شاركي في النقاش

سجلي الدخول لإضافة تعليق.

التعليقات

2,000

  2. بندقة
    انتى كمان وحشتينى اووووووووووووى معلش حبيبتى ربنا هيعوض صبرك و تعبك خير ان شاء الله
    شيمو
    الحمد لله انك رجعت الشغل تانى و سيبك من اسئلة الناس و قولى يا رب و خلى املك كبير فى اللى جاى و متزعليش على اللى فات و ان شاء الله اللى جاى احسن و احلى قادر يا كريم
    خير زاد التقوى
    حمد لله على السلامة و ربنا يتقبل ان شاء الله عقبالى يا رب نفسى اووووى اعمل عمرة ربنا يكتبهالى يا رب
    دودو
    وحشانى اوووووووى اخبارك ايه و اخبار النونو ايه؟ ربنا يكملك على خير انتى و كل الحوامل يا رب
    توتا
    تسلمى يا قمر اخبار النونوهات ايه؟ ربنا معاكى و تفرحى بضمتهم يا رب
    ام حفصة
    ان شاء الله ربنا يكرمك بحفصة عن قريب يا رب انتى و انا و كل البنات اللهم اميييييييييين

    اخبارى الحمد لله خارجة من رمضان بشوية دعوات الحمد و الشكر لله ربنا يتقبل يا رب من كل الناس اللى كانت بتدعيلى يا رب
    و كل ما كان حد يدعيلى اردد و اقول اللهم اميييييييين و كل الموقنات برحمتك يا رب

    بصراحة انا كنت اعتبر مقيمة اقامة كاملة فى المسجد و الحمد لله المسجد جنب البيت و كنت الحمد لله مبسوطة اوووووى برمضان و زعلت اوى لما خلص مهما احكيلكوا عن الحاجات الكتير اللى كنت بعملها مع جيرانى البنانيت اللى لسه متجوزوش فى المنطقة و اللى انا كنت الكبير اوووووووووووووووى بتاعتهم هههههههههههههه
    بداية اليوم نروح المسجد الساعة 4 و نفضل لحد 5 نجمع من كل العمارات وجبات و تيجى اخت لينا معها عربية تاخدهم مناطق فقيرة جدا لدرجة انها ايديها اتكسرت فى يوم من كتر ما الناس بتهجم عليها علشان تأخد لقمة تأكلها !!!!!!!!!!!
    ارجع البيت و يأتى ميعاد الافطار افطر و اجرى على غسيل الاطباق لانها كانت مهمتى من اول رمضان و بعدين العشاء يأذن نروح الصلاة انا و ماما و معايا كولمن مياه الوحيد اللى كان فى مصلى النساء!!!!!!!!!و شوفوا انتوا يعنى ايه كوباية مياه و دعوة حلوة و كنت بلف بيه على الناس كلها مش حاطة كده و الحمد لله الناس كانوا يشربوا و يقولوا لى عقبال شربات فرحك ههههههههه اقولهم انا متجوزة يقولولى مش معقول انتى صغنونة اووى اضحك يقولولى معاكى اولاد !!!!!!!!! فى الاول كنت بتصدم من السؤال و بعدين كل الناس عرفتنى و لما الف بالكولمن يقولولى عقبال مغاتك هههههههههه شوفتوا بقه ربنا كان بيحبنى ازاى و شيلى الخير ازاى الحمد لله
    بعد الصلاة درس كل يوم ثم قراءة قران و بعدين معرض صغير اختكم عملته و الحمد لله جاب ربح عظيم و جبت لعب العيد و حلويات و حاجات حلوة اوووووى للمسجد
    النصف الاخير من رمضان بدا التهجد و الحمد لله
    الى جانب كل يوم اروح اصلى الفجر و نعمل مقراة للقران و نقول الاذكار و نصلى الشروق و اروح البيت الساعة 6 صباحا
    الى جانب قراءة قران مع نفسى فى البيت كل يوم
    اللهم بلغنا رمضان اعوام و اعوام اللهم اميييييييييييييين

