استغرب من اللي يقولون لاتروحين الا يوم فالاسبوع ونص ساعة او ربع يعني بما انها يوم فالاسبوع المفروض تجلس تتعشى او تتغدا
واستغرب من اللي يقولون لاتروحين الا مره كل شهر
ترى هذولي اهل زوجها مو اعداءها واكرامهم من اكرام زوجها ويكفي انهم اهل عيالها لازم تعاملهم باحسان عشان ماترجع ع عيالهم
اما بقطاعه او بكره لعيالها
وبعدين ليش هالردود انا مااشوف انهم غلطوا في حقها او تلفظوا عليها او حتى طردوها
هي لاحظت مجرد تصرف يمكن تكون بالغت فيه اذا هي من النوع الحساس ويمكن العيب فيها -معليش نناقش بصدق احنا-
وكل وحدة منكم اللي ماترضاه لاهلها من حريم اخوانها لاترضاه لاهل زوجها
وش اللي زيارة ربع ونص ومره في الشهر وخففي الزيارة و و و لو تسويها مرة اخوي بحقد عليها ليه وش شايفه مننا والا وش جاها مننا
زوريهم مره فالاسبوع بس لازم تجلسين وتتقهوين وتسولفين وتفلينها وتتعشين او تتغدين يعني تاكلين عندهم مو كأن عليك حلف مايطب بطنك شي من بيتهم!!
واللي قالوا خذي جوال وحملي العاب و و و عسى ماشر بس تجلس في بيتها الله يعافيها
اما تروح للناس وتلهى في جوال والا شي معليش وشوله جايه أجل؟!! يعني كبسة انفاس وفوقها سوء تصرف
والله انا اشوف اللي بتجي وتحرك المجلس ولها حس ورس واجتماعية وحبوبه وصايره كنها وحدة منهم والله محد يطفش منها ولا يمل منها ولايتركها ويخلي المجلس
الا بتدخل معهم وبينتظرون جيتها وبيطلبونها تجي اكثر من مره فالاسبوع
اما اللي بتجي هي والجدار واحد واذا حطزت في مكان معد تحركت ولاتسولف وفوقها تقلب هالعيون يمين ويسار تحس انها تسجل
او جهاز يتلقى ومايرسل والله معليش هذي ماتنبغى ابد وينمل منها ومن جلستها ويستثقلوووون جيتها
الوحدة تصير خفيفة نفس تقوم وتروح وتجي وتساعد وتشيل وتحط وتصير مرحه تسولف وتضحك وكلش ولا تقليب هالعيون يرفع الضغط تراه ويبعد الوحدة عن الناس 89547689609 كيلو متر في الثانية في كل مره تعيدها
فخلوكم محضر خير ولا تحرضون واللي عندها مواقف مع اهل زوجها لاتنصح هنا على اساس تجاربها الحمايل يختلفون
وانا اشوف حمولة صاحبة الموضوع في حالهم وماقلوا ادبهم عليها ولاجرحوها ولاطردوها ولاسبوها ولا حتى شغلوها في بيتهم!!
واذا بس يتركون المكان صح عيب بس مايندرى عن اسبابهم اذا هي وجودها زي عدمه معليش هذي كبسة نفس وبيشمون هواء
ومو مجبرين يلزمون نفسهم بجاملتك كل مره لان ماراح تجين مره وبس او مرتين وثلاث وبس بيشوفونك دايم ومو دايم راح يضغطون ع انفسهم
(اشوفه شي فوق طاقتهم)
فأنتِ عادي شوفي وش الخلل واعملي عليه عادي ترى لو العيب منك مافيه أحد كامل طوري نفسك وغيريها
يمكنك مع اقاربك فرفوشه وغير مع اهل زوجك او اللي مادخلتي معهم كثير تكونين شخص ثاني ورسمية
واذا رحتي لهم قومي معهم وادخلي مطبخم ساعديهم صبي عنهم القهوة او الشاي او ع الاقل وديها المطبخ اذا خلصوا
سولفي وفرفشي وشوفي كيف النتيجة بعدها
واي نصيحة ضد مصلحتك الزوجية لاتسمعينها
اهل زوجك ماغلطوا في حقك ولاغلطوا عليك وواجبك تحترمينهم وتقدرينهم عشانهم هم وعشان زوجك
لذلك حركات جوال في الجلسة او نص وربع ساعه زيارة او مره في الشهر هذي قمة العيب وماهي ذوووق أبد وأكيد ماترضينها لأمك
شوفو اخوات زوجي
متابعة النقاش، صفحة 7