت ولا اية مبقتش افكر وسايبه كل حاجة ع ربنا سبحانة وتعالي وربنا كريم جدااااااااااااااا وهيكرمك ان شاء الله لان متفاءلة ليكي جداااااااااااااا بجد ادعي كثير يا ماما ومتفكريش ف الكلام