شاركي في النقاش

سجلي الدخول لإضافة تعليق.

التعليقات

194
  1. @alnsohh

    السلام عليكم ورحمة الله..

    اختي كان الله في عونك وعون اطفالك..

    ومدام انك لسه على البر انا بقولك اللي عندي وانتي لك حرية القرار..

    اتكلم عن واقع تجربه لأختي الصغيرة وكان وقتها عمرها 20 سنة يوم تزوجت وحملت وفترة الحمل توحمت على زوجها وتطلقت بعد ولادة الطفل مباشرة يعني ولدها فتح عيونه على اهلي.

    ابو الولد ماكان يجي يزوره ولايشوفه الين صار عمر الولد7 شهور اضطر ابوي يدق عليه ويقوله لازم تجي تشوف الولد علشان يعرف انك انت ابوه .

    وصار يجي ياخذ ولده في الشهر مره او مرتين بالكثير ياخذه لمدة 4 او 5 ساعات بالكثير ويرجعه.المهم ابو الولد تزوج وجاه ولد وبنت ولدنا يحبهم ولكن مستحيل ينام عندهم. الين هنا مافيه اي مشكله لأن ولد اختي لقى كل الحنان والرعايه من اخواني واخواتي وامي وابوي اللي هم جدانه .

    المشكله صارت قبل سنتين بعد ماأختي تزوجت واحد متزوج وعنده 4 اطفال اكبرهم 12 سنه واصغرهم 5 سنوات وخلال هالفترة اختي جابت بنت من زوجها الثاني..

    وبصراحه ولدها ضااااااااع كلمة ضاع شوي عليه من جد هو الضحيه باللي صار كله ، وزبدة كلامي انك لاتخطين اي خطوه الا لما تدرسين الموضوع زين وتتفاهمين مع زوجك وتحطين له الشروط اللي تريحك من هالحين .
    وتخلين اهلك يكلمون طليقك ويتفاهمون على وضع الأولاد قبل لاتتزوجين.

    ومع ان اختي يوم تتطلق كانت صغيرة الا انها تقول ياليتني جلست اربي ولدي ازين لي. لأن ولدها مره حساس ويحاسبها على كل كلمة او تصرف او حتى نظره وهذا هو لسه صغير عمره 5 سنوات بس..

    عزيزتي انا والله ماأخوفك بس لاتظلمين نفسك وأولادك ادرسي الموضوع من كل جوانبه وانا من رأيي تحاولين مع زوجك ان الأولاد يكونون عندك ولو ماحصل لازم تتركين لهم غرفة في بيتك وتأثثينها كامل بحيث لو جاو عندك مايحسون انهم غرباء في بيتك وان لهم مكان يحضنهم وينامون فيه.
    اتمنى ان الفكره وضحت ولاتنسين تستخيرين قبل كل شي ترى انتي لسه عالبر.
  2. @alraghb_fy_alkhyr

