لقاء الأحبة---تتمه---

مساء الخير والاحساس والطيبه

كلكم مع بعض رح اجمعكم في كيفكم

المهم انا قريبت كم صفحا ورح اجاوب علي السريع

اول عمر خالد ماعمري حضرت له اشي وبالنسبه الي بعتبره ..... وحرام الواحد يضيع وقته هو بتابعه

ثانيا ايمان انتي سالتي بس عنودتي ماجاوبت هههههه او اقولك مارح نتعمق علي العام هههههه بس ضحكتيني علي سؤالك

عنودتي انتي زكرتيني باول بداياتي الخطوبه كانت ايام وعدت بسرعه بس عن جد حسستيني لما اجا العريس والقهوه والعزيام يوووه


نونو الله ينجحك يارب

والي بدو يسافر تروحو وترجعو في السلامه متي ناويات تسافرو ... صح تذكرت

لاتنسونا من الهدايا ههههههه

يالله خلص بكفي اليوم انا الي حكي اشوفكم وقت اخر
سي يااا

زهره الفراشه كيف صحتك اليوم لاني سمعت انك معطله :(

ان شالله ماتفاقم المرض وتكوني طبتي منه

الحلقة الثانية والعشرون



عبر الحدود ودخل درعا . وهو ماشي بالسيارة بسرعة خفيفة حس انه الموضوع جد . وانه عن جد ترك البلد وصار بالشام .الله يخزيك يا شيطان ..شو اللي عملته هاد . بس الشيطان ما تركه بحاله صار يزينله سوء عمله . انت زلمة , خليها تتربى , زتها ولا تسأل فيها ...........
وضل على هالحالة لغاية ما وصل فندق بدمشق كان متعود ينزل فيه ايام ما كان ينزل مع الشباب . غير اواعيه واخذ دوش ونزل مشان يتعشى . ترك سيارته بالفندق وصار يمشي الساعة كانت بحدود العاشرة مساء والشوارع كلها صاحيه . تعشى ورجع على الفندق حط راسه وبدون ما يفكر بشيء حاول ينام . ولما صار يفكر بلينا وحلا واللي عمله كان ابليس قاعدله .....اقل من خمس دقائق وكان بسابع نومه ......

اما لينا . فكانت مشاعرها لسة مخربطة . غلطانه ؟ لا مش غلطانة . والواقع انه لينا ما كان بنيتها تعمل هيك واصلا السيارة مش هالشيء الاساسي وكان ممكن بسهولة انها توافق . لكن العناد مثل ما بيقولو كفر .
الشيء الاكيد انه ما في نوم هاي الليلة وهي اصلا مش مصدقة انه سافر . وما بين الافكار والدموع والحسرة راحت هي كمان بسابع نومه .

اما في الصباح . صحي سامر بدري شوي . طلب فنجان قهوة ووقف على الشباك . كان يفكر شو الخطوة الجاي . يرجعها ؟ يتركها شوي خليها تتعلم ؟ طلاق ؟ شو الحل ؟ يخبر اهله باللي صار ؟
والا يحاول يحل المشكلة لوحده مثل ما تعود دايما .. طول عمره كتوم وما بحب يشرك الناس بمشاكله . والقاعدة الذهبية تاعته :" داري على شمعتك تقيد" . اخر شي توصله انه هلا بعيد وبحاجة الى فترة يصفي تفكيره ويهدئ غضبه بعدين بيحلها الحلال . لبس اواعيه ونزل . ترك السيارة بالفندق وصار يمشي بالشوارع يدور على مطعم صغير يفطر فيه .

