شاركي في النقاش

سجلي الدخول لإضافة تعليق.

التعليقات

7,588
  1. @daaandooon

    والله يختي يا ايمان شو بدي احكي لحكي
    هالامتحانات زي الزفت الله وكيلك الله يستر
    ادعيلي الله يعوضني و ازبط امتحان الجمعه
  2. DaaanDooon
    والله يختي يا ايمان شو بدي احكي لحكي هالامتحانات زي الزفت الله وكيلك الله يستر ادعيلي الله يعوضني و ازبط امتحان الجمعه
    الحلقة السادسة -- اهلا حياة زوجية
    اليوم الاخير بالاجازة . وبكره الدوام . الايام الحلوة بتخلص بسرعة ، وبكره الدوام ولازم يحضر حاله وينام بدري مشان يصحى بدري . لانه جسمه اخذ على الكسل والنوم للظهر . في الصباح صحي على صوت مرته وهي حاملة صينية القهوة وجايبتها للسرير. ياااه طول عمره بيتمنى هاي الحركة ، قام وشرب فنجان قهوة على السرير وهو طبعا نعسان وحالته حالة . بس الصباح الحلو من مرته نساه النعس وكان نفسه انه ما يطلع . لكن شو يعمل بأكل العيش ؟

    دخل على الحمام اخذ دوش حلق لحيته حتى صارت مراية وفرشى اسنانه . لبس ملابس جديدة مع ربطة وقعد بالمطبخ مشان يشرب فنجان القهوة التاني مع سيجارة . وقبل ما يطلع حط على حاله نص علبة العطر . وصل للباب وسط توديعات عروسته : الله يحماك . ما معي رصيد ضلك احكي معي . لا تتأخر بزهق لحالي . مع السلامة .......الله معك ............

    وصل على الشغل يا عمي معاملة خاصة جدا . الكل بيضحك بوجهه : اهلا يا عريس . يا عمي الهنا مبين على وجهه
    شوف كيف وجهه مفتح ........بس عاد البنات اللي معاه بالشركة كانت مواقفهم نوعا ما مختلفة يعني مع جميع المحاولات بالظهور بمنظر عادي الا انه كان في شي غلط بالنظرات وبطريقة الكلام . مع انه ما عمره فكر بوحدة منهن ولا لمح لا من قريب ولا من بعيد الا انه الظاهر انهم كبنات كانوا حابين انه يختارهم او يطلب ايدهم بصرف النظر عن موافقتهم او عدمها او حتى رأيهم فيه .. طبعا هاي تحليلات ابو جميل مساعد المدير العام مسؤول الشاي والقهوة !!!


    خلال الدوام اتصل اكتر من اربع مرات مع البيت . وما صدق الدوام يخلص حتى ركض على البيت . وبعد وابل من الترحيبات . زت حاله على الكرسي وقال : - اه حبيبتي شو عامله غدا ؟
    - ايش ؟ - ايش ايش ؟ غدا . اكل شو طابخه ؟
    - مش طابخة .
    - خير . ليش مش طابخه ؟
    - مهو انا رجعت نمت بعد ما انت طلعت
    - حبيبتي الساعة خمسة هلأ . مش معقول ما لحقت تعملي اشي .
    - مهو انا صحيت حوالي الساعة وحدة. وفكرت اعمل مقلوبة . بس طلع ما عنا بهارات .
    - وليش ما عنا بهارات ؟ مش حضرتك رحتي على المول وجبتي اللي بدك اياه ؟ ليش ما جبت بهارات ؟
    وضروري المقلوبة تكون ببهارات ؟ وما في طبخة تانية غير المقلوبة يا عمري ؟

    - هو هو عاد . خلص ايش بدك . هلا بحضرلك بسرعة .
    - يكتر خيرك . سديتي نفسي . اعمليلي فنجان قهوة .

