ام زوجي اللي كنت اسبها في كل مكان ، خلصتني من مصيبه ووقفت معي .... انا ندمانه وش الحل

اولا انا استعرت عضوية صديقتي بيلسان
لان في بنات يعرفون اشمي في المنتدى
اشكر بيلسان على مساعدتها

ساعدوني يااخواتي ابحكي لكم الموقف اللي صار معي

انا متزوجه وعندي 3 اولاد
وزوجي عنده اخوين واحد متزوج والصغير لسى على
وشك زواج وزوجي هو الاوسط
كنت ساكنه في شقه ببيت اهل زوجي
لكن طلعنا منها بعد سنه من زواجنا
بسبب اني ماكنت مرتاحه لام زوجي


الموقف اللي صار
اهل زوجي خاطبين بنت لولدهم الصغير والبنت هذي
تصير اخت زوج بنت عمي
الموضوع ومافيه ان بنت عمي مره تسولف معي تسألني عن الولد وش اخلاقه وكذا فانا قلت ماعليه زين مؤدب وذكرت من ضمن الكلام ان اخوانه كلهم يصلون بالمسجد الا هو يصلي بالبيت واحيانا مايصلي الصلاة بوقتها وهالمعلومه قالها لي زوجي من زمان وقلت لبنت عمي مدري يمكن تغير بس اخلاقه زينه
المشكله وين ان ام البنت المخطوبه فهمت الموضوع خطأ على بالها انه مايصلي ابد والظاهر انها سألت بعض الحريم وانتشرت السالفه
لين وصل الموضوع لأم زوجي اني انا قايله لهم ان الولد مايصلي

المشكله اني طوال السنوات اللي راحت وانا كنت اسولف عن ام زوجي
لكل قرايبنا وجيرانا وناس كثير انها حرمه شينه وتكرهني وتدور علي الزله وشغلااااااات كثير قلتها عنها لحريم كثييييييييييير مع ان ام زوجي ماتدري اني اتكلم من وراها
وكنت اقول هالكلام من واقع عيشتي معاهم بالبيت اول بس اللي خلاني اتأكد اني ظلمتها وكنت غلطانه بهالتفكير ان ام زوجي
انقذتني من مشكله كبيره ووقفت معي وقفه ماانساها ابددددد
ولو انها تكرهني كانت مسكت علي الزله وخلت ولدها يطلقني
تدرون وشلون وقفت معي؟؟؟
لما جاها الخبر اني انا قلت ان ولدهم مايصلي على طول ومن غير ماتكلمني راحت لاهل البنت اللي خاطبينها ودافعت عني وقالت زوجة ولدي مستحيل يطلع منها هالكلام لانها ماتكذب واكيد في غلط وقالت لبنت عمي شلون تتبلين ع بنت عمك بكلام لايمكن انها تقوله ودافعت عني حيييييييل قدامهم وتبين لاهل البنت انه في سوء فهم
وانا جد بعد هالموقف حسيت اني حقييييييييره
شلون طول الايام وانا اسبها عند الناس وهي تدافع عني
لو انها تكرهني كان بامكانها تمسك علي هالزله وتحرض زوجي علي لاني شوهت سمعة اخوه وحاولت اخرب زواجه بجد مالي عذرررر ابد

انا الحين ندمااااااانه وبكيت الف مره على كل كلمه قلتها بحقها مااسامح نفسي
ودي تساعدوني بحل كيف اصلح اخطائي وكلامي الشين عنها عند الناس
مستحيل اروح لكل الناس اللي تكلمت عندهم واقولهم كنت غلطانه وكذا
كيف اغير نظرة الناس هذول لها بعد ماشوهت سمعتها عندهم كيف اطالع فيها بعد كل اللي صار هل اروح واعترف لها اني اخطيت بحقها وتكلمت عليها واعتذر منها ولا وش اسوي ارجوكم وربي ضميري يعذبنيييييي بقووووووه