لينا راحت على دوامها عادي تركت الصغيرة عند امها . الزعل وقلة النوم كان مبين عليها . الاجازات غير مسموحة . الا الطبية طبعا وهي ما مالها اشي . يعني مضطرة تكمل نهارها ودوامها . مهما حاولت المرأة انها تكتم مشاعرها الا يبين عليها . وهذا اللي خلى المعلمات زميلاتها يستلموها وحدة وحدة وطبعا من طبيعة النساء ايضا انهم مستحيل يخلو اشي يصير وما يستنذفوا طاقتهم من غير ما يعرفوه . مش مهم طبعا انهم يقدموا حلول او يساعدوا صاحب المشكلة لكن المهم بس انهم يعرفوا لاجل المعرفة وبالتالي ممكن يلاقوا موضوع يحكوا فيه في اوقات النميمة وفي الحصص الفاضية .
اجت المعلمة الاولى على لينا ولينا سرحانه واللي فيها مكفيها ..
- - لينا ؟ خير حبيبتي مالك ؟
- سلامتك . ما في اشي .
- شو ما في اشي ؟ شكلك ما مش مطلعة بالمراية اليوم ؟
- لا ما في شي . بس تعبانة شوي .
- لا هاد مش تعب . مالك اشي انت وجوزك ؟
- لا ...وين راح مخك ؟ اصلا سامر مسافر .
- اه من هيك . قديش صار له مسافر ؟
- امبارح .
- امبارح وهيك صار فيكي ؟ ايش بده يغيب ؟
- مش عارفه . يمكن اسبوع .
- وبدك تضلي على هالحال اسبوع . والله انك مسكينه . يا حبيبتي في نسوان جوازهم بتركوهم اشهر . وفي ناس بتغيب ستة كاملة .
- يا عيني انا مش زعلانه مشان هو مسافر . هو مسافر شغل . بس انا تعبانة شوي .
- رجعنا لتعبانه . انا متأكده انه في اشي مزعلك . ليكون حماتك ؟
- انا ما بزعل من حماتي . اصلا انا بعتبرها زي امي . وممكن ما تدخلي ؟ بقلك تعبانة . صدقتي حياكي الله . ما صدقت اشي بيرجع اليك . انا ما عندي اشي احكيه . سلام
وقامت من الغرفة مشان تلاقيها وحدة تانية . بس مقربة منها شوي .
- خير لينا وين رايحة ؟
- بدي اروح اتمشي شوي . عندي كمان حصة فراغ هلأ .
-بتحبي اجي معك ؟ شكلك مش طبيعي .
- لا خليني لحالي شوي . بس عندي شوية مشاكل . خلص بحكيلك بعدين .
في هذا اليوم قدرت لينا تحافظ على سرها وما تخبر حدا . ولما روحت قعدت مع امها الا ما كانت محضر خير . لانه في بعض امهات بيشوفوا الوضوع من ناحية وحده وبس . بدها بنتها تكون حرة حالها. الها كلمتها والها كيانها . فصارت تعطيها نصائح انه الرجال دايما عينهم زايغة . وانه الرجال ما عليهم امان . والزلمة لما الله يفرجها عليه بصير يفكر بالثانية. لكن الواقع انه لينا مش هاذ الكلام اللي كانت حابه تسمعه هي كانت بحاجة يحكيلها انها غلطانة حدايعطيها المبرر مشان ترجع لسامر . وكان هذا الشخص هو بلا شك ابوها . حيث انه كان صارم جدا معها وبحكم خبرته ومعرفته بطريقة تفكير الرجال كان ممكن يتصور كيف سامر بيفكر . عدا انه كان دائما معجب فيه .

