@زواج المسيار هل ترضين ان تكوني زوجة مسيار ؟؟دعوة للنقاش @

اليوم حبيباتي خواتي الغاليين بكتب لكم موضوعي بس بقولكم شي قبل ماتقرونه اي وحدة فيكم مايعجبها موضوعي او ما عرفت وش الغاية منه
اتمنى واتمنى ان لا تنفعلوا بالردود ولا تتهجموا علي طيب اتفقنا اتفقنا اجل بدخل بالموضوع
كلكم عارفين يابنات ان الزواج احسن للبنت وسترة لها من هالزمن الغدار ودايما تسمعون من اهاليكم لاجو يدعون لكم اغلبهم اذا ماكانوا كلهم
يقولون يالله ترزق بنيتنا بابن الحلال اللي يسعدها ويريح بالها خاصة من جانب الامهات والجدات اوكيه
وكما هو معروف ان الزواج عندنا مايكون زواج الا بالاشهار وكل وحدة فيكم تتمنى انها تتزوج وكل الناس اللي حوليها عارفين انها ماخذه فلان
طيب ماتلاحظون في هالسنين الاخيرة بالذات او بالاحرى السنتين الاخيرة ذول زاد مايسمى بزواج المسيار بالله عليكم يامن تقرون ماخطته اناملي
هل تعتبرون هذا زواج يابنات اسألكم بالله يابنات وياخواتي وياحريم وياامة لااله الا الله ان مايسمى بزواج المسيار ز واج يعطي كافة الحقوق الشرعية للمرأة بالذات انا بعد سامعة عن زواج الفرند اللي مااتعمقت ولا حاولت اقرا فيه ياليت اي وحدة عندها معرفة بهالزواج ياريت تكتبه بعد من ضمن موضوعي هذا لاني حاسة انه يشبه المسيار
المهم نرجع لصلب موضوع زواج المسيار اول شي كل وحدة تفكر باسمه وتدقق بمعناه اسمه مسيار يعني ماغير الرجال لااشتهى جاء يسير وياخذ اللي يبيه وخلاص ورمى الحرمة ورا ظهره يعني ينساها ولما يفتكرها يرجع لها بالله عليكم فيه وحدة فيكم ترضى بهالزواج ترضى ان ماتكون غير زوجة خلونا نقولها على بلاطة (لشهوة الرجال بس) لا ينفق عليهاو لا سكن خاص فيها وبعد واللي هو الغاية الاساسية من الزواج وهو الانجاب يمنعها منه اليس هذا ظلم واجحاف بحق المرأة وبالاساس ليش ماصار الا بزمنا هذا ليش ماكان على ايام الرسول صلى الله عليه وسلم
مادام هو حلال
يابنات لو وحدة معترضة الحين من كتابتي لهالموضوع اتحداها تعطينا قصة وحدة ان هالزواج صار على ايام الرسول والصحابة انا اجزم لكم انه
ماكان موجود
والسؤال اللي يقهر بالفعل اهل البنت كيف يرضون ان بنتهم تتزوج زواج زي هذا مو لو كانت عانس كان احسن لها ادري بتقولون فيه كثير بنات ظروفهم ماتسمح لهم انهم يخرجون من بيت اهاليهم وعشان كذا يقبلوا يتزوجوا مسيار لفرض ان عندها بالبيت ام او اب كبار بالسن او عاجزين او تكون هي المعيلة الوحيدة لهم ومالهم باالدنيا احد غيرها انا اتفق معاها بهالشي بس خلاص توافق تتزوج علنا وتقعد بالبيت مع اهلها او حتى تكون الثانية او الثالثة او حتى الرابعة مافيه اشكال بس لازم تفكر الوحدة قبل ماتقدم على هالزواج المسيار ذا وهو لو توفى الرجال اللي كان يسير عليها لاني بصراحة احس كلمة زوجها مايستحقها لان الزواج مشاركة احساس ود ورحمة وطبعا زوج المسيار ماعنده ولا صفة من هالصفات وعنده مال وفير كيف بالله عليكم ترثه هاه تروح تطق الباب على مرته وعيالة وتقولهم انا حرمة ابوكم كان ماخذني مسيار وعارفين وش بصير بعدين من سوء الفهم بين اولاد الزوج وهي
اختي الغالية هل ترضين ان تكونين انتي بهالموقف او ترضيه لاختك المسلمة يالله موقف صعب ماتحسد عليه ابدا ابدا
لحظة شوي باقي محور ماناقشته وهو قول كثير من العلماء والكتاب طبعا اللي مؤيدين هالزواج (اكيد مايمدح السوق الا من ربح فيه ) انه احسن خيار للارملة والمطلقة اللي ماتقدر تترك اولادها بقول نفس كلامي اللي فوق ياخذها علنا ولا على ضرة
تبون الصراحة اي رجال احسه يقبل ان يتزوج مسيار احس انه فعلا انسان ضعيف وجبان مايقدر يواجهه صح ولا لا
واحب اقول ان هالزواج يسئ له قبل مايسئ للبنية المسكينة ويضعف من شخصيته قدام نفسه اولا وبعدين قدام المرأة اللي مااخذها مسيار
ولا تعالوا شوفوا كيف يجي البيت عندها يجي اخر الليل متلطم وبهدوء عشان ماحد يشوفه ويدخل البيت عندها يااخوي دام انت مقتنع انه زو اج ليش تروح عندها كانك حرامي ولا خايف من شي (طبعا هذا موجه للرجال)
واحب ان اضيف اخر شي يامن قرأتن الموضوع حقي اللي نصه بالعامي ونصه باللغة الفصحى ان شاء الله تكونون فهمتوا شي واذا مافهمتوا احسن اللي عندها قصة او تجربة ياريت تحكيها وتكتبها لنا
وتراني يابنات اسمح بالمناقشة بينكم يعني عادي تناقشوا بموضوعي وردوا على بعض ماعندي اي اشكاليه ومو لازم تلاقون رد مني لان هذا اللي كتبته وماعندي غيره
تشاااااااااااااااااااااو
:26:

40 تعليق 6,056 مشاهدة

شاركي في النقاش

سجلي الدخول لإضافة تعليق.

التعليقات

35
  1. @ynboaa_alaasl

    بصراحة هذا الزواج غير مجدي ولاارضي به لنفسي ولالغيري
    ولكن هناك من يقول تتزوج مسيار وتستر نفسها وتكون عند اهلها بس احس انه زواج :arb: :) متعة فقط
    مافي شروط الزواج اللي تتمناه كل بنت بيت وزوج واطفال واسرة في النور بين الناس وليس العكس

    ولكن اقول الله لايبلانا اللهم استرنا فوق الارض وتحت الارض
  2. @s_3_o_d_y_a_h

    مره سئلت الوالد الله يخليه ويحفظه لنا قلتله اش رايك في زواج المسيار ؟
    قال لي هذا يابنتي اخو الزنا .. المقصد انه زواج للمتعه فقط
    وياما سمعنا من اللي جربوه انه زواج للراحه الجسديه بس وغير كذا لااااااااااا
    بس اللي محيرني العلماء عندنا كيف أجازوه ؟؟
  3. @aatrsallyl

    صاحبة الموضوع
    مشكورات اخواتي ينبوع العسل
    كوب قهوة
    اكسبريسو اما بخصوص تساؤلاك اختي فعلا كيف اجازوه العلماء ياريت احد يعطينا ولو دليل واحد عن اسباب ظهورة
    تسلمون ع المرور ويالله وين الباقييييييييين ولا مو عاجبهم الموضو ع :)
  4. والله صراحه ان احس انه مو زواج استغفر الله
    وانا ما ارضى لنفسي انها تنهان وتنذل لهدرجه واحس البنت اللي تقبل بهالشيء
    لنفسها ما عندها كرامه لان صراحه لا تكون لها حقوق ولا شي وتكونمجرد للمتعه
    واحنا كلنا عارفين ان الزواج تكون هناك حقوق وواجبات متبادله بين الزوجين
    وانا من معارضين لهالزواج
    ما قصرتي حبوبه على الموضوع الحلوو
    سلام

تابعي تجارب أخرى من هذا القسم.