تجمع الموقنات برحمة الله ( خبرات متبادلة حول مراكز تأخر الحمل في مصر ) ج 24

على فكرة يامصمص سارة فى ردها عليكى كفت ووفت

لانى انا كنت النسخة التالتة منكم وفعلا فى ناس كتير كده

هى المشكلة ان فترة الحمل وبعد الولادة بيبقى الاحساس فيها عالى قوى واقل هفوة بتزعل

انا كمان دخلت فى مشاكل كتير بعد الولادة وزادت لما نزلنا مصر وكنت خلاص على اخرى لدرجة قولت لجوزى لو انت فاكر انى ممكن اصبر عليك عشان خاطر انس رابطنا دلوقتى تبقى بتحلم هههههه.

وسيبك يامصررية من حكاية شكلك دى يابنتى دى احلى فترة بتمرى بيها

اهم حاجة ماتحسسيش مامتك بحاجة عشان هى كمان فى غربة ومش لازم تحسسيها انها لخبطت حياتكم

جوزك دلوقتى بينه وبين نفسه لسة مش حاسس انه هيبقى اب

ومش هيحس بده الا لما يشيل البيبيهات ربنا يحفظهم ساعتها هتشوفى واحد تانى

ويمكن هو دلوقتى بيفكر ازاى هيبقى اب ويتحمل المسئولية وكمان يمكن قلقان عليكى عشان الولادة وكده ومش عاوز يبين لك عشان مايقلقكيش

توتا

حمدا لله على سلامة حبيبة وكويس انك اتطمنتى عليها

بوسيها بقى وبوسى يحيى

مشمشة

حاولى تدخلى لهدهد الحاجات اللى مش بتحبها فى وسط الاكل يمكن ترضى تاخدها وحاولى تغيرى فى نمط اكلها شوية
يعنى اكليها وانتو بتلعبو او خديها فى مكان برة البيت وحاولى تاكليها

ميزو فينك ياقمر مختفية ليه

يلا اقبلى الدعوة اللى جاتلك على الفيس بوك وادخلى معانا كل يوم بالليل

طمطم

بطلى هسهس بقى وارحمى نفسك

بكرة تعملى مثلى وتقولى ولا يوم من ايام زمان استنى بس واصبرى هانت كلها ايام وتبقى نونتك فى حضنك

صحيح

ماقولتيش قررتى تسميها ايه