وفي لحظة روقان اخر النهار قعد ابوها معاها . وبين الها افضل الطرق للتعامل مع الرجل . ومع انه وظيفة الام الا انه ابوها وفي هذه المشكلة بالذات حس انه لازم يتدخل ولازم يتدارك الامور قبل ما تتطور . وعلى راي اللي قال : هم البنات للممات .
بعديها قررت لينا انها تتنازل مرة تانية وتتصل لكن التلفون كان مغلق . حاولت اكثر من مرة بدون فايدة . واتصلت ببيت اهله . ردت امه .
- مرحبا خالتو
- (لسه بتقلي خالته ) هلا حبيبتي . كيفك ؟ وكيف حلا ؟
- الحمد لله . طمنيني عن صحتك .
- ماشي الحال . الحمد لله .
- بتصل علةى سامر تلفونه مسكر . هو عندك ؟
- ليش هو رجع ؟
- رجع من وين ؟
- شو بتتهبلوا علي انتي واياه ؟ مش سامر سافر اول امبارح للشام ؟
- شو ؟ اه ... انا قصدي ......انه .......
- ولك مالك لخمتي ؟
- لا ولا اشي . بس انا قصدي انه ما حكى معك لانه تلفونه مسكر .
- اه . ما حكى معي . يعني هو بده يحكي معي قبلك ؟ اسمعي . بكرة انا طابخة ورق دوالي . بتروحي عندي بتتغدي .
- لا ريتك سالمة . والله بروح تعبانة .
- اسمعتيني حكيتلك " شو رايك " او اخذت رأيك بالموضوع انا ؟ هذا قرار . بتيجي يعني بتيجي .
- طيب خلص لا تعصبي . حاضر
- يلا بوسيلي حلا ولا تتأخري بكره . واذا بتحبي جيبيها الصبح .
- لا ما في داعي اجيبها . ان شاء الله ما بتأخر .
- الله معك .
- تصبحي على خير .
كان واضح انه حماتها فهمت الموضوع . وانها رح تنفش طرحتها بكره . شو هالورطة هاي ؟؟؟؟؟؟؟
تاني يوم بالمدرسة بدأ القيل والقال . والاستنتاجات الغبية . بس لينا كانت اليوم اقوى من امبارح لانه ابوها رفع معنوياتها كثير . ولما حاولت وحده من زميلاتها تنكش الموضوع راحت لينا غيرته . وحكت للكل انه حماتها عازمتها على ورق دوالي مشان تقطع الاشاعات .
بعد الدوام راحت على بيت حماتها . اللي طبعا ما فتحت الموضوع . واستنت لغاية ما خلصوا اكل . وجلو الجلي وعملوا شاي وقعدوا بالبرندة يشربوا شاي . ام سامر زحلقت الكل وخلت لينا .

- ها يا لينا . مالك انت وسامر ؟
- ايه ؟ ما في اشي . ليش هو حكالك اشي ؟
- ليش هو سامر عمره حكالي اشي ؟
- ما في اشي . خلاف بسيط .
- خلاف بسيط . بتحردي عند اهلك والولد بيهج برة البلد ؟؟
عاد هون لينا ما مسكت حالها .....وصارت تعيط . وبعد موشح عياط . حكت لحماتها كل اشي من البداية للنهاية . مع التأكيد انه مش قصدها وانها ندمانه .
ام سامر كانت كثير عاقلة . ورغم انها مرات ما بتطيقها للينا الا انها كانت عارفة انها بنت حلال وطيبة .
المهم هدأتها وقالتلها انها ما تهتم ولما بيجي سامر بيصير خير . والموضوع مش مستاهل كل هالقصص .
سامر كان داير بالشوارع من مطعم لمطعم ومن قهوة لقهوة . ولما صابه ملل اول يومين بسبب انه غير مستمتع بالرحلة . لانها مش رحلة . هي هروب من الواقع والانسان اللي طول عمره بيواجه المشاكل بقوة وجرأة صعب عليه يكون جبان ويهرب من واقعه .
طول الوقت كان بيفكر شو يعمل . لكن مخه سكر . وحس انه بحاجة ياخذ راي حدا تاني . وبصراحة عملية الاستشارة من طباعه . لكن الوضع في اشي غلط . " ما خاب من استشار " عمره ما عمل فيها لكن على الاقل كان بحاجة الى انه يفضفض . يصيح يبكي . اي شي يعبر عن مشاعر الغضب اللي جواته .
بعد تفكير كثير . ما قدر يقرر مع مين يحكي ويفضفض الا امه .
الساعة 11 بالليل رن على امه . اللي كانت شبه نايمة
- السلام عليكم
- وعليكم السلام . وينك انت يمه .
- ما انا قلتلك اني بشغل بالشام .
- ولك يا كذاب . انا حكيت مع الشغل حكولي انك بأجازة . شو بتسوي بالشام ؟
- يعني . شوي كنت تعبان . قلت اغير جو .
- وبتترك مرتك وبنتك وبتروح تغير جو ؟ ولك انت ما بتستحي ؟
- يا امي انا متصل مشان اشكيلك . وانت نازلة في بهدلة ؟
- اسمع ما الك معي حكي على التلفون . بتسحب حالك وهسة بتطلع على عمان .
- يا امي تعبان والساعة 11 يعني رح اوصل الفجر . وما بقدر اسوق وانا تعبان .
- طيب . الله يحميك . بكره من الفجر اطلع . يعني صلي الفجر واطلع عللى طول . انت لسه بتصلي ؟
- له يا امي . وليش بدي ابطل ؟
- يعني .....الشيطان شاطر . وتشوف حالك داير على راسك بالشام .....
- يا امي وين راح فكرك . اي والله ما انا طايق اتطلع بحدا . خلص الصبح باجي

