محتاااارة ... أخوي والا ... زوجته؟؟؟!!

السلام عليكم ورحمة الله وبركاته


بنات أنا أخوي متزوج من 10 سنوات وعنده ولد 10 سنوات وبنت 9 سنوات وولد 6 شهور


من أول سنة من زواجهم بدأت المشاكل بينهم

وبدأت زوجته الشك والغيرة والوسوسة

وأخوي كان ساكت وصابر 8 سنوات !!

ما عرفنا منه إلا قبل سنتين
السالفة طويلة المهم باختصار أخوي قال يمكن فيها مس أو عين أو حسد

يقول غيرتها وشكوكها ووسوستها مو طبيعية
مرة كانوا على الطريق السريع بين مكة وجدة ويقول تخاصمنا في موضوع وهددته تفتح باب السيارة وترمي الولد


ومرة دخل أخوي البقالة وهي في السيارة وكانت خدامة الجيران في البقالة
قالت ايوا انت طلعت عشان تطالع في الخدامة وعاجبتك لأنها صغيرة !!


ومرة كنت عند وحدة من صديقاتي أنا وبنات عمي واتفقنا الروحة عليهم والرجعة علي
المهم دقيت على أخوي هذا وقلت له معايا بنات عمي أبغاك توصلهم بيتهم

المهم نزلنا لقيتها في السيارة << عرفت انه راح يجي ياخذني أنا وبنات عمي فجات وجابت عيالها عشان تسوي زحمة في السيارة

والسيارة كريسيدا وبنات عمي 4 وأنا الخامسة

وانزحمنا ورا وأنا منحرجة من بنات عمي

المهم وصلناهم البيت وثاني يوم جانا أخوي يقول لأمي إنها معصبة عشان أخذت بنات عمي وتقول مو كل ما طلعت أختك مكان دقت عليك وتشتغل سواق عندها وعند بنات عمك

ومرة صارت بينهم مشكلة وهددته تجرح نفسها بالسكين في يدها وتموت !!
بلاوي كثيييييييييييرة لليل


المهم أخوي قال هذي تصرفات مو طبيعية
المهم وداها للشيخ الين المدينة راح بها (احنا في مكة)

قالت للشيخ لا تتعب نفسك يا شيخ ما فيني شيء بس مزاجي كذا
المهم الشيخ قرا عليها قال ما فيها شيء

وداها لدكتور نفسي مقابلة وحدة وبعدين رفضت تروح قالت ماني مجنونة توديني لدكتور نفسي !!
المهم 8 سنوات وأخوي يدور حل .. والمشكلة كم مرة تزعل وتروح لأهلها


والحين هي مطلقة مرتين .. لو طلقها الثالثة خلاص
وكل مرة يرجعوا يتصالحوا لدرجة إنها قبل 6 شهور ولدت !!

قالت أمي خلاص أكيد الأمور تحسنت وزانت الحمد لله

لكن رجع اخوي يشتكي ومن سنتين واحنا ندور له زوجة ثانية

المشكلة يا بنات إن زوجته هذي والله أسلوبها معاك ولما تكلمك تحسيها أطيب خلق الله
طيبة مرة معاي ومع أمي وقالت لي أسرار كثير تخصها ودايم أزورها في شقتها ودايم تنزل لنا

وللحين أنا تزوجت وسكنت بالرياض ولا زالت تكلمني وتواصلني عكس حريم أخواني الباقين
ودايم أشوف رسايل منها تقول فينك ما نشوفك طمنيني عنك ... إلخ

يعني لو مو أخوي اللي كان يشكي منها ما كنت صدقت إن هالمشاكل تجي منها هي بالذات
والحين أخوي يبغاني أخطب له وحدة من صديقاتي ومصر مرة

لأن أمي رفضت تدور له لأنها مرتين راحت معاه لأهل البنتين ويشوفها ويوافق وبعدين يغير رأيه

وأمي قالت بنات الناس مو لعبة .. رح دور بنفسك
وجاني أنا الحين ويبغا أدور له من صديقاتي

وأنا محتارة والله لأني ماني قادرة أتغاضى عن معاملة زوجته معي ومع أمي

ما قد جاني منها شيء ابداً بالعكس

حتى لما تكلمني وتسولف معي لما أتذكر إن أخوي ناوي يتزوج أحس بتأنيب الضمير

أقصد بعدما كلمني بخصوص صديقتي

أحس بتأنيب الضمير بقوة لدرجة إن الموضوع ما يفارق تفكيري
راحمتها والله وأحس إني أرد المعروف بإساءة