    وعملتله فنجان قهوة . وبدت تحاول ترقع الموضوع . قلت بطاطا وبندورة . وحضرت سفرة قعدت يمكن ساعتين تحضر فيها . وهو قاعد بالبلكونه بيحاول يتعرف على حجم الخازوق اللي اكله .

    وطبعا لانه من النوع المسامح اللي ما بيحب يعمل مشاكل . مشاها نواشف وما زعل مرته . مع تلميح ظاهر للعيان حول هذه الكارثة اللي صابته . بس على العموم الاكل مش كل شي . المهم الحب .

    الاسبوع الثاني بشكل عام يختلف عن الاسبوع الاول بكل شيء . الاسبوع الاول اسبوع جميل بدون مشاكل وبدون صدامات . اصلا ما وقت للطوش . فعلا اسبوع عسل اذا ما قرن بالاسبوع الثاني .



    الاسبوع الثاني كله طوش . يوم طوشة واحدة يوم طوشتين واحيانا اكثر .
    طبعا هي خلافات بسيطة بسبب تغير المناخ وتضارب العادات . اكثر الخلافات اللي كان يبتدعها الاخ هي بسبب الاكل او القميص اللي بحبه مش مكوي . واحيانا بسبب ملح زيادة على الطبخة . ويا ويلها اذا كان عندهم مشوار المسا وتاخرت باللبس خصوصا اذا كان المشوار عند امه .

    اما الطوش بسببها فكثيرة :
    - ليش بضغط على معجون الاسنان من النص مش من تحت ؟؟؟؟؟؟
    - ليش ما بترجع عدة الحلاقة مكانها لما تخلص ؟
    - كل يوم بتغير ملابسك . وبتترك القديم على العلاقة ؟؟؟؟؟؟؟؟؟
    - ليش ما حكيت انك بدك تتاخر ؟؟؟؟؟؟
    - زهقت طلعت روحي . بدي اطلع لو لفة بالسيارة !!!!!!!!!!!!!!


    ومن هالسوالف الفاضية ...لكن الشيء الحلو انهم يستحيل يناموا زعلانين من بعض . ولازم واحد يصالح التاني . وبما انه الغلط الاكبر معظم الاوقات عليه كان هو اللي يصالح برضه بسبب دلع البنات .

    عينة من الطوش :

    في صباح احد الايام
    هي : - لاتلبس هاي الربطة . مش لابقة على القميص .
    -لا لابقة.
    - كيف لابقة ؟ اصلا هاي خرج حفلات مش شغل .
    - طب خليكي بحالك وما تتدخلي .
    - بقلك البس كرافة تانية . هاي مش جاي مع القميص .
    -يعني واحد مربي دقنه والتاني تعبان فيها . انا اللي لابس مش انت . وحر انا اللي بدي اياه بلبسو . بعدين طول عمري بلبسهم مع بعض . شو اختلف اليوم ؟
    - كنت اول عزابي . هلا انت متزوج ولازم دايما تكون انيق .
    - يا حبيبتي . يا بقبق عيني . اول كنت عزابي وكانت العين علي وكنت دايما شخصية . هلأ بكل بساطة : اللي بدها تتزوجني تبطل . تورطنا واللي كان كان
    - يعني انا ورطة ؟ فعلا الملافظ سعد .
    - هو هو عاد . خلص يا ستي انا اسف . هلا بروح بتزوج تنتين .
    - روح الله معك .ليش في هبلة غيري بتقبل فيك .
    - اصطبحي .
    - انت اصطبح
    .
    ..
    ....
    لا حول ولا قوة الا بالله . انا رايح على الشغل .
    - جاي عالغدا ؟؟؟
    - ...............................