وفعلا الصبح كان متوكل على الله وطالع . وصل قبل الظهر بشوي . وعلى طول على بيت امه . كانت المفاجأة الحلوة انه حلا عند امه . طبعا نسي الدنيا كلها وراح على حلا . يبوسها ويلعبها . وبعد شوي اجت امه حاملة صينية القهوة وقعدت معاه .
- ولك انت شو اللي عملته هاد ؟
- يا امي انت ما بتعرفي اشي . خليني اقللك
- لا تقول ولا تعيد ولا تزيد . انا بعرف كل شي . اجت عندي لينا وحكتلي كل اشي . واليوم بس تيجي تاخذ البنت وبتاخذ مرتك وبتروحوا على بيتكم .
- الا هاي يا امي .
- نعم ؟
- يا امي الموضوع مش لازم يمر هيك مرور الكرام . لينا غلطت والاعتذار ما بيكفي . لازم تتعلم من غلطتها .
- يا ابني البنت عارفة غلطتها . وندمانه .
- وعد يا امي اني ارجعها . بس خليني اسوي اللي براسي . هلا بس تيجي احكيلها اني ما اجيت . واني رح اوصل المسا .
- بس ......
- ما بسش . خليني اسوي اللي ببالي الله يخليلي اياكي
اضرت امه انها ترد عليه بما انه وعدها انه يرجعها . اما هو سحب حاله وطلع على بيته يغير اواعيه . ويجيب كم غرض .
واجت لينا وصدقت انه لسه للمسا لغاية ما يوصل . لكن المشكلة انه المسا ما حكى سامر معاها . وصارت الدنيا عشا ولسه ما حكى . لينا مش مطمنه . رفعت تلفون على امه اللي خبرتها انه موجود . لكن سامر بصوت عالي صيح : ما بدي احكي مع حدا ...........

سكرت لينا التلفوتن وهي بتعيط . ابوها فهم منها الموضوع . قام اتصل مرة تانية وطلب يحكي مع سامر .
- اهلين عمي
- الحمد لله على السلامة .
- الله يسلمك .
- شو يا عمي . شو القصة ؟
- اكيد انت عارف القصة .
- انا عارف . بس يا ابني مين فينا معصوم ؟ مين فينا ما بيعمل اخطاء .
استهدي بالله وهي مرتك بستناك . تعال وخدها وما بيصير فالك الا طيب .
- يا عمي انا ما باجي ارحعها . زي ما عرفت طريق الطلعة . الاولى فيها تعرف طريق الرجعه .
انا ممكن اسامح طلعتها بدون اذني . ويمكن انسى النقاش اللي صار . لكن مستحيل اجي واصالحها . انا بعطيها فرصة لغاية ما ارجع من الشغل تكون بالبيت وبعدين بنتفاهم على باقي الامور . اذا ما كانت فهاي رح تكون الفرصة الاخيرة .
- انت لا تفكر اني انا بترجى فيك ترجعها . انا بدي مصلحتكم انتو الاثنين سوا . بس قلة الهيبة انا ما برضى فيها لبنتي .
- يعني وبترضاها الي ؟ انا هاد شرطي الاساسي . اذا بدو يكون في نقاش فهو في بيتي . ومرتي جوة البيت . اما اجي مشان اصالحها هاي بعيدة عن عيونها . انا ما غلطت فيها . بالعكس هي اللي تركت البيت من دون اذني . وهاي شغلة ما بينسكت عليها . بترجع على البيت بيكون في حكي . وهي عندك انا ما الي كلام مع حدا .
- طيب خلص . الله يجيب اللي فيه الخير . سلام
- سلام
نطت امه
- يمة يا حبيبي ليش هيك انت ؟ من وين جايب العقل التنح هاد ؟
- هذا مش عقل تنح . هاد الصح . اي شي ممكن اتجاوز عنه الا طلعتها من البيت وقال شو حردانه . انا حكيت معاها وعرضت عليها ترجع من اول ساعة . بس هي ركبت راسها . لازم تتعلم .

