عادل العبدالجبار : انطبقت علامات ليلة القدر على شروق شمس صبيحة اليوم

ليله 27 ليله القدر لان الشمس شفتها مالها شعاع يارب نكون من عتقائه من النار

علمها عند ربي

نسال الله القبول

مش مهم اي يوم كانت قد ما مهم ندعي بالقبول
يارب يتقبل منا اعمالنا وصيامنا وقيامنا ودعائنا.
انا اول سنة بتحرى علامات ليلة القدر وسبحانك ياربي اكتر من ليلة انطبق عليهم وصف ليلة القدر
والشمس نفس الشي اكتر من يوم طلعت بدون شعاع, مشان هيك صار عندي اقتناع انه علمها عند ربي لو اراد انه يعلم فيها رح يعلم ولو ما اراد فرح يصير اختلاف بين البشر والاختلاف رحمة.
الحمد لله الي قدرنا على الصيام والقيام.

اما بالنسبة الي بقلكم شمس صباح 23 كانت رائعة ماشاء الله بتاخد العقل من جمالها وكانت باردة على العين ولونها احمر متل قرص النار ما صارت قرص ابيض.
صباح 27 كان من اجمل الاشياء الي شفتها بحياتي طلعت على السطح وكان في نسمة برودة خفيفة والجو كان كله نور ومش نور نهار سبحان الله وكان في طاقة ايجابية مش طبيعية والافق كان كله متلون كانه فيه غيم لكن ما كان فيه غيم لانه الشمس طلعت واضحة وهالظاهرة تكررت صباح 28 وصباح 29.
شمس صباح 27 كانت قرص ابيض بدون شعاع بس بتعب العين وشمس 28 كانت ابرد منها لكن قرص احمر.
فشكله الموضوع بده ناس خبرة لتحدد قرص الشمس كونه انا اول سنة بتحرى وبتابع.

اما الليالي فليلة 28 وليلة 29 وليلة 30 كانوا منورين بدون قمر سبحان الله, انا كنت اتفرج من غرفتي على الحديقة ورا البيت اشوف تفاصيل الحديقة كاملة كانه القمر بدر, طلعت على السطوح بنص الليل كان الدنيا بعدها مغرب.
وبتعرفوا ما في قمر بهادي الليالي ومجرد ما دخل شهر شوال رجعت طبيعة الليالي مظلمة متل العادة بهيك وقت بالشهر.


وبالنسبة للسكينة انا حسيت بالسكينة والراحة بالقيام ليلة 23 وليلة 27
والله العظيم ليلة 23 كنت نعسانة وقلت خليني انام ساعتين من 11 للساعة 1 بعد نص الليل مشان اقوم اصلي وادعي وكنت مكسرة ونمت وانا بين الحلم واليقظة حسيت حدا اجى صحاني وقلي قومي الليلة ليلة قدر!!!!
قمت ولا الساعة بعدها ما صارت 12 يعني نمت اقل من ساعة ولكن حسيت صارلي نايمة شي 7 ساعات متواصلة ولا كنت لا نعسانة ولا تعبانة, وضليت صاحية لتاني يوم صلاة الظهر وانا مش نايمة. واقمت الليل وحسيت بخشوع ولذة عمري ما حسيتهم وانا بدعي قبل صلاة الفجر وخلصت دعائي وبدي اقوم اتسحر هيك اجاني خاطر ادعي شو مابدك دعائك مستجاب!!! كملت دعاء بعدين قلت يمكن حديث نفس والله اعلم.

اما ليلة 27 فبتعرفوا اواخر وعيد وشغل عيد وكنت قبلها بليلة مش نايمة غير ساعتين بس وكانت رجلي التنتين بيوجعوني وجع مش طبيعي ارهاق على سهر على وقفة وتعب والله ما بعرف كيف جليت بعد الفطور وصليت المغرب وتمددت واخدت بنادول لكن القصة مش وجع تعبانة تعب مش طبيعي, حاولت انام بس كنت اتفرج من شباك غرفتي على السما نورها كان سبحان الله, دعيت قلت يارب تعيني اقوم الليلة متل ما بتحب وبترضى لو انها ليلة قدر وحطيت ايدي على رجلي وقلت يارب تشفيني ووتعطيني القوة يارب, وسبحانك ياربي فجاة من غير مقدمات قمت من السرير نشيطة لا وجع ولا تعب ولا ارهاق ولا نعس قمت قلت خليني ابلش ليلتي بالاغتسال والتطيب وهيك صار واقمت الليلة, والله يابنات انه حسيت براحة مش طبيعية, تركيز بالقراءة والصلاة عمري ما حسيت فيه حتى التعب من الصلاة والوقفة ما حسيت فيه ابدا وانا الي كنت اتكسر كل ليلة من التعب وقلة النوم, خشوع وتلذذ بالعبادة.
واهم شي لاحظته بركة الوقت, بلشت نفس ماببلش كل ليلة ونفس روتين القراءة والصلاة والذكر والدعاء والله العظيم اقرا بخشوع شوي شوي ومركزة ومع ذلك اخلص بوقت قليل وازيد واستغل الوقت ونفس الشي الدعاء الحمد لله.
وليلة 29 وليلة 30 كان فيها سكينة وخشوع وتلذذ بالعبادة لكن كانت ليلة 27 بالنسبة الي اكتر شي

فمشان هيك صار عندي قناعة مطلقة انه علمها عند ربي والدليل اختلاف الناس بكل مكان حول علاماتها وايامها, وهالشي بس لنجتهد ونطلب القبول اكتر ما ننشغل بالعلامات.

واعذروني طولت بالحكي:)