    بصراحة قطعتي قلبي
    بس لازم تفكرين في أتجاهين مرة لك ومرة لأولادك وكان لازم عليك تشترطين أولادك على زوجك اللي يقول هالكلام وأنتم لسه عرايس ما يندرى عنه وش يقول بعدين
    وأولادك في ذمتك وأنت المحاسبه عنهم
    لكن مازال في الأمر سعة قبل الزواج وفري لأولادك غرفة مؤثثه من جميع النواحي وألعاب تعليمية هادفه وانتبهي مايعرض لهم في منزل والديك إذا موجود عندهم دش كلميهم باستمرار ولكن بدون ما يكون زوجك موجود وفري حاجاتهم أول بأول مولازم زوجك يوديك للسوق علشان تشتري لهم أخاف يبدأ يتضايق منهم وهم ما بعد صارو عنده
    خلي أبوهم يأخذهم مرة بالأسبوع يوسع صدورهم ويتقرب لهم ما أنصحك يروحون عند أبوهم راح تتعب نفسيتهم ومن كلامك أن والدينك الله يحفظهم ما قصروا معهم
    أنتي خليهم يجون عندك مرة بالأسبوع وحاولي يكون هاليوم زوجك غير موجود بالبيت حتى يفرحون فيك وتفرحين فيهم ولاتبدين تتذكرينهم دايم عنده علشان مايكرهم لكن حسسيه أنك أم وحنونه عليهم
    تقربي لزوجك وأهله بالذات وأكرميهم ليكرمك ويكرم أولادك
    نصيحة لايعرفون يكلمون عليك لآن الأطفال فاضيين وتلقينهم كل شوي داقين عليك لأتفه سبب
    أنتبهي تضيع تربية أولادك وذلك بتدليلك لهم لأجل تعويضهم عن بعدك تعاملي مع أولادك كما تكونين معهم
    وأخيرا أحب أن أؤيد كلام أختي أم الخمائل في جميع نقاطها بارك الله فيها
    ولايضيق صدرك وأعرف لك وحدة متزوجة وتاركة ولدها عند أختها والولد طلع من حفظة القران ولابعد يحب أمه وبار فيها وهو ماعاش عندها
    والثانية تزوجت وتركت ولدها عند أهلها وسكنت في مدينه ثانية والولد ماشاءالله تربيته حلوة لأن أهلها محافظين وملتزمين
    أجعلي أولادك يتربون في مكان يخلو منه مايغضب الله ومن تركشيئا لله عوضه الله خيرا منه
    بارك الله لك وبارك عليك وجمع بينكما بخير
  3. المشاركة المقتبسة غير متاحة.






    مرحبا أختي.. أول شي ربي يوفقج وينولج اللي فيه خير لج..

    وضعج ذكرني بنفسي قبل سنه ونص.. كنت أمر بنفس التجربه
    وصدقيني وضعي كان بعد أصعب من وضعج.. لأنه أنا وأبو عيالي
    كان بينا مشاكل لا توصف وكنت قبل أقول مستحيل أفكر اتزوج لأني
    بدون زواج كان معيشني في جحيم بالرغم من أني منفصله عنه!!

    بكتب لج تجربتي بس بعد ما أعطيج بعض الأمور اللي اتبعتها ما ودي
    ابدا انا شو كان وضعي بالضبط وكيف تصرفت عشان ما تقولين اوه
    هي قدرت تسوي هالشي انا ما اقدر, تذكري انه وضعي كان أصعب
    وبالرغم من ذلك كل أموري بتوفيق من رب العباد مشت على أحسن
    مايكون.


    1- تذكري انج صليتي الاستخارة وربج أرحم منج ومن الظروف على وضعج


    كأم، ولو كان في هالزواج شر لج أو لعيالج ما كان كتبه لج. وليطمئن قلبج
    عيدي صلاتج مره ومرتين وثلاث وأكثري وتذللي في الدعاء له سبحانه
    وكرري ربي نور لي بصيرتي ..!!



    (هذا كان تصرفي من أول ما انخطبت وسبحانه ما ردني)

    2-ابعدي كل المشاعر السلبية عنج وتذكري عمرج ما بتقدرين تخططين تخطيط



    سليم لمستقبلج مع زوجج وعيالج إذا كنتي حزينه او متضايقة، لأنج بتظلين حاسه
    بأنج ضايعه ولا عارفه تقدمين على أي تصرف.




    (كنت أقول انا ماني ناقصة انا بدون زواج يالله قادره اخلي عيالي يعيشون عندي
    لأنه ابوهم كان يهدد بدون أي شي انه ياخذهم، وكنت متأكده وماعندي شك اني
    لو تزوجت أنه بياخذهم، لكن كان عندي يقين انه ربي اقوى وأرحم)

    3-حسسي عيالج انه هالزواج لهم قبل لا يكون لج، قوليلهم شرايكم اتزوج؟ بيصير عندنا



    بيت وبسويلكم غرفه بحط لكم فيها كذا وكذا، حسسيهم انه لهم دور كبير في هالزواج وأنهم
    أحد أسبابه، وأنه هالزواج عشان انتي وياهم يكون لكم منفعه حسب احتياجات عيالج ادخليلهم
    من الجانب اللي يحبونه.




