السلام عليكم ورحمة الله
حبيباتي الحوائيات بعد مااكتشفت مكانكم حبيتكم من اول حرف قريته لكم ومالي احد اسولف معاه بحياتي الخاصة الا انتم فبلييييز لاتبخلون علي بالمشورة وخصوصا اللي حالها زيي يعني ساكنه مع اهل زوجها
انا متزوجة من فتره طويلة ولسه ربي مارزقني باطفال الله يرزقني ومن أمن المشكلة اني ساكنة فوق مركز المخابرات اوووبس قصدي فوق اهل زوجي قبل لااتزوج كنت مستحيل اتقبل فكرة اني اسكن مع اهل الزوج او حتى مع اهلي بس مدري اش اللي حصلي ووافقت تقل اني صماء بكماء ...
ام زوجي متوفية وساكنة مع اخوات زوجي وسلفاتي العزيزات :27: انا من يوم ماتزوجت وبيننا مشاكل كل اللي بيني وبينهم سلام الله والكفحلة ( يعني كيف الحال) وبس الين الحين مافي مشكله ..
مشكلتي اني مااحب احس اني متراقبة ابداااااا من يومي بنت مااحب المراقبة والاسئلة الكثير من وراي وهذي اتوقع طبيعة بشرية ,,
الى ان ربي رزقني باخت زوج هي ارمله قاعدتلي عالحبه تفتح باب الشقة 24 ساعه عشان تشوف وين رايحين ومن وين جايين ومتى خرجنا ومتى رجعنا :time: سهرانه اربع وعشرين ساعه مدري متى تنام ؟؟ّ!!!
الوضع ازمني وصرت اخفف من طلعاتي والله ويوم اطلع ادعي ربي وانا راجعه انها تكون مسكره الباب :44:
الين قبل فتره بسيطه زوجي زل بكلمة قدامي انها تسأل عن كل كبيرة وصغيره وقمت اسحب لسانه حبه حبه وصار يقولي انها تسأل هي اش فيها بطلت تدوام بالجامعه لاني سحبت ترم مااشوفها الصباح ولا الظهر ؟؟
انا اشوف انها متنت شوي عسى ماتكون حامل ؟؟
اليوم انتم رجعتوا متأخر رحتوا زواج والا تتمشون ؟؟
انا اليوم ماسمعت لها حس ولا صوت التلفزيون عسى ماتكون تعبانه ؟؟
هي اش فيها ماتطلع وتروح معي للجيران والافراح؟؟ << من حبي لك ياشيخه عشان اخاويك
هي انطوائية مع انها تعرفني من قبل لااتزوج اخوها اني اجتماعيه واحب الناس اللي يحبوني وارتاح لهم ..
ومن هذي الاسئلة اللي تتكرر على مسامعه وماتسأني لاني مااعطيها وجه مع انها احيانا تسأل بلفة بس مااجاوبها
انا تعبت معاها والله صرت اكره الطلعه من مراقبتها لي في الطالعه والنازلة
واليوم قلت لزوجي اني صابره الين تتحسن حالته المادية واطلع من البيت لاني مو مرتااااااحه بالعربي الفصيح بس ماجبت له طاري المراقبه لاني ماابيه يحس عشان لايوصل لها الكلام حتى لو بحسن نيه وعاد ياسلام تزيد علي , وزعل مني وحسسني كاني غلطت عليه وقالي انتي وافقتي من البداية عالوضع هذا :44:
مع انها والله ماتسوي كذا مع سلفاتي ودايما تجتمع معاهم وتحبهم وتجمعهم ونادر اذا قالت لي تعالي احنا مجتمعين تحت مو مهم ماابي جمعتهم بس تفكني من المراقبة الليليه والنهارية وتريح نفسها وتنخمد ..
مين يابنات اللي صار لها زيي ولقت حل وانفكت من غير ماتنقل من البيت الله يخليكم قولولي على حل يريحني والله يصبرني ...
شاركي في النقاش
سجلي الدخول لإضافة تعليق.
التعليقات
25- قبلتي بالبداية لأنك ما تدرين الوضع راح يكون كذا
زوجك لو تحسنت ظروفكم لازم ينقلك بيت لحالك
قولي له وافقت والحين الوضع تغير ابغى الاستقلالية
مافي بشر ما يحب يستقل
وكلامي مو قرآن يمكن يتغير او يتبدل في اي وقت
قولي له انك تحبينه ومرتاحة معاه بس تبغين سكن بروحك
مافي حل غير هذا
الله يعينك ويفرج عنك - الله يرزقها بالزوج الصالح وتفكك من تطفلها
هي بس تسال الحمد لله
غيرك يسال وينقد ولوبيدهم اخذو زمام الامور بيدهم وتحكمو بحيآتكم
يالله السلآمه بس ^^
وتذكري انها ارمله وكانت زوجه بيوم من الايام والنفس البشريه جبلت على طبيعة التطفل كيف عاد وهي لاشغله ولا مشغله
...
الله يوفقنا وياكم - والله ما اعرف بس رفع لعيونك ,,,,,,,
- عندنا وعندك خير ياقلبي
بس انا ماعندي خوات زوج عندي امة
**** يهديها و**** ولا الانتربول الدولي
تصدقي و**** حتى زبالتي تفتشها - هي حاسه بفراغ ليه ماتفترحين عليها تدرس في دار قران بتلهى عنك
مواضيع مشابهة
تابعي تجارب أخرى من هذا القسم.