    طوشة تانية :




    في مساء احد الايام
    هو : خلصيني . تأخرنا .
    - طيب . طيب
    - نفسي اعرف شو بتعملي . مخبرك من امبارح . ومأكد عليكي قبل ما اوصل . ولسة مش جاهزة .
    - جاهزة جاهزة . بس ثواني بدي ادخل على الحمام .
    بعد خمس دقايق
    - بعدين . والله هاي مش عيشة .
    انا نازل على السيارة . معك خمس دقايق ولا بتحرك .
    - طول بالك . هيني جاي .
    طبعا هو نزل وهي لحقته ركاض .
    - شو هاد ؟ ليش حاطه عطر ؟ مش قلتلك لا تحطي عطر لما نطلع . يا بنت الحلال والله حرام
    - مش حاطه . رشة وحدة .
    - وانا كيف شميتها ؟
    - طيب خلص اخر مرة
    بيرن موبايله . يلا يلا هيني بالطريق . عشر دقايق
    بعصبية :
    - عاجبك هيك وقال شو ليش دايما مواعيدي غلط . لولا حضرتك ما تأخرنا .
    - ...........
    - شو ليش ساكته ؟ مش عاجبك حكيي ؟
    - ما حكيت هيك . خلص اقصر الشر .
    - يعني انا اللي بعمل الشر ؟
    - يا حبيبي حقك على راسي .
    بسبب سواقته المجنونة بيفتح الزامور على سيارة تانية وبيعطيها مسبة من الزنار وتحت .
    - فش داعي لكل هاد .
    وبتحاول تمزح معه : بعدين راعي انه معك ليدي حلوة عيب هيك الفاظ
    بيطلع هليها بطرف عينه . وبيعلي الراديو على الاخر :

    فن اف ام .........معكم على الهوا

    قوم اقف وانت بتكلمني .................
  3. canada2004
    الحلقة السادسة -- اهلا حياة زوجية اليوم الاخير بالاجازة . وبكره الدوام . الايام الحلوة بتخلص بسرعة ، وبكره الدوام ولازم يحضر حاله وينام بدري مشان يصحى بدري . لانه جسمه اخذ على الكسل والنوم للظهر . في الصباح صحي على صوت مرته وهي حاملة صيني…
    الحلقة السابعة - التحويشة
    تبدأ الخلافات وتنتهي ببساطة . من الجميل انه يكون الانسان عنده مبدأ ويلتزم فيه . بالرغم من طباعه الغريبة نوعا ما الا انه قدر يحدد السياسة الداخلية لبيته . وبالبنت بشكل عام من داخلها بتحب انه جوزها هو اللي يستلم القيادة بس بشرط عدم تطنيشها واعتبارها بلا رأي .مع انه كان من قناعاته انه اي بنت بتحب تسيطر على جوزها اذا لقيت مجال .بس اكتشف انه البنت كائن رقيق يمكن ان يبادلك اضعاف مضاعفة من حبك بالكلمة الحلوة والمعاملة اللطيفة . حال جهده خلال الشهر الاول من الزواج تطبيق هاي القواعد بس المشكلة انه صعب لسة ما وصل لدرجة انه يتخلص من كل عادات العزابي وطرق التفكير القديمة . وهي كمان مش بسهولة التخلص من الدلع وعدم اللامبالاة وتحمل مسؤولية بيت بين يوم وليلة .

    الصراحة هي اساس العلاقات وخصوصا صراحة المشاعر هذا المبدأ اللي كان ماشي عليه . يعني هناك ممنوعات حددها من اول ايام مثل : امي خط احمر لا تدخلي بخلاف من اي نوع معها مشان ما اتشتت بينك وبينها لاني غالبا رح اصف بصفها فلا تحطي حالك بموقف بايخ
    -يا سيدي امك على راسي وزي ما بحب انك تعامل امي رح اعامل امك . ولو انت تغلط انا ان شاء الله ما رح اغلط
    -الطلعة من البيت بأذني بس
    -اصلا الطلعة بلاك ما الها معنى واذا اضطريت اكيد رح اقلك
    -لا ترديلي جواب وانا معصب
    -يا حبيبي ما انت دايما معصب
    -شو قصدك
    -قصدي يا حبيبي عصب زي ما بدك وانا تحت امرك
    - بتتخوتي
    -لا طبعا . زي ما بدك انا جاهزة
    -شو هالعقل اللي نزل عليكي هاد ؟
    -ولا اشي يا روحي . بس بدي اشوف اخرتها معك !!!!!!!!!1