    (أول ما انخطبت شاورت عيالي قلتلهم شرايكم؟ بيكون عندنا بيت وبيكون عندكم غرف وبسويلكم
    فيها كذا وكذا، وبيكون عندنا سيارة خاصه فينا، وبنقدر نلعب في بيتنا على راحتنا، بالرغم انه عيالي
    جداً مرتاحين عند أهلي بس حسستهم انه بيكون عندنا هناك خصوصية أكثر، وبتكون عندنا مخططات
    خاصه، خليتهم هم يقولون لي يالله أمي تزوجي نبغي بيت وكذا.. يهال بالمسايس كل شي يبونه، وغير
    ذلك قلتلهم بيصير عندكم أبو يديد بيحبكم ومن هالكلام) يعني بالمختصر حسستهم انه انا وياهم قاعدين
    نستغل هالزواج لصالحنا كلنا.

    4-لازم تكونين واضحه قدام أهلج وخطيبج، بأنه انتي أم وصعب تعيشين بعيده عن عيالج، حتى



    لو قلتي هم حالياً صغار، ولو بعدت عنهم بيضيعون بعدين برجع اصلح الموقف، وفهمي خطيبج
    انه وضع عيالج مؤقت وكلها كم يوم في الأسبوع عندج.




    (أنا قلت لخطيبي كلمة، هل ترضى بكره أني ارمي عيالك عليك لو الله ما كتب لنا نصيب واتزوج؟
    هل تحب انه عيالك يعيشون بعيد عن امهم؟ وتأكد لو سويتها مع عيال غيرك ما بيمنعني شي اسويها
    مع عيالك، ولما قالي لا بس اهلي يسألون العيال وين بيعيشون. قلتله مثل ما أهلك شارين سعادتك
    بحكم انهم أهل انا بعد اشري سعادة عيالي. عيشته في الجو بهالمقارنه,
    وبينت له انه حياتنا ما بتكون سعيده إذا عيالي كانوا بعيد عني لأني بكون إنسانه تعيسه
    وإذا كنت تعيسه ما راح اقدر اسعدك! أنتي استخدمي الأسلوب اللي ينفع معاه بتدخل من أهلج أو منج
    حسب ظروفج، وحتى لو بديتيها انه عيالج بيكونون معاج حالياً لين يكبرون 4 أيام في الأسبوع فقط)

    تذكري شي مهم، أنتي من حقج تعيشين سعيدة، وسعادتج مش لازم تتعارض مع سعادة عيالج



    أو زوجج في المستقبل, الأمر بيتطلب منج جهد كبير كوني قوية وكوني قدها,



    أنا في مرات كثيرة حسيت أني خلاص بنهار وبقول لا, بس قويت نفسي ولزمت نفسي اني بقدر
    أوصل للي أبغيه وقعدت اذكر نفسي انه من حقي اعيش في سعادة ومن حق عيالي اللي مالهم
    ذنب ولا خيار في كل هالظروف انهم يعيشون بعد في سعادة!! كل تفكيري كيف أوفق بين هالأمرين
    والله دلني على الطريق الصح.

    من أول ما انخطبت وأنا اصلي الاستخارة وادعي ربي! يدخل لي كان الشيطان وأقول أنا شلون
    أفكر في الزواج من أساس؟ كيف ابيع عيالي؟ انا ما استاهل اكون ام!! كل هالأفكار مرت علي!
    لكن صدقيني عمري ما صرت أم كثر ما أنا اللحين!

    قبل العقد اشترطت شرطين!! 1-انه ياخذلي بيت قريب من أهلي، في حال انه ابوهم احتج على زواجي
    ولأنه كان القانون لو تزوجت امي تربيهم! بالتالي طلبت بيت قريب من اهلي تحسباً انه لجأ للقانون
    وأكون قريبه من عيالي! (مع اني حالياً ساكنه بعيد بس كنت حاطه هالشرط للأمان)

