شاركي في النقاش

سجلي الدخول لإضافة تعليق.

التعليقات

88

  1. @dyrty_ana

    ولدك: انا لا احب الطفل الجديد


    ماهو ردك ( بس هو يحبك وراح يجيب لك هدية):



    ولدك: الحفله الي سويتي لي اياها كانت حفله سخيفه وماعجبتني ( وانتي مره تعبتي على الحفله حتى تخليها من احلى الحفلات):


    ماهو ردك ( خلاص مرة ثانيه مارح اسوي لك حفلة بدل لا تقول لماما شكرا):




    بنتك: انا مرره زعلانه .. تاخرت دقيقتين عن حصة الرياضه قامت المدرسه طردتني برى


    ماهو ردك ( مرة ثانيه كوني حريصه على ال*** عشان تصيرين احسن وحده ):
    صراحه بنتي تشكي احيان من المعلمة بس احاول ابرر للمعلمة مدري تصرفي صح او لا

    ومشكورة ام نواف على الموضوع الرائع

  2. @am_nof_onayf

    صاحبة الموضوع
    بنات مثل وضحت لكم بالبدايه الهدف من الموضوع هو التطبيق ..
    صحيح ابتديت بجزء نظري بس كنت ابغى تعرفون ليش اخترت هذا الهدف كبدايه اولى..
    لو حطيتي نفسك مكان الطفل ... كمثال
    طلب منك مديرك بالشغل انك تسوي شغله معينه وجا اخر الدوام وما سويتيها لانك كنتي مشغوله باشياء ثانيه .. صرخ عليك قدام الموظفين وانحرجتي جدا من الموقف ,,
    وجيتي تشتكين لاصحابك ..
    ردود الفعل ممكن تكون بكذا طريقه:
    انكار الشعور : ليش معصبه ما يستاهل الموضوع.. من جدك تعصبين على هذا السبب ما شفتي مشاكل الناس الثانيه ( هذا الرد دايم اشوفه هنا بالمنتدى) بصراحه ردت الفعل هذي تعصبني جدا وانا مو صاحبه الموضوع فما بالك صاحب الموضوع.. واحنا نستخدم هذا الاسلوب بعض الاحيان مع اطفالنا على اساس اننا نخفف عليهم..
    مثال طازج : اليوم بنتي جت من المدرسه معصبه وزعلانه لاني اخذتها من المدرسه قبل لا يجي دورها باللعبه,, انا جاوبتها ما يحتاج يا ماما تعصبين الموضوع ما يستاهل انا العب الحين معك... عصبت زياده وقامت تبكي
    الفلسفه: نجي لسالفتك انتي بعد ما تقولين لصاحبتك الموضوع تجي تقولك هذي الحياة كلها مشاكل مافيه شي على روتين واحد .. الحياة مو دايم تجي على مزاجك ومن هذا الكلام,, هذا الكلام ممكن يكون كويس بس مو وقت وانتي معصبه

    النصيحه: وهذا اكثر شي يعصب .. وانتي متحمسه بالسالفه تجي تقولك تدرين وش لمفروض تسوين روحي للمدير وتاسفي منه وسوي الشغل الي قالك عليه وخلاص..
    السوال: تجي صاحبتك تقولك وانتي بعد الله يهديك وشو الاشياء المهمه الي ما خليتك تسوين الشغل وهو قايلك انه يبغاها؟؟
    وهذا اعتقد الاسلوب الدايم الي نستخدمه مع الاطفال..
    الدفاع عن الشخص الثاني: تبين الصدق بعذره مديرك يعصب .. عنده مليون شغله وطلب منك شغله وحده وما سويتيها احمدي ربك انها جت على كذا وماطردك من الشغل
    واعتقد احنا نستخدم هذا الاسلوب كثيرا خصوصا للدفاع عن الاشخاص الكبار مثل الجده العمه المعلمه

  5. @am_nof_onayf

    صاحبة الموضوع
    لما يكون الشخص معصب سواء كبير او طفل مايبغون يسمعون حلول ولا فلسفه ولا اي شي ..
    مايحتاجه الانسان هو شخص يسمتع له ويحسن الانصات ..
    يعني الاسستماع فن مو بس تشغلين اذانك,,
    4 خطوات بسيطه تساعد اطفالنا ليتعاملوا مع مشاعرهم
    1_ استمعي لطفلك جيدا وبانصات
    2_ اعترفي بمشاعرهم استخدمي كلمات مثل ( اووه _ مممم_ ييالله _ صحيح) حتى تخليهم يسترسلوا بالحديث
    3_ اعطيهم اسم لمشاعرهم
    4_ حققي رغباتهم باستخدام الخيال
    ساوضح لكم ذلك باستخدام الامثله :

    \_ _ استمعي لطفلك جيدا وبانصات
    مثال
    وانتي جالسه تغسلين الصحون ومشغوله جا ولدك
    ولدك: محمد ضربني اليوم .. ماما تسمعيني
    انتي: ا اسمعك كمل وانتي جالسه تكملين تغسيل الصحون
    ولدك: رجعت ضربت محمد ورجع ضربني مره ثانيه .. ماما تسمعيني؟؟
    انتي: ايوه اسمع كل كلمه جالس تقولها ( وانتي مازلتي تغسلين الصحون)
    ولدك: لا موجالسه تسمعين
    انتي: انا اقدر اسمع واغسل الصحون بنفس الوقت كمل كلامك يالله
    ولدك: خلاص انسي الموضوع ويروح زعلان
    من الصعب انك تتكلم مع شخص مو جالس يناظرك وجالس يتكلم معك وهو مشغول

    التصرف الصحيح:
    ولدك: محمد ضربني اليوم .. ماما تسمعيني
    انتي: تتركين شغلك الي بالمطبخ وتلتفتين على ولدك
    ولدك: رجعت ضربت محمد ورجع ضربني مره ثانيه
    انتي: مستمعه بانصات ومتفاعله مع الموقف
    ولدك: تدرين وشو.. خلاص بلعب مع فهد من اليوم ورايح .. هو مايحب الضرب ولا يضرب احد
    من السهل انك تقول مشكلتك لاب او ام تستمع لك بانصات.. مايحتاج تقولين ولا كلمه اهم شي تكونين متحمسه مع الموضوع ومشاعرك تبين ذلك لان الاطفال اذكياء ويعرفون التصنع

تابعي تجارب أخرى من هذا القسم.