    انا بحكيلكوا ليه؟ علشان بجد انا كنت مبسوطة اووووى و لو كان معايا طفل عمرى ما كنت هاقدر اعمل اللى عملته ده كله
    انا حتى ما كنتش بكلم جوزى الا قليل جدا
    بجد يا بنات قولوا يا رب و سيبوا موضوع الحمل ده للقادر الوهاب
    انا اسفة لو كنت طولت عليكوا بس علشان تعرفوا انا كنت فين فى رمضان كنت مع شهر الخير و الحب و الشكر و المغفرة ربنا يتقبل منا جميعا يا رب

  3. قصة للتفاؤل

    اخواتى فى الله كتير مش بنحس بقيمه الشىء غير لما بنتحرم منه او ربنا يختبر صبرنا على بعدها لحد ما يأذن بالفرج علينا ودايما بنظن ان الفرج دا بعيييييد وهو قريب جدا مننا




    انهارده قررت احكى حكايه عدت عليا يمكن حد يقراها وتكون له عبره وايه من ايات الله التى لا تنقطع


    انا اتجوزت من 5 سنين عن قصه حب جميله جدا وربنا رزقنى باحلى زوج فى الدنيا عقبال كل البنات يارب والشىء الطبيعى بعد ما توجنا حبنا بالزواج ان تكتمل فرحتنا بالاولاد ومن هنا بدأنا بعد دخلتى بكام يوم جاتلى البيريود بالالام جامده جدا لدرجه انى مكنتش قادره استحملها وعدت الحمد لله بدأت احس الالم بشكل متواصل حتى بعدها واثناء وبعد العلاقه الزوجيه فالحقيقه جوزى قلق جدا وكلم امى وقالها اعمل ايه قالتله لسه هتسأل على الدكتور عدل انا كنت عايشه فى محافظه بعيده عن امى وفعلا قفل التليفون من هنا وقالى يلا قومى البسى ولبست ونزلت ورحت لاول دكتوره نسا فى حياتى وكشفت عليا وتنحت وقالتلى انتى متجوزه جديد قولتلها ايوه قالتلى واضح ان عندك التهابات جامده وقرحه ولازم نعمل كى حالا والا مش هتخلفى طول عمرك قولتلها حاضر وفعلا سخنت المكواه اه والله حاجه عامله زى المكواه كدا واديلووووووووو فجأه عينى نورت وكنت هصوت من الوجع ورجعت قولت امسكى نفسك هتفضحي الراجل

    خلصت الست مكواه وجت بقى على التطبيق اه والله التطبيق ادتنى علاج لنزول نسبه هرمون البرولاكتين مع انى مكنتش بشتكى من حاجه والله وقالتلى تعاليلى بعد اسبوعين اشوفك

    روحت البيت عادى بعدها بكام يوم لاقيت دم نازل عليا واكتشفت بعدها انى كنت حامل وهى عملت معايا الواجب ونزلته الحمد

    لله....واستمر الحال لحد بعد 3 شهور من جوازى ويريدلى ربنا ان بابا وماما يموتو ورا بعض حسيت ان ضهرى فااااااضى وانى مكشوفه وماليش سند وخصوصا بعد ما اهل جوزى بدأو يحطونى فى دماغهم وينغصو عليا عيشتى بحجه انى بتعالج وبرهق ابنهم ماديا نسيت الحمل ونسيت نفسى وعشت حزنى على امى وابويا كتير اوىوبعد ما الكلام زاد لدرجه ان حماتى جابت عرسه لجوزى وقالتله طلق واديلها حاجتها والتانيه موافقه تدخل على نفس العفش ودا كله وانا مع الله جاتلى حاله نفسيه وروحت لدكتور نفسانى واتعالجت لانى كنت بحس بخوف من اى حد بعد موت ابويا وامى كنت بخاف حتى من جوزى لو قرب منى فجأه واصرخ واشد شعرى واعيط زى العيال الصغيرين واتكلم بتهتها والحمد لله جوزى ودانى عند دكتور نفسانى وقالو دا من اثر الضغوط النفسيه عليها وكمان موت الاب والام بيعمل فراغ كبير فى حياة اى انسان

