بنات مصر...بليز ساعدوني

مرسي اوي على معلوماتك بس اللي حابه اعرفه يعني هو ضروري الكتاب ينكتب
قبل الفرح باسبوع و لا عادي ممكن ينكتب فاي وقت قبل الفرح
و كمان اذا حفلة العرس كلها على العريس و لا العروسه تقدر تساهم فيها

شكرا على ردك و انا اضطريت احط الموضوع في المضيفه لاني قلت اكيد بنات مصر مخدوش بالهم من موضوعي
المهم انتي قلتي ان العروسه عليها تجهز فرش أوضة النوم و حاجات المطبخ بس معرفش اذا فحالتي اقدر اعمل كده أو لا لانه مش معقول اجيب من بلدي البطاطين و الملايات و الحلل و الحاجات دي هتبقى صعبه شوي
في كمان حاجه انا عاوزه اعرفها اذا العروسه لازم تعطي هدايا لاهل العريس يعني زي امه و اخواته و كمان اذا العريس مفروض يشتري للعروسه هدايا بالاضافه للشبكه لانه عندنا في المغرب العريس بيجيب للعروسه اثواب سهرة و عبايات و شنط و جزم و ملابس نوم و مكياج واشياء كثيره بالاضافه للشبكه اللي ممكن تكون دبلة الزواج بس او طقم او اسوره على حسب طاقة العريس و المهر كمان ضروري يدفعه
في عائلات بتحدد قيمة المهر و عائلات لا
فانا عاوزه اعرف عندكم فمصر كيف يتكون الامور دي
و كمان عاوزه اعرف اذا عندكم ليلة الحنه او لا ؟؟

الف مبروك وربنا يتمم لك على خير

بصي هو دينيا مستحب طبعا تكتبي الكتاب على طول علشان تبقي نفسيا مرتاحة لكن نصيحة اجلي الكتاب ان شاء الله حتى ليوم الفرح علشان تطمئني على الآخر، ومش ضروري اى حاجة علشان تعرفي كل حاجة بتكون بالاتفاق يعني انا مثلا كتبت كتابي مع الخطوبة لكن اخت زوجي كتبت في قاعة الفرح وربنا يتمم لك بخير ان شاء الله ، العروسة ما تعطي هدايا لأهل العريس الا اذا كان في مناسبة يعني عيد الأم، عيد ميلاد حد فرح وعاوزة تجامليهم يعني انما فرض لأ مش واجب ولا حاجة والعكس هو الصحيح ، العروسة عندنا هي اللي بتجيب اللبس بتاعها من كله وحاجة المطبخ والمفروشات كلها والأجهزة والموبيليا بتتقسم بالاتفاق بين العائلتين، العريس طبعا بيجيب الشبكة حسب مقدرته وحسب امكانيته وطلبك انتي يعني اما الماس او دهب ، اما المهر فلو هتجهزو سوا العريس مش بيدفع مهر لاما هو يدفع مهر وبعدين انتي اللي تجيبي كله منه وبرضه جنب المهر لازم يجيب الشبكة

وايوة عندنا ليلة حنة،

ميرسي على ردك و شكرا على كل المعلومات دي
الله يرزقك بالذريه الصالحه و ينولك اللي فبالك

السلام عليكم على فكرة تقريبا البنات قالولك كل حاجة بس انا حرد على اسئلتك انتى بالنسبة لليلة الحنة ايوة بنعملها فى مصر بنجيب مثلا ستوتة بتحنى العروسة واقاربها وبتعمل شو جميل وهيصة جميلة للعروسة واقاربها وصديقاتها ودى بتدفعها اهل العروسة

بالنسبة لشهر العسل بيكون دة بالاتفاق بين العريس والعروسة وحسب اجازة العريس من العمل وفية الاغنياء مثلا بيروحوا دول اوروبية وفية ناس عادية او متوسطة او اغنياء برضه بيروحوا شرم الشيخ او المناطق الساحلية

المهر زمان كان بيدفع حسب مقدرة العريس لكن دلوقتى بسبب الغلاء الفظيع ممكن العريس ميدفعش مهر لكن هما الاتنين بيجهزوا مع بعض وممكن العروسة تاخد مهر عالى وتقول انا حجهز
يعنى دة بالاتفاق بدون كسوف ولا احراج
الشبكة بتبقة دبلة دهب ودبله الماز وخاتم سوليتير وممكن تبقى كلها دهب برضه العروسه اللى بتشتريها حسب مقدرة العريس لكن ممكن مثلا يقول انا حشتريها ب20000 جنية ممكن والد العروسة لو مقتدر يكمل كهدية لبنته

حفلة الخطوبة على اهل العروسة وحفله الزفاف على العريس بس لو اهل العروسة لو عاوزين الفرح اكبر من قدرة العريس ممكن طبعا ودى بتحصل كتير ان اهل العروسة بتشارك مع العريس فى الفرح مفيهاش حاجة

بالنسبة للهدايا دى حسب الرغبة يعنى ممكن والد العروسة يهديها هدية دهب مثلا يوم الزفاف وممكن والدة العروسة لكن دى مش اساسية
لبس وشنط وعبايات العروسة كلها على العروسة هى اللى بتشترى جهازها
لكن طبعا فستان العروسة والطرحة والجزمه والكوافير على العريس
والبيجامة والروب والشبشب بتوع زواج العريس دول هدية من العروسة بتشتريهم قبل الفرح وتديهمله

عايزة تعرفى اية تانى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انا حتابع الصفحة علشان لو عايزة حاجة انا نسيت اقولها