    هاي النقاشات اللي كانت تدور بينهم مشان يعمل حاله مسيطر على بيته . مع الايام اكتشف انه الموضوع ابسط من هيك
    سيطر على غضبك بتسيطر على بيتك
    مشكلة الاشهر الاولى انه الاثنين بيتعلموا يوم ورا يوم بس المشكلة دائما بالتطبيق

    نرجع لقصتنا
    يوم من ايام الخميس بعد مرور شهر واكم يوم راحو يزوروا امه المسا . دخلوا وسط الترحيبات والتسهيلات كان البيت مليان ما شاء الله دار خالته ودار عمته اللي جايين من السعودية ودار اخوه الكبير ودار اخته . ميت ولد على غفلة وقعدوا الزلام على السطوح والنسوان ما بين الصالون والمطبخ
    طبعا هي على طول دخلت مع فريق المطبخ . شو بده يخدم على الناس هاي كلها . يعني غلاية القهوة اكبر حجم ما بتنزل عن الغاز غير ابريق الشاي اللي بيوسع الف كاسة . ومن هون ولد كسر كاسه ولد تاني يا دوب لحق حاله على الحمام وهاد ضرب هديك . وما شاء الله البيت قلب حديقة عامة . والله عملت القهوة الله يسلم ايديها المعدلة . طبعا خالته وعمته ما بيعرفوها منيح . بس شافوها على اللوج وما عبوا عيونهم منها . دخلت المستورة حاملة صينية القهوة . باسم الله ما شاء الله يسلموا ايديكي يا خالتي ..........وايديكي
    خالته
    ريتك سالمة يا رب . بعوضك بالصبي انشاء الله.
    -شكرا
    عمته

    وقعدت . وبدأت الاسئلة الجميلةاللي بدأتها خالته اللطيفة : ها كيف الجيزة ؟- منيحة !!!!!!!1
    (يعني شو هالسؤال ؟ شو كيف الجيزة ؟ )
    - شو حوشتيلنا ؟
    - من وين بدي احوش يا حسرة ؟
    -يي ييي .الله يسخمط اليهود . ليش يا حبيبتي . ماله جوزك زلمة بينشد فيه الضهر
    - لأ انا ما قصدي اشي . بس بتعرفوا الاوضاع . يعني الواحد بيطلع من الجيزة مهدود ضهره .
    -خذ لك هالحكي !!!!!!شو مالك يا بنت الناس ؟ حدا بيحكي عن جوزه هيك ؟
    (شو مالها هاي المجنونة !!!!!!!!لا حول ولا قوة الا بالله )
    وهون استدركت الام الخطأ واعطتها ضحكة من اللي يحبهم قلبك . ودموعها على خدها من الضحك
    الام للكنة :
    لا حبيبتي قصدها حوشتي اشي . يعني في اشي على الطريق . مش حوشتي مصاري من غير شر عنك وعن جوزك !!!1
    - اشي زي ايش يعني ؟
    -مالك انهبلت . احنا اللي بنحكي عنك جامعية ومتعلمة وفهمانة . اشي يعني ولد بيبي . . يعني في حمل ولا لسة .
    - البنت بطلت تجمع . وصار وجهها احمر . لا لسه ما صار
    وعلى طول قامت على المطبخ
    العمة : شو مش فاهمة علينا ولا بتتخوت ؟
    - حرام عليكي يمكن ما كانت فاهمة
    - طب ليش لسة ما في اشي ؟
    - يا اختي لسة ما فات غير شهر واحد . بنستنى عليها كمان شهر
    - واذا ما صار ؟
    - لا اله الا الله . توكلي على الله يا بنت الناس