    وطلب منه الدكتور انه يشغلنى باى حاجه فا جوزى قرر انه يشغلنى بموضوع الحمل ودورنا على دكتور تانى وفعلا لاقيت دكتور فى اسكندريه وانا عايشه فى القاهره كت بسافرله كل اسبوع تقريبا عشان يشوفنى وطلب منى تحاليل وبعدها اكتشفت ان هرمون البرولاكتين عندى انخفض جدا وحصلى لغبطه فى كل الهرمونات يستحيل معاها الانجاب وبدأت الدوره متنزلش غير بالعلاج والدكتور طلب انه يشوفنا كل اسبوع

    كانت ايام صعبه اوى علينا ماديا لانه كان بيطلب يعمل اخذ عينه ما بعد الجماع بساعتين وانا فى بلد تانيه كنت بنضطر ناجر حجره فى فندق ليوم واحد ونروحله على طول والنتيجه يستحيل الحمل الان نسبه التهابات شديده جدا ووصلت لدرجه الصديد اللى كان بدوره بيقتل الحيوانات المنويه وبدء عندى اليأس والارهاق وخصوصا لان جوزى الحمل تقل عليه ومرتبه مبقاش بيكفينا اكل وشرب وسفر واقامه فى فندق قررت اسيب العلاج معاه مع انى كان بقالى 5 شهور مجرد علاج التهابات ومفيش منه نتيجه وغير بقى كلام ام جوزى لانه مكنش بيخبى اى حاجه عليها كانت بتحرق دمى باستمرار

    اهل جوزى بقى قررو التدخل بشكل رسمى ههههههه وبعتونى عند دكتور تبعهم عشان يقولهم انى مينفعش اخلف ويرتاح ضميرهم من ناحيتى المهم كشف عليا وقالى اطلعى على الميزان قالهم دى تخينه جدا ولازم تخس 17 كيلو فى 3 شهور وبعدين نبقى نشوف هنعمل ايه حماتى بقى زفتنى زى اى عروسه كل اللى يسألها ابنك خلف ولا لسه تقولو اصل مراته تخينه ومبتخلفش وفى الوقت دا بنت خال جوزى جابت تؤام وكان فى مناسبه جمعتنا ولاقيت حماتى بتقولها تعبتى يا (ر) مش كدا العيال حملهم صعب طيب روحى ارقصى واتبسطى وسيبى الولاد مع مرات ابنى اصلها كدا كدا ملهاش نفس ترقص وفى لحظه لمت عليا كل العيال اللى فى الفرح صعب عليا نفسى اوى وجوزى زعل من الموقف وخدنى ومشى من الفرح ويومها اخدت قرار انى اتابع علاجى واتقرب من ربنا اوى لعله يرزقنى بالذريه الصالحه وكنت حسنة الظن بالله جدا وروحت للكتور فعلا وخسيت وقتها فى شهر 7 كيلو والدكتور فرح بيا جدا وقالى ان شاء الله هنبدأ العلاج وكالعاده مفيش فرحه بتكمل الدكتور تعب وسافر برا يتعالج ...

    جت خالته اتعاطفت معايا جدا وقالتلى فى دكتور تانى تعالى معايا وانا اوديكى روحت فعلا وبدأت اشرحله مشوارى ومعايا دوسيه مليان تحاليل وسونار وكافة شىء الحقيقه كشف عليا وعملى سونار وبعدين قالى قومى جرى هاتلى عينه بول قولت حاضر

    لاقيت الممرضه مبتسمه اوى وبتقولى فى نونو فى بطنك معرفتش ارد كنت هموت من الفرحه واخدت عينه البول وجريت على مكتب الدكتور كان الدكتور وانا برا قال لجوزى لما تدخل هقولها خبر هترقصو من الفرحه
    ودخلت وراح الدكتور مطلع اختبار حمل وحطه فى العينه وهو فاتح بؤه كدا وشويه ولاقيته عمل كدا ورمى الشريط الاولانى وطلع واحد جديد وحطه فى العينه وفى الاخر قالى كان نفسى اقولك مبروك لانى شوفت كيس جنينى بس للاسف من غير جنين