هاي الليلة ما حدا نام . حتى حلا قضتها عياط ونكد . ولينا ما راحت على الشغل من كثر الارهاق والنكد . وسامر برضه ما راح على الشغل ولسة اجازته ما خلصت .
الصبح من اوله عصيب . وام سامر اللي قضت الليل تهدي عليه . صبحت على نفس الموال وهو دان من طين ودان من عجين
- يا امي انت لسة ما شفتي اشي . هاي فرصة بعتلي اياها ربنا مشان اعيد تنظيم حياتي الاسرية وما لازم اضيعها . انات بحب مرتي وبموت فيها . وما رح اتنازل عنها . لكن مشان ما اخسرها في يوم من الايام لازم يصير هيك .
- الله يوفقك يا امي ويهديك ...........

--------------------------------------------------------------------------------

الحلقة الثالثة والعشرون








مع فنجان قهوة الصباح اللي حضرته ام سامر لابو سمرة النكد . اجت عليه مبتسمة وكان في على الصينية فنجانين يعني الست الوالدة طنشت نصيحة الدكاترة ورح تشرب قهوة مع سامر .
- صباح الخير
- صباح الخير . شو شايف جايبه فنجان قهوة ثاني .مش خايفة من الضغط ؟
- لا لا تخاف ضغطتي مرتفع من ليلة امبارح . والبركة فيك .
- مني انا ؟ الله يسامحك .
- يمة يا حبيبي . ش اللي بتعمله هاد ؟ يعني هي بنات الناس لعبة ؟ والزلمة اللي كسر خاطره مشان بنته وحكى معك . ما اله شان عندك؟
- يا امي مشان الله افهميني . انا تنازلت كثير . كل اللي بدها اياه عملته . شايلها على كفوف الراحة . وبتحمل كلام امها اللي انت مش غشيمه عنه وبحكي بسيطة . كله مشان الواحد يكوّن عيله . ويريح راسه . بس اللي عملته والله كتير . بعدين انا سامحتها . بدها ترجع على البيت اهلا وسهلا . بس انا ما بجيبها . طلب كبير هاد ؟
- اه كبير . لانك بتحسب عليها وما بتحسب على حالك . انت عارف وضعك منيح . ليش بتشتريلها سيارة بالاقساط ؟ بعدين انت ما قدرت تقتعها بالمنطق والحكي المنيح . زي عادتك . عصبي ومخك خزق .
- والله يا امي حكيت معها منيح . بس هي عنيدة وبها قرصة ذان .
- انت اللي بدك قرصة ذانتين . بتكذب علي وبتروح بتهرب على الشام . تقول لا الك اهل ولا الك بيت ومرة . وهربت زي الولاد الصغار ..
- طيب انت ليش زعلانة ؟ انا بشارطك انها رح ترجع لحالها اليوم .
- ومن وين جايب هالثقة ؟
- انا بعرفها منيح . ما رح تطيق العيشة بعيد عني .
- خزاة العين عنك شو ماخذ بحالك مقلب . اسمعني منيح . مادامك متأكد اها رح ترجع وانا كمان متأكدة . يعني اللي براسك رح يصير . لكن الشطارة انك ما تكسر بخاطر المرة . والله يا امي انت الخسران . لازم المرة تحس انها مطلوبة وانه جوزها بيحبها . اسمع من امك وان شاء الله عمرك ما بتخسر . لا تخليها ترجع خجلانه وراسها بالارض . الا اذا كت بدك وحدة تظل تقلك حاضر سيدي . وكان من الاول ما اخذت وحدة زي لينا . يا امي الحياة مشاركة واخذ وعطا . اعطي حنية اليوم بتاخذ احترام طول العمر . الزلومية مش صياح وكشرة وعناد ......