خاصة إذا تزوج وعرفت إن زوجته الجديدة هي صديقتي ومن طرفي

ونسيت أقول لكم إن بنته متعلقة طبعا في أمها .. وأبوها إذا تزوج راح ياخذها

وأنا أحب هالبنت وكل ما شافتني قالت لي أحبك يا عمة وتسلم على يدي
أحبك لأنك تحبي ماما ودايما معاها << بس تحبني عشان كذا



أكيد لو تزوج أبوها .. أمها راح تحرشها ضدي وتخليها تكرهني

شوروا علي يا بنات الله يفرج همومكم


محتااااااااارة

42 تعليق 4,432 مشاهدة

شاركي في النقاش

سجلي الدخول لإضافة تعليق.

التعليقات

41
  1. @bh_alm_1

    حبيبتي نصيحه لوجهه الله ترى الاخوان بعض الاحيان نصابين
    انا اخوي جاء عند خواتي اللي اكبر مني وجلس يشكي لهم من زوجته وانه مو مرتاح معها ومن هالكلام
    وقالهم زوجوني دورولي حرمه ثانيه ابي ارتاح بحياتي قالوا خواتي خلاص ولايهمك بندورلك وبعدين تخيلي وش سوى راح لزوجته وقال خواتي يبون يزوجوني قلب السالفه على خواتي وصارت مشاكل وماعاد صار فيه تواصل بينا وبينها
    فنصيحه اختي دام الحرمه كويسه معاكم لاتدخلين نفسك بهالسالفه اكبردليل شوفي امك اخطبت له مرتين وينحاش ويخليهم نصيحه لك قوليله ان صديقتك رفضت اهم شي ابعدي عن المشاكل وبعدين انتي ماترضينها على نفسك كيف ترضينها على هالمسكينه
  2. @mo_lazm_asm_1

    نصيحه امشي في جنازه ولاتمشي في جوازه

    حبيبتي زوجة اخوك مبين عليها طيبه بس الغيره عاميتها

    فهمي اخوك انها لو ماتحبه ماسوت كذا

    صحيح ممكن مبالغه بتصرفاتها بس صدقيني مايسوي كذا الا اللي عليه ضغوط او مو واثق بشريك حياته

    حاولي تفهمينها من بعيد لبعيد ان ذي التصرفات راح تخليها تخسر بيتها

    وان الرجال مايهمه اذا زوجته تحبه او لا اذا حس انه مقيد او انها تلعب فيه

    وبالمقابل وصي اخوك عليها

    انا اوقات لما اعصب اقول كلام مثل كلامها اكثر من مره قلت ( بموت نفس عشان ارتاح )

    وانا عارفه ومتأكده انه يموت من الخوف والقلق اذا قلتها

    بس هذا الكلام كله نتيجه شي هم زرعوه بنفوسنا خلونا ماعاد نثق في اي شي حوالينا

    تكفين وقفي معاها وربي رحمتها
  3. @gmana_alharth

    شوفي صدقيني والله اخوك عنده تعامل سيئ منه
    وانت الحين متزوجة لو زوجك عنده شي رح تحسي
    صدقيني ماتعرفين اخوك كم مقصر أبدا لاتعطينه وجه
    وقوليله ابقى ع راس زوجتك وغير من تعاملك هي رح تغير
    تعاملها معك
    وانصحك وأمانه برقبتك قوليله ماحأخطبلك الا تجيب زوجتك
    وتقعدها قدامنا وكل واحد فيكم يقدم شكوته لان اصلا
    بالإسلام مايصح الواحد يسمع شكوى من طرف واحد
    لازم تسمعين منه ومنها
    واخوك ايش علمه بصديقتك؟ وحده من الاثنين اما انت
    عرضتي صديقتك اماااا شكوك زوجة اخوك باخوك مئة بالمية
    انه راعي نظرات ووو الى آخره

    انت ترضين زوجك يتزوج عليك او اخته تمشي بزواجه؟
    بالله عليك تخيلي الموقف
    وما اقول الا انت وضميرك
  4. @gmana_alharth

    وشوفي زوجة اخوك تشكيه قدامكم؟؟؟؟ والا ساتره عليه
    يا اختي اخوك ع عيني وراسي بس انظري للقضية
    بعين العدل

    كسرة خاطري والله مجنن فيها مو معقووووووول حرمة تشك بزوجها
    من لاشيئ
    اما لايحسن تصرف معها او شكوكها صح

تابعي تجارب أخرى من هذا القسم.