مطلقة ومشكلتي خواتي

مرحبا بنات بدخل في مشكلتي على طول أنا تطلقت من ست شهور وساكنه عند أهلي  وعندي خمس اطفال أبوهم مايقصر معاهم بشي يجيب لهم حليب وبامبرز وبطاطس وعصيرات .....الخ يعني اللي يكفيهم شهر ويعطيني مصروفهم الف ريال بالشهر الله يجزاه خير ،،.  الحين بتقولون وين المشكلة ..... مشكلتي خواتي المتزوجات يا انهن باردات وجيه بشكل ... بما اننا بالعطله فهن يوميا جايات عند أهلي وتجي الوحدة معها بزارينها ولاتجيب معها لاحليب ولاشي واذا بغت الوحدة حاجه طلبتها مني بامبرز حليب ثياب كيك اي شي وانا صراحة أستحي ارفض والله ان الأغراض اللي يجيبها ابو عيالي لهم ما تكمل اسبوع والمشكله انهن يوميا عندنا وكأني ملزومة اصرف على عيالهن والشهر هذا طفرت حتى الألف خلص ومالقيت اللي يسلفني لا من اخواني ولاخواتي مع ان كلهم يجيهم حافز فرحت وشريت ببقية الفلوس الاغراض اللي ناقصتني  وشريت قفل لغرفتي وقفلت على اغراضي وربي مابقى عندي ريال واحد ولما جوا  خواتي فهمتهن انو خلاص ولاوحدة تطلب مني شي لاني طلبتهن سلف ومحد عطاني وسويت محاضرة عليهن وانا معصبة أنا اتكلم جد وهن يتريقن علي والله يابنات ما مداني ادخل المطبخ الا وحدة منهن وراي قالت وين رضاعة ولدك مارديت عليها راحت وأخذتها وقالت معليش اباخذ شوي من حليب ولدك قلت لها لا لاتاخذين ماسمح لك وربي يابنات ولاكاني قلت شي رضعت ولدها وخلصت أنا جلست أغسل المواعين الا تجي الثانية معها رضاعتها قالت اباخذ شوي من الحليب أنا هنا عصبت حيل وقمت أصرخ عليها وتهاوشنا وقالت لي كلام يسم البدن ورحت لغرفتي ابكي لين راحن بعدين أخذت الحليب وقفلت عليه بغرفتي وحطيت منه شوي بقسامات الحليب ابغاه لعيالي ونزلت وشافته امي معي وسالتني وين ابروح قلت لها مو رايحة هذا بس علشان بناتك مايخذن مني شي قالت بالحرف الواحد ووووووووووه. يالشح لاتصيرين شحيحة قمت ابكي عندها وقلت لها اذا أنا بخيلة هاذي تربيتك أنا طلبتك 100 ريال ماعطيتيني انحرجت وقلبت الموضوع علي قالت انتي اصلا ضايق صدرك ان فلان عرس وانا مالومه وكلام كثير يجرح تركتها ورحت غرفتي من الصبح للعصر واناابكي مدري وش اسوي الحين كلهم مطلعيني أنا الغلطانه ،،،،بنات وش رايكم أنا غلطانه والا لا. اذا غلطانه بالله قولوا لي وش الحل مع العلم أني قبل اتطلق عادي الوضع كان كل وحدة تاخذ من الثانية بس من سكنت عند أهلي وهن معتمدات علي بكل شي لدرجة ان الوحدة تجي تنام عند أهلي ثلاث او اربع ايام وماتفكر تجيب معها شي قسما بالله يابنات ما أبالغ حتى ملابسي يلبسنها مافيه خصوصية ابد وانا صراحة ما عندي مصروف غير اللي يعطيني ابو عيالي وهو يكفيني وزود لو اسلم من خواتي بس الشكوى لله ......

251 تعليق 40,031 مشاهدة

شاركي في النقاش

سجلي الدخول لإضافة تعليق.

التعليقات

245
  1. @bnooooooth_1

    اسستغفرالله يرفعون الضغطط
    دامهم مايجيبون اغراضهم خل يمسكون بيت ازواجهم احسن
    اككرهه ذي النوعيه من الحريمم

    منتي غلطآنهه هم الغلطانين قفلي وقفيهم عند حدهمم لين يعرفون ان الله حق

  2. @am_aabdalghfor

    حبيبتي حطي حليب عيالك وحفايظهم بالغرفه وقفلي عليهم وخلي القفل معك واذا قالو لك نبي حليب نبي حفاظه قولي ماعندي او قولي هذي اغراض اعيالي ومابيها تخلص

    واحسن شي تسوينه برايي قولي ماعندهم حفايظ ولايشربون حليب

    ولاتزعلين نفسك ياقلبي

    هم غلطانين بتصرفاتهم معك
  3. @altoooonh

    الله يعينك صراحه وامك بدال ما تكون مع الحق الله يهديها شوفي انتي ما غلطتي وهذا حقك صح هن خواتك وعادي تاخذن من بعض بس مو لدرجت ينقص عليك لا هذا ما يجوز

    انا اقول خليهن ما عليك فيهن الا تقدرين اعطيهن بس لا تقصرين ع عيالك

    ولا تناقشينهن بشي قولي لا وبس واسكتي عشان ما تصير مشاكل

    وربي يسخر لك اهلك وخواتك وعيالك

تابعي تجارب أخرى من هذا القسم.