    ياااااااااااااااااااااااااااااه على شكلى ساعتها

    خرجت من عنده وحلفت انى مدخلش عياده دكتور تااااااااانى وان ربنا مش كاتبلى الخلفه خلااااااص هعاند فى ايه وهعاند مييييييين جت خالته قالتلى فى دكتور تانى قولتلها بقولك ايه لا تانى ولا تالت مالى غير الله طبيب انا تعبت اوووووووى

    تعبت علاج وامل على الفاضى تعبت من كلام الناس ونظراتهم ليا تعبت يا ستى ومش هكمل

    وبصيت لجوزى وقولتله انا مبخلفش ربنا يراضيك مع واحده غيرى



    وروحت وعدى على الحال دا 3 شهور مجتليش فيهم الدوره خاااالص قولت حتى لو قعدت سنه مش هروح تانى لدكاتره

    جه جوزى واتحايل عليا قالى طيب دا اخر دكتور نطمن عليكى بس ونخليه يديلك ادويه تظبط الدوره وخلاص وافقت عشانه لانى نفسى اخلف منه اوى ونفسى ارفع راسه قصاد اهله اللى بدأو يعيروه هو كمان بيا

    وروحت للدكتور وكتبلى على منشطات وقالى خلال تلات شهور باذن الله هتكون حامل روحت اسال على العلاج لاقيت الشهر الواحد ب 1200 جنيه جوزى قالى ولا يهمك ان شا الله اشحتهم من كل واحد فى الشارع هجيبلك العلاج

    اتصرف فى فلوس علاج شهرين وفى كل مره مفيش حمل الحمد لله وجه فى التالت ربنا ما ارادش انه يتصرف فى فلوس

    وقولتله انا قولتلك خلااااااص مش نافع معايا علاج صعب عليا نفسى وقعدت مع ربنا فى قيام الليل وقعدت اعيط من كتر عياطى مش عارفه ادعى واتأخرت الدوره كالعاده وعده 10 ايام وكل يوم اصلى وادعى انها تيجى عشان ماخدش علاج تانى



    ونمت جاتلى رؤيه شوفت فيها سيدنا الحسين رضى الله عنه وارضاه وقومت مرتااااااحه وكأن حاجه فى ودنى بتقولى قومى اعملى تحليل حمل
    كان كل اللى فى بيتى يومها 2 جنيه جبت التحليل وعملته وقولت لا هخاف ادخل اشوف النتيجه لوحدى هستنى جوزى يشوفها معايا رجعت تانى قولت انتى فاكره نفسك حامل ولا ايه يعنى هتحرقى دمعه على الفاضى ادخلى يا اختى خديه وارميه فى الزباله وخلاص ودخلت وكنت ناويه ارميه من غير ما ابص فيه اصلا لانى كنت بعم من غير اراده ومعرفش لحد دلوقتى انا عملته ليه

    وفجأه وانا ببص فيه لاقيت خطين لونهم احمر قولت ياااااه على الاستهبال عملو الخطين لعدم الحمل والخط للحمل ماشى خلاص عرفنا انى مش حامل ورجعت بصيت على ورقه التحليل لاقيت ان خطين يعنى حامل

    ايه ده عنى انا كدا حاااااااامل ولا ايه يعنى فعلا فى بطنى طفل مسكت بطن وبقيت بلف زى المجنونه وارجع اقول لالالالالالالالالالا مستحيل انا مااخدتش علاااااااج الشهر دا ازااااااى اكيد فى حاجه غلط دخلت ارج التحليل زى الترمومتر قولت يمكن يرجع خط وااااااحد