- .......................
- ليش ساكت ؟ مش عاجبك كلامي ؟
- لا والله بس بفكر .
- ولك بشو بتفكر ؟
- يعني بالموضوع ككل .
- يا امي ما بدها تفكير . صلي على النبي وتوكل على الله . والرسول عليه الصلاة والسلام قال : اوصيكم بالنساء خيرا . هذا هو الخير اللي بتعمله لمرتك ؟
- عليه الصلاة والسلام . طيب خليني افكر بطريقة تانية بدون ما اروح عندها .
- الله يرضى عليك . احضرلك فطور ؟
- لا لا . بس يعني عملتي القهوة وشربتيها ؟ اعمليلي غيرها .
- يسعد عينه حبيبي . من عيوني .
راحت تجدد امه قهوة وهو صار يفكر بكلام امه . والله انها اشطر من تعون تنظيم الاسرة . ومن نعون حقوق الانسان . لازم يحطوها وزيرة بلديات . شو بلديات ؟ وزيرة شؤون اجتماعية .... في هيك وزارة ؟ لو ما في يفتحوها .......

اما لينا فكان نهار عصيب كالعادة من يوم ما تركت بيتها . وكانت تشغل حالها بالحصص او بالقراءة وبالفرصة كانت بدها تروح على المكتبه مشان تبعد عن المعلمات واسئلتهم . وهي راحة نادتها الفراشة وكانت حامله بوكيه ورد كبير بيجنن . وقالتلها في واحد تاع محل ورد جاب هذا وقال انه الك . وعليه كرت ........

اخذت الورد . وفتحت الكرت . كان فاضي بس مكتوب عليه : بحبك .
ما عرفت شو تعمل . اكيد هاد من سامر . بدها تضحك . او تعيط . او بدها ترميه بالزبالة او بدها تحضنه . مش عارفه شو تعمل . ........المهم راحت على غرفة المعلمات وسط التعليقات السخيفة . واللي كانت شاكه اتأكدت . واللي ما كانت عارفة عرفت . بس هي طلعت اذكى منهم وقالت انه سامر رجع من السفر وهاي طريقته الرومانسية مشان يخبرها انه رجع .
كانت بدها تتصل فيه . بس عاد رجعت كبرتها الها مرة ثانية . وحتى صارت تفكر انه لما يرجع تسوق فيها وما ترضى ترجع معه مباشرة . طبعا هاي مجرد افكار ما رح تنفذها لانها اصلا ما صدقت على الله .
وضلت حايصة تستنى الدوام يخلص . كانت مستعجله تروح تضبضب اغراضها . وتلبس وتزبط حالها بما انه الليلة اكيد جاي .
طلعت من باب المدرسة وهي طبعا حالفة يمين ما تسوق السيارة كانت لسه بدها تستنى تكسي .كانت حاملة بوكيه الورد . كان نفسها تكون سيارتها معها بدل هالشعتله . اتطلعت قبال المدرسة لقيت سيارتها صافة وسامر واقف برة السيارة وراكي على الباب . ولما شافها راح عليها واخذ منها الورد وقالها مع ابتسامة خفيفة : يلا .......
عاد هي كبرت براسها .
- شو يلا هاي ؟
- شو ما بدك تيجي معي ؟
- مش هيك بس مش يلا .......احكي مرحبا اول ...
- مرحبا اول . خلصيني ما انت شايفة الازمة ....
طلعوا بالسيارة .
سامر : - شو من وين هالورد الحلو هاد ؟
- ما رح ارد عليك . انت جاوب اول . شو جابك هون ؟ وليش ماخذ سيارتي ؟
- اسمعي . الشغلة مش ناقصها هبل . هلا بنروح بنتغدى وبنحكي .
- وين نتغدى ؟
- صحيح . احكي مع امك قوليلها بدك تتأخري شوي . ما يستنوكي على الغدا . وخليها تدير بالها على حلا .
- طب منيح انك متذكر انه عندك بنت .
- افففففففففففففففففففففففف . والله صار لي اسبوع مرتاح . حدا بيجيب وجع الراس لحاله ؟
لينا حاطه الموبايل على ذانها وردت : شو حكيت ؟
- سلامة عمرك . لا تجيبي سيرة انك معي .

