يا بنات نحس بروحي بننفجر . بننجلتط.اني ومجموعة بنات نقوم بحملة وجمع تبرعات للجرحى من الثوار واعمال خيرية اخرى ربي يتقبل منا ويرزقنا الاجر والثواب ...مع اني لما نمشي للمستشفى نتعب نفسيا من الحالات اللي نشوف فيها من الجرحى والاصابات مع انهم نفسيتهم ما شاء الله ربي يشفيهم ويحفظهم يارب ..
المهم امس قالونا في احد المستشفيات عن عائلة مش من طرابلس وجدوهم الثوار في احد الطرق مصابين ضاربينهم الكتائب عموما مشينا بنشوفوهم ونواسوهم ونرفعولهم معنوياتهم مش ما يحسوش روحهم بروحهم ونسألهم علي احتياجاتهم تفاجات بانهم يكلموا فينا بمنتهى القسوة ومن راس خشمهم وقالونا اللي صار فينا منكم انتوا اللي ما تبوش معمر والثوار والناتو احني كنا عايشيين كويس و...و....و ورافضين اي مساعدة حاولنا نفهموهم بكافة الطرق من غير فايدة بصراحة استفزوني روحت للحوش خلاص اعصابي تعبانة معقولة بعد هدا كله ياناس اللي شفناه مش شوية غير شن دار هالطاغية 42سنة واحني للخلف في كل شيء في خلال فترة قصيرة من تحرير طرابلس بالله قداش مقبرة اكتشفوا وقداش بلي مدايره تحت الارض وما خفي كان اعظم ..ماعادش نقدر نتحمل حد يقولي كنا عايشين وعلاش اللي صار ...المفروض نقولوا علاش الثورة هدي ما صارتش من زماااااان
وسبحان الله شفت وحدة كنت نعرفها ونتكلموا في المناسبات في الاحداث لما عرفتني مع الثورة ما خلت ما قالتلي وقالتلي ما يشرفنيش نعرف جردان وقطعت علاقاتها بية وبصديقاتي لان كنا ضدها وبصراحة افتكينا منها تصدقووووووواا لقيتها مدايرة العلم ولما شافتني قعدت تكبر وتقولي الحمد لله افتكينا منه ديمة نقولك للطاغية نهاية جاك كلامي طول عمري ضده...اني قريب اغمى علية وما عرفتش شن نرد عليها من هول الصدمةلكن ما بيتش نكلمها لاني ما قدرتش ننسى اي حد دار حاجة في الاحداث وما خلى ما قال علينا وتعبنا نفسيتنا اكثر ما هي تعبان ويا ريته اعتدر وقال عرفت روحي غلطان وقتها نحطه علي راسي.. لكن نمادج ركبت الموجة وهي في الاخير مع الرابح وكانها ما دارتش شيء..ما نعرفش باش نوصفهم .
سامحوني حبيبات طولت عليكم لكن بنفضفض اعصابي تعبانة وحاسة روحي ما عادش فهمت شي اللي نعرفه اني نكرررررررره معمر واللي معاه وندعي ربي اني نشوفهم مقطعين طروف في اقرب وقت .. راجلي امس مسكين عفلقته وهو يهدي فية وقالي لازم توسعي بالك في الاخير قالي كان بتقعدي هكي قعمزي في الحوش وريحينا لا جمعيات لا شي كخخخ...
لا نزال بحاجة لدعواتكم لتحرير أرض المختار من الطاغي وأولاده
متابعة النقاش، صفحة 248