    2- أشترطت انه زواجي ما يتم إلا بعد العقد (الملكة) بست أشهر، على أساس أعرف ردة فعل
    أبوهم وأشوف وشو بتكون تصرفاته، ما كنت بقدر انخطب واتزوج وأول أيام زواجي أواجه
    مشاكل مع طليقي, كنت أبغي هالمده تكون مثل تخليص مشاكل لحد ما تتوضح الصورة وتستقر
    الأمور كيف ما ربي كتبها، عشان اتزوج وأنا مستقرة وعارفه وشو مصيري. (والله وفقني في
    هالخيار).. لأنه بالفعل اول ما ملكت أبوهم خذهم وعشت في جحيم!! لين ما مل وراحت منه العصبية
    والعيال تعبوه، ورديت خذيتهم، وبالإضافة إلى ذلك خذيتهم منه على طول يعني مافي زيارات حتى
    هالشي ساعد في استقرار عيالي أول زواجي في بيتهم اليديد وحياتهم اليديده (شوفي من كان يقول؟)
    أنا قبل لا اتزوج ما كانوا عيالي حاسين باستقرار لأنهم أربع ايام هني يومين هناك ويومين هني
    أربعه هناك.. !! يعني بالرغم من حاجتهم لنا احنا الأثنين ما كان في روتين مرتب انه عارفين متى
    بيروحون ومتى بيرجعون!! وزواجي اللي كنت خايفه منه رتب كل هالأمور.!!

    حالياً أعيش اسعد أيام حياتي بين زوجي وعيالي!!

    حرصت من البداية أنهم ما يحسون بتعب، وفي نفس الوقت ما يحس زوجي انهم ماخذين وقتي
    عنه!! كل وقتي معاهم وهو برا وكل وقتي معاه وهو موجود.. أتسرق الخطوات إذا نام واروح أشوف
    عيالي!! لحد ما مر الوقت وعرفت انظم وقتي بينه وبينهم!! كان مافي وقت لنفسي وفعلاً حسيت
    بضغوطات (خصوصاً انه عيالي كلهم يروحون مدارس) لكن اليوم اقولج انا اعيش احسن
    روتين يومي في حياتي وزوجي راضي وعيالي مرتاحين!! وأنا مرتاحه..

    كل شي يا أختي يتم بالدعاء (اللي ما انسى كيف انتشلني من حزني ومن ضياعي)
    وبالتخطيط السليم
    تحديد أهدافج.. وتكونين قوية في المطالبة بحقوقج من غير ما تكرهين اللي حولج في هالحقوق

    يعني ديري بالج تروحين تقولين لخطيبج يا أنا وعيالي يا مافي!!!!! بهالطريقة بيكرهم
    أنا زوجي للحين أشاركه همومي مع عيالي بأسلوب ما يثقل عليه، أعيشه ظروفهم
    ونفسياتهم وفي نفس الوقت ما احاول أكثر!!! صار هو يشيل همهم.

    خطيبج حالياً ما تربطه أي صله بعيالج!! أصبري باجر لو تزوجتي احسني فيه! بيحسن



    فيج وفي عيالج.



    أنا عيشت زوجي في نعيم من بداية زواجنا، خليته يحس انه ما كان عايش!! عشان
    إذا ارتاح عندي بيسعى لراحتي!! وراحتي انه عيالي يكونون عايشين مرتاحين!

    وأرجع أكرر صلتي بعيالي وقربي منهم عمره ما كان كثر اللحين بالرغم من اني تزوجت
    شعوري اني مابيهم ينظلمون، كان له دور كبير، لأنهم حتى بدون زواج منظلمين بحكم
    ظروف الأنفصال، حاولت اعوضهم بالاستقرار وبالحب واني ارتب لهم حياتهم, ومن ترتبت
    حياتي انا قدرت اني ارتب لهم حياتهم.

    ولا تنسين اهم شي انفضي عنج الحزن والهم لأنه بيشكل غشاوة على عينج ومابتقدرين
    تشوفين الأمور بصورة واضحه. وأتمنى لج كل التوفيق.
  4. @frh_alklb_1

    الله يعينك و يصبرك و يسخر لك اللي فيه الخير
    ام الخمائل كلامها كامل
    بس حبيت اضيف انك لو تخلين ابوك يكلم طليقك ان العيال يجلسون عنده
    و انت مع الوقت حببي زوجك الجديد في عيالك
    راح يجي اليوم اللي هو يقول لك هاتيهم

تابعي تجارب أخرى من هذا القسم.