بقولكم طريقة اتسهل عليكم مع هالإعلانات اللي انجمعها
وحزة الحزة مانلقاها :hahaha:
اتجيبن كذا ملف
واتصنفين كل شي بمكان بروح
أو بمكان واحد
مثلا المطاعم والعصير والتمر والقهوة
فواكة حلويات ووو من إلى
كل شي خاص بالأكل حطية بملف بالمطبخ

فرضا جاج ضيوف فجأة مايمدي اتدورين بين هالمجلات
فيكون الملف هو المنقذ بهاللحظة
لأنة أغلب الإعلانات مايصير لنا خلق انسجلها بالتلفون أو نحتفظ فيها
ومثله محلات الهدايا العطور الملابس الصالونات عبايات خياطات
هذي بملف بالغرفة
والحلو بمحلات الهدايا إنها تسعفج لو بتهدين وحدة وماعندج وقت تروحين السوق
أو وحدة دشت بيتج وحابة اتقدمين لها شي هالمواقف اتصير دايم
ومثلة اعلانات الأثاث والصيانة بملف
والعيادات والصيدليات بعضها اتوصل مع معاهد ونوادي للعيال هذي بملف
والصيدليات موشرط بس للأدوية خبركم سوالف التجميل والتقشير كلها عندهم وطبية أكيد:o
كل شي كل شي وكل وحدة ومودها
أجبان
آيسكريم فواكة العاب لحوم سوالف التوصيل كلها سواء للبيت والأ للعيال
بدال لااتكدس المجلات بالأدراج وتاخذ مكان من كل مكان :04:
كل يوم تاخذين لج مجموعة وقصصيها ع السريع
وعموما ورق الجرايد مرات يكون مرتع لبيوض الحشرات مثل الصرارير الله يبعدها عنا وعنكم
فالأفضل تاخذين منها الجزء اللي تبينه وخلاص لاتقعدينها بالبيت ولاتستعملينها للأدراج
لأن أي زيت أو رطوبة تحوشها بيخليها بيئة لهالحشرات
وفيه مناطق توصلها هالمجلات يوميا مع الجريدة أو بروحها ففرصة تحتفظين بكل جديد
واتضيفينة لهالملفات
ودمتوا بكل خير
انتهى
حبايبي كرما لاأمرا إدعوا لي بالفرج