    لالالالالا دا مصمم دانا حامل بجد طيب اكلم جوزى لا استنى لحد ما يرجع احسن اخاف ميصدقنيش ويصدقنى ازاى اذا كنت انا مش مصدقه حاجه خااااااااالص قعدت 3 ساعات ورا باب الشقه على الارض وفى ايدى التحليل وكل ثانيه ابص عليه وارجه لحد ما سمعت صوت المفتاح فى الباب ودخل جوزى وقال السلام عليكم وانا متنحه ومش برد قالى مالك فيكى حاجه فى حد زعلك وفجأه انفجرت فى العياط ورفعتله التحليل جوزى ازبهل قالى دا تحليل مين ؟؟؟ اوعى تقولى انتى ؟؟؟ بالله عليكى انتى ؟؟؟ تحليلك بجد ؟ وانا ولا برد قال الف حمد وشكر ليك يارب قالى قوووومى وشدنى جامد وقالى ادامى اتوضى وتعالى ورايا نصلى ركعتين شكر لله وخلصنا صلاة وانا وهو بنعيط اوى وفجأه مسك الموبايل وكلم امه قالها مراتى حااااااامل

    قالتله متتعشمش اوى كدا استنى كام يوم واعملها تحليل دم مش يمكن زى كل مره مفيش جنين قالها ان شاء الله هعملها وقفل حسيت بيه انه اتكبس واتحرق دمه قالى بصى احنا اتصدمنا كتير نعدى يومين ونروح نعملك تحليل دم ونشوف
    يومها اهله اتجمعو عند خالته كأنه ماتش الاهلى والزمالك وكله مستنى النتيجه انه مفيش طبعا وانا بعمل التحليل بسأل الدكتوره هو هيبان الحمل دلووقتى قالتلى يمكن لا ويمكن اه قولتلها بس بان فى التحليل المنزلى قالت مش شرط ممكن يكون بايظ اتكتمت وخليتها تاخد العينه ومشيت ورجعت على ميعاد الاستلام كل ما اقرب على المعمل رجلى تخبط فى بعضها واخاااااااااااف قولت لجوزى روح انت وانا هستنى هنا طلع استلم التحليل بس محدش قاله النتيجه افتكر ان نيجتف هى الحمل وبوسيتف هى ان مفيش حمل وهى العكس طبعا نزل وهو بيقولى طبعا انتى عارفه ان كل شىء بايد ربنا النتيجه بوسيتف قولتله وربنا بجد قالى اه انتى بتعيطى ليه والله انا مش زعلان قولتله بعيط عشان ربنا نصررررررررنى انا حااااامل بفضل الله وقدرته حااااااامل الحمد لله رزقنى الحمل بعد صبرى وضعفى ويتمى الحمد لله يارب

    راح طلب اهله وقالهم مراااااااتى حامل بفضل الله وكانت صدمه بالنسبه لهم وكمل الحمل الحمد لله وربنا رزقنى بشهد ببنتى عمرى ربنا يباركلى فيها ومن بعدها حملت فى ابنى من غير اى علاج بالعكس كان اسهل حمل وجالى ونور دنيتى ابنى روحى

    اوعو واحده فيكو تفتكر انها مش هيتحقق حلمها و لا تيأس من رحمة ربنا عز وجل لا والله ربنا جميل اوى وعظيم اوى بس لما بيحب عبد بيبتليه انى تكرهى ان ربنا عايز يسمع صوتك وانتى بتطلبى منه ؟؟

    ربنا كبير وقال ادعونى استجب لكم



    ربنا يرزق كل مشتاقه بالذريه الصالحه



  5. @mama1983_1

    ام حفصة القادمة
    عجزت ايه يابنتى بلاش دلع اجمدى شويه ده انتى الدكتوره بتاعتنا هو ليه اخر امتحان من 4 سنين انتى فى ايه دلوقتى ربنا يوفقك وتنححى يا احلى دكتورة
    انا الحمد لله خلصت كليه الطب من 4 سنين
    بكره ده امتحان التخصص للنساء والولاده
    ادعولي بقه يا بنات نفسي احس بالنجاح تعبت بجد يارب تفرجها عليا بالحمل والنجاح يارب

تابعي تجارب أخرى من هذا القسم.