ام زوجي وتعليقاتها العنصرية
السلام عليكم كيف حالكم يابنات هذا أول موضوع لي معكم وحبيت أشارككم بعض اللي عندي ، المهم أم زوجي الله يهديها حاطة حد بيني وبينها يعني مهما حاولت أدخل جو معها صدتني وتعاملني كأني ضيفة طبعا الكثير منكم يقول هذا المطلوب بس أنا يا بنات أمي متوفية من قبل لا أتزوج ولا عندي أخت ولا أحد حولي غير زوجي وعيالي وصار لي ست سنوات كنا نزور أمه بشكل اسبوعي بس بسبب جفافها معنا صرنا في الشهر مرة هي ألزم ما عليها بناتها وبس واما عيالها بالطقاق. وأما بالنسبة لتعليقاتها إني من مواليد دولة ثانية وعشت وتربيت في ذيك الدولة وهي في كل مرة لازم ترمي كلام أحيانا يصل الى حد القذف عن الناس في بلدي وأنا أستاء بشكل كبير أقول لها لأ يا خالة ما تحكمين على الناس بشكل عام كذا أي مكان فيه الصالح والطالح كان هنا أو برى ولكن لا حياة لمن تنادي ما غير على لسانها السوارية. .... المصارية. ...الأردنيين. . الفلسطينين وكذا ، وأنا يا بنات مش من النوع اللي يحب يذب كلام وأضطر أسكت وأناظر في زوجي أشوفه المسكين متوهق وعيونه تقولي تكفين خلص مشيها وأنا أسكت عنها علشانه. وش رايكم يابنات وش أسوي معها ؟!؟قسم بالله يا بنات حتى في ولادتي القيصرية رجعت لبيتي وهي قريبة من سكني ما فكرت يوم تطمن علي وأنا لحالي لا أم لا أخت ولا حتى شغالة كنت أقوم بعد اسبوع واحد من القيصري ويدي على بطني أدخل مع زوجي المطبخ أعلمه وش يسوي أكل تتخيلون هذا وهي عندها خدامتين ما فكرت تعطيني واحدة بس جتني المستشفى وحطت بيدي خمسمية ريال وراحت. أبي رأيكم بصراحة ؟!؟