هوم يا بنتي و الله مش قادرة اطبع جسمي كله مكسر من الفلو, بس رديت لحتى ما حدا يشوف كلامك و يفكر انه صحيح... ما تزعلي مني بس انتي خربشتي الدنيا بردك.
اول شي الاي بي بروفين صحيح انتي انفلاميتوري بس لما ترجمتيه و طلع معك مضاد للاتهاب مش معناها التهابات الرشح, نو هو عبارة عن انتي انفلاميتوري خالي من الستيرويدز بيستعملوه لاتهابات العضلات و العظام مثل لما يكون في آلالام للدورة او انجوري بالعضل او للاثوريتوس او لوجع الاسنان.. هاد الالتهاب اللي مقصود.
مش التهاب الحلق, التهاب الحلق شو بيحصل فيه؟؟؟ بيدخل فيروس للجسم, يبدأ الجسم بالدفاع عن طريق جهاز المناعة المتمركز بالحلق (او هيك شي و الله ماني فاكرة وين بالضبط) بيطلع جيش الكريات البيضاء يحارب الفيروس و قتالهم بينتج عنه التهاب الحلق, هلأ شو تعملي؟ و لا شي, خلي جسمك يقاوم بنفسه, لهيك ما بينصحوا استعمال ادوية الكحة لا لكبار و لا لصغار, و لا حتى ادوية الفلو مثل cold and flu هيك بيكون مكتوب عليهم, هدول مفعولهم زيرو ما بيعلموا شي, و هالكلام من 4 دكاترة مش دكتور واحد, 3 دكاترة اولادي و 1 دكتورتي و كنت سألتها لانه ما اعجبني جواب دكاترة اولادي و ايدت كلامهم بالضبط.
اذا في وجع, اعطي دواء اي بي بروفين او اسيتامينوفين, لكن ما في وجع, مش بحاجة للدواء, صدقيني, اذا ابنك مرتاح و ما في غير هالكحة متضايق منها (يعني بس بيبكي لما يسعل) معناها ما في الم غير الكحة, و هاي سبق وضحنا انه بتقدري تخففي منها باستعمال الهيوميدافير و شرب السوائل كالبابونج.
و بالنسبة للادفيل اللي بيعطوه لاولادك مع التطعيم, بيكون لانه بالتطعيم ممكن ترتفع درجة حرارة الطفل بيعطوكي الدواء لتخففي الحرارة فيه. (عاوزين اشرح شو التطعيم بيعمل؟؟؟)
هلأ عن خلط الدواء, ما كان القصد انه تعطيهم سوى بنفس الوقت (و لو انهم عملوها مع ابني بالمستشفى لما كان 6 شهور و حرارته 105 و شحطه), بس لما تكون حرارة الطفل اكثر من 102 ما في شي بينزل الحرارة غير انك تعطي اسيتامينوفين و اي بي بروفين مرة هيك و مرة هيك.. ابدأي بالاي بي بروفين و بتلاحظي انه مفعوله بدأ يروح بعد حوالي ساعتين او هيك شي بترتفع حرارة الطفل, هلأ ما فيكي ترجعي تعطي اي بي بروفين كمان مرة لا بتتعبي الطفل (بيأثر على الكبد و الكلاوي و تجلط الدم و كثرته بتزيد الازمه اذا كانت موجودة هاد غير عن انه بيخفف الحائط بالمعدة) لهيك بعد مرور 4 ساعات الى 6 ساعات اعطي اسيتامينوفين و هلم جرى.. و اذا الحرارة كانت موجودة قبل ما تقدري تعطيه دواء مرة ثانية استعملي كمادات ما في حل غير هيك... <<<<< و هالكلام ان حبيتي تتأكدي منه اسألي دكتور اطفالك و دكتورك و ايا دكتور, ارفعي التلفون اتصلي و قولي ابني معه (بعيد الشر) حرارة 102 شو اعمل بيقلك نفس اللي قلتلك اياه. بس خذي منه الجرعة المناسبة للطفل.
هلأ بنجي للكحة و بنشوف, هل مصاحب ليها حرارة؟؟ اذا لأ خلاص ان شاء الله يومين بالكثير و بتروح, الكحة تبدأ خفيفة, اعتبري مسارها كالجبل, تبدأ بخفيفة بالواد و بترتفع و بتسوأ و بتكون اقصى قوة و جفاف في القمة و بعد يوم بترجع تخف لتختفي.. يعني اعطي طفلك 3 ايام الى اسبوع بيرجع لمناعته.. (و اذا زوجك بيدخن ممنوع يدخن حوالين الطفل و ايا مكان بالبيت)
ايمتى تخافي؟ اذا الكحة دامت اكثر من اسبوع.. او بدأت الحرارة ترتفع عند الطفل.. هدول انذار انه في شي خطأ.. الحرارة بتكون دليل على برونكايتس او نيمونيا بعيد الشر و هدول بدهم مضاد حيوي.
و بذكركم اني مش دكتورة و كلامي من تجربتي و من شرح دكاترتنا و من تجربة اخواني مع اولادهم و لهيك بنصحكم قبل ما تحطوا ايا شي في افواه اولادكم اتصلوا بالدكتور و اسألوه اذا كان اوكي او شو بينصح بديل عنه حتى لو الساعة 3 الصبح, اذا كان ما راح يرد على التلفون ليه هو دكتور؟؟؟؟؟ (مرة دكتور ابني قعد معي على التلفون ساعتين من الساعة 3 الى 5 الفجر و ابني معه امساك و كان يشرح لي تمارين و حركات اعملها لتسهل بطنه الله لا يعيد هديك الليلة), فما تخافوا اتصلوا و لا يهمكم حدا.
اضافة: انا اسفة نسيت انه ولادكم اصغر من سنة, فرجعت اعدل, كلامي عن الحرارة بيكون للي اكبر من سنتين, البيبيات اذا اتعدت حرارتهم ال100 على طول خذوهم للدكتور او روحوا فيهم المستشفى لانه بسهولة بيحصل ليهم جفاف خصوصا انه بيبيات و ما راح يرضوا يشربوا شي لانه بيكونوا مركزين بالبكاء.
ولدي مريض وفي الغربة لا أدوية ساعدوني أرجوكم
متابعة النقاش، صفحة 4