واحة للشعر الشعبى الليبى

العــــام الجــديـد اوهل () () والخير هـــل معـاك
ماضنى العيــن اتمـــل () () ولا خاطرى ينساك
لا ود كيفك ود ..... ولا فى مكانك حد
ولا نروق غير احذاك

...
مـــــازال مهمـا عـــاش () () قلبى رهينـة يدك
وخوذ عهد عام اطناش () () انزيدك غلا ونودك
غالى وتبقى غالى ..... وما اندير غيرك والى
وما انريد غير ارضاك

جــانا العـــــام التالى () () وروحك على عزيزه
ومازلـت عندى غالى () () فــارق وعندك ميزه
كابر افعينى ديما ..... وعندك معايا قيمه
ولا صوب كيف غلاك

كل عام نفـــرح بيك () () ونقــولك يــاروحـــــى
ياحلــم شفته فيك () () هــون على اجروحى
شايل جميع همومى ..... وجليت عنى غيومى
يصعب انعيش بلاك

عـــدا العـام ابسوه () () انسيت الزعل والشك
ومعــاى زاد بقــــوه () () ودى او حنــــانـــى لك
ياشى صعب وجوده ..... ياصوب فات حدوده
ما القيت من يسواك


قلم // نعيم الزوى

ارقد تهني شيل كل احزانك صدقني لغيرك مايكون مكانك

ارقد تهني شيل كل احزانك

صدقني لغيرك مايكون مكانك

شيل كل اهمومك

ارقد تهنى دوم طيب نومك

راك ياعزيز عزيز غالي سومك
وفوق ماتصور راك عالي شانك

انت بحر اونا ادمنته عومك

ونحس في موجك ابكل حنانك

راني عشقتك حط في معلومك

ومانسيبك مهما ايدور زمانك
ياعزيز تهنى

غيرك مكانك مايقرب منا

هناك يالغالي حد ما نتمنى
وهنايا ايكون افساعة اطمائنانك

خلك اقريب ياعزيز ادنى

ارويت ابغلاك اليوم نا مليانك

انت في وطاتي يالغالي جنة

ومايطيب نومي غير وسط اجنانك

ياعزيز ارتاح
غلاك مو معقب داخلي مطراح

فيك النضر ينضر مسا وصباح

والوذن ماتسمع امفيت الحانك

ونشما عبيرك دوم في الارياح

ولي السان ماعندا الا امدحانك

نضايق انجيك وناجدا البراح
ونلقاك باهي يازهر بألوانك

حبك اجتاحا خاطري اجتياح

من قالك غالي عليا مانك

مايجي مكانك غيرك

ولانرتوى من بير خاطي بيرك
انضر اعيوني تعرفا تأثيرك

وتحس بيه القلب هلي صانك

نثرت ابغلاك علي كل عبيرك

من كل زهرة حب من بستانك

دللتني بالحيل كثر خيرك

موحال ردي لك هو نسيانك
وموحال شي مرة قديم انديرك

ارتاح واطلقله غلاي عنانك

حازم الصبيحي قال للأم :ـ

يللي الجنة تحت من رجليك .... ربي الخير أن شاالله يعطيك

كيف ما عانيتي .... أبهم الوحم فالحمل ما أكتفيتي

وقت الولادة ماللوجع أشقيتي .... مهما أندير أب أه ما أنكافيك

الم الرضاعة بيه ما حسيتي .... هم السهر ما يوم أثر فيك

أتعبتي أوشلتي همنا أوربيتي .... أتحني أوما ترجي أنحن عليك

نمرض أنشوفك بالدموع بكيتي .... تدعي أوفرحي فالحياة يكفيك

نقسا أوما عمرك علي قسيتي .... نبعد أوتنسي الجرح وين أنجيك

يا أمي أبنزها كيف لو ما أرضيتي .... مهما خذيت أرضاك ما نرضيك

يا أمي هديتي الروح لو حبيتي .... يا أمي حياتي كلها نهديك

يا يام فالقرأن راك أعليتي .... طاعت الله أبطاعتك والديك

يا يام لو منك طلبت هديتي .... بالخير تدعيلي أبرفع أيديك

الشاعر المميز سفيان بو طيغان قال للأم :ـ

يا ما درتي .... أوياما ليالي واجدات سهرتي

أوياما أشقيتي نين ما كبرتي ... أوياما دعيتي ربنا أيقويك

أوياما مخاطر واجدة خاطرتي ... أوكني طلبت أتجاوبي لبيك

وقت الطفولة ورقتي سطرتي ... مهما وصفت الحن ما أيساويك

أوواجد تحملتي صحيح صبرتي ... وين أبشقاوة أنجيك وأنوعيك

عشاني ليالي نومتك كسرتي ... عشاني تحملتي تعب رجليك

عشاني لقاء أبصحبتك ودرتي ... لما بكيت أبدمعتي نبيك

أولما رفعت الصوت ما دورتي ... أوكاين جوابك ربنا يهديك

عمرك عشاني عالوطا بعثرتي ... حياتي قطفتي شوكها بيديك

طفلك كبر أوكيف ما أصورتي ... لحظت نجاحي أوفرحتي نعطيك

كل عام وكل أمهاتنا بخير