.
- ماشي ماما . لا مابتأخر .سلام
وصلوا على باب المريديان . وقف سيارته زي شيخ الشباب . اجى واحد فتحلهم البواب . وواحد اخذ المفتاح مشان يصف السيارة .
لينا مصدومة
- طب بدي اروح على الفندق بأواعي الشغل ؟
- يا حبيبتي هاي المفاجأة . يعني بدك اياني احرقها واقلك من امبارح البسي حلو بدي اجي اصالحك ؟
- انت من امبارح مقرر تعمل هيك ؟
- ايش ؟ حبيبتي انا مقرر من الشام اعمل هيك .
- نفسي اصدق .
- وانا كمان ........
المطعم الصيني بالمريديان اشي ما حصلش . قعدة حلوة واكل زاكي . كان حاجز طاولة بزاوية مرتبه . وبد ما اكلو اللي فيه النصيب . .......
لينا : - صار لي فترة ما اكلت هيك .
- اي انا ما كنت استطعم بالاكل بلاكي .
- حبيبي . بلاش الحركات هاي علي . انا بعرف انك لما تزعل بتاكل اكثر . ولما تفرح بتاكل اكثر واكثر .
- شوفي الاكل متعة . وانا ما عمري استمتعت بالاكل زي ما بستمتع فيه معاكي .

- طيب . شو خطر على بالك تعزمني هون ؟
- معاي مصاري زيادة . قلت نسبب هالمطعم .
- هي هي هي . يا خوفي تدفع نص راتبك على هالغدوة .
- فداكي . المهم تكوني مبسوطة . خلينا نخلص المواضيع قبل ما نروح واروح عند اهلك اصلح ابوكي .
- حبيبي ما في مواضيع . اعمل اللي بدك اياه وانا موافقة .
- شو هالعقل اللي نزل عليكي ؟
- احكيلك بصراحة . انا كنت ناوية ارجع اليوم لحالي . بس صدقني كنت رح تلاقيني جسد من غير روح . يعني حياة وبدها تمشي . بخيرها وشرها . بس هلأ . عرفت قديش انا بحبك عن جد . وحسيت قديش انت طيب . وخلال الفترة اللي مضت عرفت اني كنت غلطانة . بس مش ندمانة . لانه الحياة تجارب . وهيها فرصة فرجيتني قديش انت رومانسي ..........
- الله يسهل ليكي يمة .
- و جاب سيرة امك هلأ ؟
- ايوااااااا . الا امي . والله لولاها ما صار اشي ........
- يعني امك اللي حكتلك تعمل هيك ؟ يعني انت ما كنت ناوي تيجي . وانا مفكرتك جاي لانك بتحبني ....
- طنيب على ولاياكي وطي صوتك فضحتينا ............ولك احنا بالمريديان مش بمطعم ابو موسى تاع الكرش .
انا قصدي انه امي الها وجهة نظر فيكي . انك فهمانة . يا ريتها معانا وتشوفك على حقيقتك . صحيح انك مشطوبة .
- هي هي هي . بمزح معك انت صدقت ؟
طب يلا حضري حالك .
وطلب الفاتورة ........فنجر عيونه . وحط الكريدت كارد بالصحن .
- قديش الحساب .
- انسي حبيبتي . المهم انبسطتي ورجعنا سوا .
رجع الجرسون ..وقعله على ورقة الفيزا ..وحط خمس دنانير بخشيش .
- ايش الخمس ليرات هدول ؟ معقول بس هيك الحساب ؟
- ولك انت هبلة ؟ انسي خلص يلا بدي اشوف حلا .........

وصلو على بيت اهلها . كان ابوها وامها موجودين . سلم عليهم وبوسهم . ضله حامل حلا ويلعبها لغاية ما عيطت قامت لينا اخذتها . امها حاولت تفتح الموضوع بس ابوها سكره . يا دوب شرب فنجان القهوة . ومسك حماه على جنب واعتذرله . الحماه كان نفسها تنط بكرشه . بس جوزها اللي طلعت مراجله على كبر كان يجحرها كل جحرة ولا اختها فتلبد على طول .
وصلوا على البيت . اتصل بامه وخبرها . وحكت معها لينا هي طايرة من الفرح .......

بعدين سكروا الموبايلات ..........وعات ايام العسل لاولى ............