الموضوع مغلق
( يدآ بيد لنعود للدراسه من جديد ) قد تكن نقطة التحـول<< معدل/ قديم
بسم الله الرحمن الرحيم
الحمدلله والصلآة والسلام على رسول الله محمد صلى الله عليه وسلم وعلى آله وصحبه أجمعين ..
السلآم عليكم ورحمة الله وبركآته ..
أمــآ بعد ,,
بتوفيق من الله جلّ في علاهـ أفتتحت أنـآ العضوهـ ( سأكون يومـآ مـآأريد )
هذا التجمّع النسآئي التشجيعي في تاريخ 26/1/1433
تحت عنـوآن ( يدآ بيد لنعود للدراسة من جديد )
راجية من الله عز وجل أن يكون هذا التجمع في مرضاته عز وجل ..
وأن يكن لنا لا علينـآ
لنبـــــــدأ وعلى بركة الله ..
قال الله سبحانه وتعالى
﴿شهد الله أنه لا إله إلا هو والملائكة وأولو العلم قائما بالقسط﴾
(آل عمران 3: 18)
وقال سبحانه ﴿يرفع الله الذين آمنوا منكم والذين أوتوا العلم درجات﴾
(المجادلة: 11)
وقال عز وجل ﴿قل هل يستوي الذين يعلمون والذين لا يعلمون﴾
هذآ كلام الله .. الله عز وجل عن العلم .. فهل نتقاعس بعد كلامه جلّ في علاه !!
وقال الرسول صلى الله عليه وسلم : ((
"من سلك طريقاً يلتمس فيه علماً سهّل له به طريقاً إلى الجنة". ))
عرفتي قد ايش اهمية العلــم ؟؟!!
اللي دارسه ومتعلمه نفس اللي ماتقرى و لاتكتب !!
طيّب ليش ماكملتي تعليمك ؟؟
ناقصك يد والا رجل ؟؟
إللي كملوا تعليمهم وجابوا الشهادات وش زودهم عنك ؟؟
أبي افهم جد وش زادوا عنك فيه ؟؟
عشان نساعد بعض ونحققه لك !!
اللي تزوجت وماكملت دراستها تعالي ابيك بكلمة راس ..
ليش سحبتي على الدراسه بعد الزواج ؟؟
حددي مشكلتك بالضبط
عشان نقدر نساعدك ونشوف لك حل عشان ترجعين لهاآ ؟؟
واللي قدر الله وانفصلت عن زوجهـآ ممكن سؤال ..
وش سبب تركك للدراسه ماعندك طموح؟؟
والا وين الخلل بالضبط ؟؟
طيب تركتيها بعد الزواج وبعد الانفصآل ماجاء ببالك إكمالها ؟
والا نظرة المجتمع الظالمه لك كسرت مجاديفك ؟؟
إلى متى الاستسلام والتسويف !!
ابي اجابه تشفي غليلي ؟؟
البنات إللي ببيوت أهاليهم وتركوا الدراسه ..
إنتم بالذات يبي لكم ملف تحقيق !!
وش عندك يوم تركتيها ؟؟
يعني عاجبك وضعك الآن ؟؟
نهارك وليلك واحد ؟؟
وانعزالك عن المجتمع المتعلم عاجبك؟؟
طيب تركتيها عطيني ثمره وحده من قرار تركك لهآآآ
..
ماعرفتوا قيمة العلم والدراسه والشهاده صدقوني
لو عرفتوا قيمتها فعلا ماخطرت ع بالكم لو مجرد تفكير انكم تتركونها ..
والاخوات اللي يقولون كبرنا خلاص ؟؟
ممكن كرت العائله شوي !!
بشوف عمرك هو 60 والا 70 بس !!
ساعتها معذورهـ والله
اخواتي الفاضلات ..
كل مشكله ولها حل وكل ألم وله أمل ولكل مجتهد نصيب ’’
الاسئله اللي فوق اذا جاوبتي عليها بكل قناعه وصدق .. اعتبري نفسك قطعتي نصف المشوار
لانك عرفتي وين المشكله والخلل وطالما عرفتي وين المشكله والخلل
نجي للخطوه الثانيه والاهم ..
الحلـــــــــول :
في كل حي مدرسه .. وفي كل منطقه جامعه
وش عذرك الحين ؟؟
ادري بتقولين بيت وعيال وزوج و .. الخ
مو مشكله حبيبتي ..
فيه شئ في وزارة التربيه والتعليم اسمه ( منــآزل )
إللي يعادل مسمّى ( انتساب ) في وزارة التعليم العالي
والمنازل تعني انك ماتداومين إلا قبل الاختبارت النهائيه باسبوعين فقط يعني ايام المراجعه علشان الملخصات والتحديد ومالى الى ذلك !!
يعني كل اللي بتدرسينه في سنه دراسيه كامله شهرين بالكثير !!
واللي خلصت تعليمها العام وجلست
ماقبلوك صح ؟؟
برضوا فيه حل ..
وزارة التعليم العالي وضعت شئ اسمه ( التعليم عن بعد )
نفس فكرة المنازل
تنزلك محاضراتك بعد ماتكملين اجراءات التسجيل والقبول على ايميلك وتتابعين المحاضرات كأنك في مقاعد القاعه الجامعيه
ولها رموز ماتتعدى 3000 الاف ريال في الترم !!
كثيره صح ؟؟
طيب الفلوس اللي تدفعينها في السوق كل شهر والمشاغل والزواجات اشوفك ماتكاثرتيها !!
بالعكس لو على كيفك دفعتي اضعاف الاضعاف
يعني لبسك ومكياجك وذهبك اهم من عقلك وتعليمك !!
بتقولين بيضحكون علي وعلى شكلي !!
مو مهم احفظي فلوسك بكره لااستلمتى الشهادهـ
بيقولون ماشاء الله عليها عرفت لنفسها مو حنا اللي ضيعناها في خرابيط ..
بتقولين كبيره ومامعي الا ابتدائي وماعاد يمديني
امس كنتي تلعبين في بيت اهلك ثم مع صديقاتك ثم تزوجتى ثم صرتي أم صح ؟؟
يآلله شفتي كيف مر العمر بسرعه ..
بكره بتقولين نفس الكلام اذا استلمت يمينك الشهادهـ وبذكرك ..
المشكله مو في الاعذار والظروف والماده المشكله فينا حنآ والله
والله لو بغينا لنجيبها بعد الله بس مابغينا ..
أتمنى من كل وحدهـ تكتب وش مؤهلها التعليمي
وايش طموحها ؟؟
وبأي مدينه ؟؟
علشان اللي ساكنات نفس المدينه يساعدونها بالمدارس والجامعات ؟؟
واتمنى ننزل روابط علشان الكل يستفيد
وانا متأكده وعلى يقين ان الكل له رغبه ملحه بإكمال التعليم بإذن الله ..
وماتدرين يمكن تكون لك ( نقطة تحول )
واهم شئ نحتسب ذلك لوجه الله عز وجل ..
يــدآ بيد لنحقق المستحيـــل بإذن الله ..
وأتمنى من المشرفات الفاضلات ان يدعن الموضوع هنا حيث يضم اكبر شريحه معنيه بالموضوع وأكون ممتنه لكم ..
العلم يرفع بيتاً لا عماد له
والجهال يهدم بيت العز والشرف
العلم يسمو بقوم ذروة الشرف
وصاحب العلم محفوظ من التلف
ياطالب العلم مهلاً لا تدنسه
بالموبقات فما للعلم من خلف
سأكون يومـآ مآأريد