موقفي مع سارقات الطعام الله يهديهن ..
السلام عليكم ورحمة الله
أمس روحت زواج لولد وحده تقرب لنا من بعيد ..
هذي الانسانه معروف انها واجتماعية من درجة اولى وفله .. فعندها صحبات ومعارف كثير كثير ماشاء الله عليها,,
المهم امس روحنا زواج ولدها ...
كانت القاعه مره مره كبيرة ماشاء الله .. لكن ع 3 الليل القاعه أتملت بالكاامل ..
و الحريم مره كثير .. لدرجة جابو كراسي من المخزن !
المهم وفتحو البووووفيه ..
المهم وغرفنا انا وأمي ومع انو في كراسي وطاولات طعام كثيره لكن اتملت القاعه وممنوع الاكل برة القاعه..
ومع كذه ربع الحريم المعزومات مالحقو يأكلو شئ !
المهم فجلسنا ع الأرض وهنا جات اللحظة الحاسمه ..
كانو جالسين ورانا مجموعه حرمتين و3 بنات من جنسية عربية ,,
كانو جالسين جمبنا بس كانو جالسين كمان جمب طاوله النواشف (اجبان وزيتون والخ )
والله يبنات شفتهم تجي البنت معاها صحن كبير بس محاشي غارفته ..
والثانية تجيكي بصحن كبير مشويات .. ... صحن كااامل كبير مدور مليان لعينو نوع واحد من الأكل!
مره صحن محاشي ومره صحن كبيره باشاميل .!
وبعدين اشوف كم بنت جالسين لاصقين بالطاوله حقت النواشف ..
وكل واحده منهم تأخد الصحن وتحطه بسرعه بسرعه بكيس وتربطه وتحطه جوة كيس كبير وعلى طول يحطوه تحت الطاوله ..
و3 بنات شغالين يغرفو بكميات مهوله ويجيبو لهن !!
اانا وامي فمنا وصل للأرض من الهول !
صحون رايحه وجايه!
الحريم ربعهم فوق 100 حرمه ما أكلو .. وهذولا جو كملو المشكلة ويسرقو الأكل ؟؟
وبعدين شفت النتيجة 3 اكياس كيره زي اكياس ستي ماكس !
...
المهم فقلت لأختي الكبيرة لازم أنصحهم .. اختي تقول بدأت المشكلجية:icon28: .. قلتلها انا بس حأنصحهم ...
المهم رحت لهم وقلت : ممكن اعرف ليش بتأخذو اكل ...
فقالت واحده : احنا نأخد باقي الأكل من صحون الحريم ...
قلت لها : لا والله ماصدقتي .. شايفتك ترسلي بنات يجو بصحن كبير مليان بصنف واحد بس من الاكل وواضح انه ما أتلمس و جديد .. وتحطية بكيس واحد ..
كملت : شايفين الحريم ربعهم ما أكلو وانتو جايين تكملو الله يهديكم ..
ووالله بس يغالطوني . وانا اقولهم .. يعني أكذب عيوني ؟؟
شايفتكم بعيوني ..
فصارو يقولو لا ما بنأخد اكل ! ومن ده الكلام الفاضي ..
وقهروني لأنهم لاخر لحظة يغالطوني ويكذبوني ..
قلت لاااا .. هذولا يبغالهن يتادبو .... يسرقو الأكل + يدخلو فعيوني .. وبدأو يخاصمو فيآ !
فقلت : طيب أووكي . انا حأكلم فلانه (أم العريس) ..
فقالو : مين ذي ؟؟
يعني حتى معقول احد روح زواج ومايعرف اهل العروس.. قلت لهم انتو من اي طريف ؟ صارو يلفو الطرحة وبيروحو !!
فعرفت وقتها انهم ماهم من المعزومات وداخلين عرض لياخدو الاكل :09:
فقلت : طيب طيب انا حأكلم فلانه عنكم .. فجريت قبلهم واسأل اي حرمه .. تعرفو فين فلانه ام العريس ؟؟
فشفتهم يهرولو بأكياس الأاكل ..
فهرولت وراهم ووأقولهم : ليش تهربو ؟؟ خلوني اوري فلانه عنكم لتعرف انها عزمت ناس جات لتأخد الأكل ..
المهم بعدها تركتهم .. لانو ماكنت أبي أكلم ام العريس ولا هدفي افضحهم ! بل اخوفهم وابين لهم انو الناس ماهم سذجة وانو احتمال يتلاحظو بالمستقبل !
وبس ,,,
اش رأيكم بموقفي ..؟؟ اش حتسو لو شفتو الي شفناه ؟