تجمع الموقنات برحمة الله ( خبرات متبادلة حول مراكز تأخر الحمل في مصر ) ج 23

أم حفصة

الف سلامة عليكى من الهبوط وحاولى تقيسى الضغط عشان تظبطيه

وطالما تعبانة كده بلاش من السيدوفاج

بس لما تحسى نفسك كويسة خديه

انا كان التبويض عندى كويس بس الدكتور كان دايما ينصحنى بيه

شيمو

سيبك من جارتك دى واضح ان فى جاب كبيرة مابينها وبين الذوق والأخلاق

اولا لانها اتكلمت عليكى مع حد تانى وانتى مش موجودة يعنى اغتابتك

ثانيا لانها عشان تريح دماغها من شقاوة ولادها بتإذى بيهم جيرانها

ثالثا واضح انها فهمها بطئ جدا او بتحب تستعبط لانك بتقولى الادارة كاتبة ورقة تمنع لعب الاطفال

فإوعى تحتكى بالاشكال دى وتدخلى معاها فى اى نقاش من اى نوع

انتى على طول تنزلى للادارة وتطلبى منهم يكلموها مرة واتنين وتلاتة
بس بلاش تدخلى معاها فى حوار لان اللى زى دى صعب قوى تفهم انتى عاوزة تقوليلها ايه

انا يابنتى مرة كنت خارجة انا وجوزى بنتفسح ع البحر هنا فى المارينا كويس

وعشان دوشة الاطفال ولعبهم قولتله تعالى نقعد فى مكان فيه خضرة لان زى ما انتى عارفة الاماكن دى ممنوع لعب الكورة فيها وكنت ساعتها حامل فى الشهر الساس او السابع
وروحنا قعدنا وشوية وجم اطفال يلعبوا فى الاول ما اتكلمتش والكورة جت فيا وبصيت لهم كده بعتاب وقولتلهم كده؟ وضحكت لهم

وشوية لقيت ولدين منهم جايين عندى انا وجوزى وبيقولوله عمو امشوا من هنا احنا مش عارفين نلعب منكم

جوزى بصلهم كده واستغرب واتصدم من بجاحتهم وبعدين قاله ياحبيبى اولا لازم تقول من فضلك او بعد اذنك ثانيا ده مكان الناس تقعد فيه وممنوع لعب الكرة هنا المهم طبعا الولاد ماعجبهمش كلامه وبكل قلة ادب قاله خلاص ماتزعلش لو جبت الكورة فى مراتك .... والله انا مقدرتش امسك نفسى من الضحك لان الولد سنه مايتعداش 8 سنين تقريبا وقولتله يلا ياحبيبى العب بعيد
وفعلا اتعمدوا يجيبوا الكورة فيا مرة واتنين وتالت مرة اخدت منه الكورة وقولت له مش هتاخدها انده ماما خليها تيجى تاخدها عشان اشتكى لها من اسلوب ابنها

تخيلى بقى جاتنى 4 ستات هم مش مصريين سوريين على لبنانيين
تخيلى بقى 3 منهم قاموا فيا ازاى اقعد هنا والمكان زحمة وولادهم مش لاقيين مكان يلعبوا فيه تفهمى فيهم تكلميهم سبحان الله عقول من العصر الحجرى وراحت واحدة فيهم زى الشاطرة جابتو لنفسها وقالتلى واضح انك معندكيش ولاد وده اول حمل ليكى عشان كده لسة ماحستيش بحنية ناحية الاطفال وكانى مثلا ضربت العيال مع انى والله كل اللى عملتوا انى اخدت الكورة بعد ماجت فيا وهم قاصدين مرتين
وانتى ماتعرفيش اختك بوبا بقى لما بتقفل معاها
فى لحظة رديت وقولتلها الحمد لله انى ماجبتش عيال يكونوا مش متربيين زى عيالكم كده
انا الاول لومت على عيالكم واستغربت ازاى يتعاملوا مع الكبير كده بس فعلا البيت والتربية بتفرق اذا كانوا امهاتهم كده متوقع هم يكوونوا ايه ؟

وعينك ماتشوف الا النور ياقمر انا قولت كده ودول بدأوا بقى فى طريق تانى والمصريين ومش المصريين
بينى وبينك لقيت الموضوع سخف قوى وانى لو واصلت معاهم هتدنى فى الحوار لأقصى درجة وانتى عارفة بقى انا بنشن على كلام زى السم واطلقه زى الرصاص اول مالاقيتها بتقول مصريين الدم ضرب فى نافوخى وقولتلها المصريين اللى مش عاجبينك دول احسن ناس بيربوا عيالهم والحمد لله لا عندنا جنس تالت ولا بويات زى اللى عندكم واهه انتى شايفانى خارجة مع جوزى مش خارجة مع شلة حريم عشان اشيش واحشش فبدل ماتقولى مصريين ومش مصريين شوفوا حالكم الاول
وقولتلها انا غلطت انى طلبت انكم تيجوا تاخدوا الكورة انا هخلى الكورة معايا واطلب الامن بتاع المكان عشان نشوف ده مكان الناس تقعد فيه ولا يلعبوا فيه الكورة
راحوا لمين نفسهم وقالوا دول عيال وعاوزين يلعبوا ويروحو فين مافيش مكان معلش انتى الكبيرة روحى اقعدى فى مكان تانى
وجوزى الناصح يقولى خلاص حصل خير نروح ندور على مكان تانى قولتله والله ابدا مش هتحرك من هنا لان بصراحة كلمتها انى معنديش ولاد فمش عارفة انى ابقى حنينة وجعتنى جدا وحسيتها غبية فلازم بقى تتعاملى معاهم بغباوة
وتنحت ومارضيتش ااقوم من المكان

مع انها لو كانت اتكلمت بذوق وادب وقالت ان الولاد عاوزين يلعبوا فبعد اذنك انقلى مكان تانى ولا حاجة كنت همشى والموضوع ينتهى على كده

وزة

فكرتينى بمسلسل نور مريم

انتى بدأتى العياط ياحلوة لسة بدرى هتعيطى بجد لما يسهروكى ويخلوكى تتمنى النوم

الصفراع ادى جدا ياوزة انس كان عنده الصفرا

وعشان الصفرا تروح من عندهم يبقى لازم ترضعيهم رضاعة طبيعية طول الوقت وهتلاقيها بتخف شوية بشوية ان شاء الله