    بهاي الاثناء كانت البنت بتشكي همها لاخت جوزها اللي فارطة على حالها من الضحك . شوي والا كنتها داخلة وقالتلها : ما عليكي فيهم . طنشي
    - بس انا مش فاهمة . ما صار لي غير شهر . اي هو سحر ؟
    - ما عليكي . بس استعجلي لانه انا حماتي كانت بدها تجيب لجوزي عروس لما تأخرت للشهر الرابع لغاية ما حملت
    اخت الزوج مع ضربة خفيفة على الكتاف :
    -ول عليكي ما اكزبك

    اما قعدة الرجال فكانت اشنع
    فمع علمه التام تنه قاعد مع جوز طراطير . جوز عمته وجوز خالته . ونص طرطور اللي هو اخوه . وواحد ما بيعرفه اللي هو جوز بنت خالته بس شكله برضه طرطور ونص الا انه القعدة كانت عبارة عن نصائح في كيفية معاملة الزوجات وكيفية ادارة البيوت
    طبعا كل كلامهم صح . بس المشكلة انهم بيقولوا ما يتمنون وليس ما يفعلون

    طبعا عبارات على شاكلة :
    - -الفرس من الفارس - تقول شاري بي ام دبليو
    -- هي من اولها بدك تفرض شخصيتك ولا بتروح عليك - يعني زي ما راحت عليكم ......حسرة علينا وعلى الرجال
    -والله اذا بتقدر تاخر الخلفة سنتين زمن بيكون احسن . ملحق على الهم -ما هو اللي بيجيب زي العاهات اللي فتحوا براسي -ورشة اكيد لازم يلغي الخلفة من اساسه مش يأجلها
    - المهم صحتك بالدنيا -وابعد عن هاي الحبوب اللي بيحكوا عنها - بدينا بالجد غير الموضوع بلاش يفضفضوا ببلاويهم
    اي ما هو اللي عنده زي نسوانهم ........ولا بلاش بيضلهم منا وفينا
    -

    واخيرا روحو الناس وضلوهم همه لحالهم عند الحجة اللي نازله تحلف فيهم يناموا الليلة عندها .يا امي الله يسعدك بكرة الجمعه وبحب اصحى متأخر
    - طيب ما تصحى متأخر مين ماسكك ؟
    - يا امي بخاف تتغير علي النومة
    -ما شاء الله حولك ثلاثين سنة بتنام هون وبده تتغير عليك النومه ؟. خلص يا حبيبي بنفرشلك جنب مرتك وبنعطيكم غرقة لحالكم
    - بس يمة ...........انا ...
    - خلص لا تبسبس . الله معكم . جاي على الغدا بكره
    - بكره معزومين عند دار عمي
    لوت الام راسها : -تتهنا !!!! 1
    - الله يهنيكي يا رب . بدك شي ؟
    سلامتك -

    بالسيارة طبعا الاخت طلعت حرتها فيه :
    عمتك ................خالتك ...........امك
    - لعند امي وبس
    - طب انا شو حكيت ؟
    -قبل ما تحكي . انا عارف شو القصة . وانسي الموضوع طنشي كله مش مستاهل تعملي مشكلة عليه
    وخلي مزاجك عالي ..........
  4. السلام عليكم،
    كندا>>> وسعتي صدورنا بالقصة الحلوة>>> كتير واقعية حتى الآن

    بنات كيفكم؟؟؟
    عنودة وزهورة وفلسطين وام منى وهديل ودموعة ودندون
    وامونة سلام خاص لسافتها مع البيت
    اكيد هتلاقي امون انتي مواصفاتك عادي>>>اي طللللللللللللللل
    ولي شو هاد انتي قاعدة في بلد كلها كلاب وجاي بتدوري على بيت مافي كلب؟؟
    الله يلعن اليهود انشالله ويريح بالك وتلاقي الي بدك اياه
  5. @mh_1

    طيب انا على سيرة الكلاب كل ما دخلنا الليفت ( ايليفايتور ) بنقول أكيد هالنقط نونو الكلاب .

    وارفع العباية .

    ولا بسترجي امشي عادي .

تابعي تجارب أخرى من هذا القسم.