أمس في سوق المملكه , شي يشيب الراس , يدمي القلب, ربنا لا تؤاخذنا بما فعل السفهاء منا
السلام عليكم
أمس في سوق المملكه , شي يشيب الراس
والله يابنات أنا رايحه للضروره , ومهما حكوا علي عن مساوئ دخول الشباب , ماتوقعت اللي أشوفه اليوم , والله بغيت أطيح من طولي وقمت أنتفض كلي , الله يحلم علينا ولا يؤاخذنا بما فعل السفهاء منا . العالم تتقلب على جمر من حولنا , وحنا نكفر نعمة ربنا . الله يحلم علينا .
جلست على كرسي , أنتظر خواتي يطلعون من المحل , ألا وأشوف بعض الشباب جالس على الكرسي , متبقره عيونهم , يفصلون كل بنت رايحه وجايه , تقولون ماسح ضوئي . ويتأمل بشكل يشمئز منه كل انسان عنده فطره سليمه , والبنات منتهى الاستعراض , واللبس والمكياج والنظرات السايحه , والاجانب أشكال والوان , وحتى الطرح شايلينها أغلب البنات , بشكل ملفت للنظر , ماتشوفون الا العبايه الكاسيه العاريه . وزايد حال السوق بعد السماح بدخول الشباب , تتوقعي رايحه لحفله او زواج مختلط .
المهم وقت الصلاة . , وقت الصلاة , الآذان يأذن , و3 شباب يحومون حول بنت , عمرها بالكثير في 3م , 1ث , أصلا البنت كانت تستعرض من ساعه بدون رقيب ولاحسيب ولااهل ومسرحه الشعر وتدور حول الشباب , طبعا في الدور الارضي القريب من مواقف السيارات والمطاعم
جلست وقت الصلاة على كرسي
وصاروا هالشباب ينتظرون فرصه يكلمونها , الا يمرون ( الهيئه ) , مساكين أحس بس صاروا صوره , وتحجمت أعمالهم وحرياتهم . بعد مامرت , قامت البنت وأخذت الطريق المعاكس , تخيلوا والامام يصلي , وهي تروح حول الشباب , وتأشر لهم , والله يابنات هنا غلى دمي . بغى يغمى علي , أيش الجراءة هذه !
وامشي وراها , وهي تطلع الدرج , ويركض واحد من الشباب وراها , ويكلمها بكل جراءه وهي ترد عليه , لما طلعوا فوق , وقفوا مع بعض , ماتشكي أنهم غريبين عن بعض .
وأجي حضرتي وأمر من هالشاب اللي مشخص معها ,
وأقول حرام اللي تسويه , ترضاه لاختك , امك , أرتبك وحاس شوي وهي هجت , بس تبي تبعد لا أكلمها
وهو يقول : خلاص ياخاله عوافي !! << ماأدري ايش معناها ؟
المهم عطيته كم كلمه ( والله يابنات نزل راسه شوي , بس وده يدفني ويلحق عليها , وقامت تطالعه من بعيد , شوفوا القوايه ونزع الحياء وعدم الخوف من الله . قمت أكلمه واقول : استح وخاف من ربك ....... قام نزل من الدرج ..... أنا وقتها والله يابنات أنتفض كلي وصوتي يرتجف وكلي ارتجف , تقولوا أنا بسم الله علي , اللي عامله الحرام . حسيت نفسي انشليت ( والا كان رحت لحقت عليها وعطيتها كم كلمه ) نزلت بعد فتره جت السياره ,
وقدام عيني أشوف الشباب طلعوا ثاني لفوق ومعهم الجوالات , واطالع قدامي , والا شباب ثانين تقولي طالعين من ديسكوا , نفش الشعر والدخان والبنطلونات الغريبه واللبس الضيق وكل واحد متسند على جدار وينفخ بالسيجاره بطريقه عجيبه تقولي سكارى , ويطالعوا البنات عيني عينك , ينتظروا إشاره من وحده . والبنات ضحك وعطور ومكياج على الآخر ومياعه في المشي والنظرات , والله ماتقولي هذول جاييين لحاجه في السوق . بس يروحوا ويجوا سعي في نفس الدور .
والمصيبه أطلع أكلم حارس الامن برا , قال مابيدنا شي <<< أكيد مادام النار جنب البنزين , والبنات مايشتكوا عاجبهم الحال
وتسمعني حرمه , وتقولي يااختي لا يضيق صدرك فيه أشد , لسه ماشفتي اللي شفتهم . قلت أيش بعد !
قالت : البنات هنا يجي يدوروا مع الاولاد الصيده مجموعات , بعدين كل وحده تطلع مع واحد في سيارته من السوق , روحي شوفي وهم يلتقوا بمطعم ! وبعدها كل وحده تخرج مع واحد . وهذا بعد في سوق بانوراما ,
وصاحب زوجي , كان يتكلم مع الأمن في السوق , قال تعال بعد الساعه 11 , وشوف الشباب والمناظر اللي تدمي القلب ,
ويقول لو ماسمعتوا أحد يشكي كثير , أعرفوا اصلا هم يجوا وواثقين فيه البنات اللعوبات جاهزين , وكل وحده تدور خوي مثل ماهو يدور خويه .
والسوق أنسب مكان , لانهم يشوفون بعض ويتخيرون , وأسهل في اللقاء والهروب ,
لاحول ولاقوة الا بالله
حسبنا الله ونعم الوكيل
لو كانوا يقصدوا يسمحوا للشباب المحترم بدخول الاسواق , المحترم مايجي يلصق بالحريم , وينتهك الأعراض , ويختلي بمحارم الله , ويدنس أعراض المسلمات .
واللي بيدخل يدخل مع عائلته
لكن هم سمحوا لشباب الشوارع واللي يدنس الاعراض يدخلون ويتنقوا صيدتهم جاهزه , بدل الغربله في الشوارع أول , كانوا يدورون بس بالسياره حول السوق ويرفعوا الاغاني , بس الحين قالوا : أدخلوا جاهز مجهز , حسبنا الله ونعم الوكيل