
السلام عليكم
تحياتي القلبية لكل الحوائيات
مبدئيا حبيت انزل لكم هالموضوع على اساس ان كثير من الحوائيات كانوا يسألوني عن الطريقة
سواء كان في المنتدى او عن طريق الخاص
لهالسبب اني اليوم جيت ومعاي الصور التوضيحة واتمنى من البارئ عز وجل ان يجعل مجهودي
هذا محط فائدة بالنسبة لكم
بس لي رجاء عندكم
هالله هالله في الدعاء لي بظاهر الغيب فانه مستجاب
ألحين نبدأ
الجهاز اسمه : جهاز تحضير الرز او الرايز كوكر rice coo ker
الماركة : اللي عندي ماركة هيتاشي وبعد اربع سنوات ونص حسيت انه تعب فشريت لي واحد ثاني ماركة فليبس اكبر منه بالحجم بس ما زلت استخدم القديم والجديد حسب الحاجة
فيه بالسوق ماركات كثيرة فيه الاصلي وفيه التقليد
وكلهم يشتغلون بنفس الطريقة اهم نقطة بالنسبة لي وقت الشراء هو كم لتر تحتاجين لان فيه بعض الاجهرة مرة مرة صغيرة وهذه ما تفيد مع الايام على الاقل الحجم المتوسط يكون معقول في الاستخدام
المميزات : يحضر لكم الرز في وقت قياسي حسب الكمية طبعا
يطلع لكم الرز مفلل وحباته حلوه
يرفر عليكم الوقت الكثير
سعره : حسب الحجم او سعته
فيه منه صغير وفيه من الكبير وما كثير غالي يعني والسعر على حسب الحجم والماركة
وين تلقونه : عاد أهني السموحة لآني ما شاريته من الكويت ولا السعودية
فما بقدر اساعدكم في هالجواب بس الاخوات الي عندهم اياه
او عندهم خبرة في هالموضوع يتفضلوا بالجواب واكون لكم من الشاكرين
كيفية الاستخدام :
طبعا الجهاز ما يحتاج تسخين ولا شي
مجرد كابس الكهرباء تثبتونه و تشيلوا الغطاء
وراح تشوفون القدر شلون هو فاضي وفيه تدرج بالجدار
بصراحة اني ما اهتم للتدرج كوني متعودة اطبخ وعارفة القياس
والقياس هو لكل كأس رز بتحتاجون لكاس ونص ماء
واللي يتعود عليه بالنظر يقدر يضبط الشغلة
مجرد انكم تحطون الكابس في الكهرباء راح يولع الليت الاحمر وراح تشوفون ان المؤشر على خانة التسخين
ألحين شنو بتسووون
راح نبدأ اولا بالرز الابيض العادي او المشخول او الستيم رايز
تاخدوا الرز مع الملح اضافة لآي نكهة تحبونها اني في هالطبق استخدمت ورق كرافت وراح تحطون هالاشياء في القدر

ألحين تضيفوا الماي عليه واني افضل اضيف ماء ساخن علشان يوفر علي وقت بالطباخ وراح يصير بهالشكل

كل اللي عليكم تسونه ان تغيرون كبسة الزر من التسخين الى الطباخ مثل ما هو واضح عندكم بالصورة
وتغطوا القدر بالغطاء وتتركونه

وخلاص القدر راح يقوم بالواجب بنفسه
بعد حوالي ربع ساعة راح ينشف الماي و يصير ليكم الرز بهالشكل تقريبا

بتحتاجون انكم تقلبون الرز مرة ومرتين بس مو اكثر علشان تتجانس النكهات وعلشان يطلع البخار
واول ما يصير الرز جاهز راح تسمعي فيها صوت طقة كبسة الزر اللي تحول فيها من طباخ الى تسخين مرة ثانية وخلاص صار الزر جاهز للتقديم وتقدروا تسكبوه في الصحن
هذه طبعا هي الطريقة الاساسية لتحضير الرز بس مو معناته ما تقدروا تغيروا
خلصنا من الرز الاساسي نقدر بنفس الطريقة تقدروا تسوى الرز بالزعفران
وبنفس خطوات التحضير بس في في المراحل الاخيرة وقت الترسي تضيفوا ماء الورد والزعفران في مرحلة التسخين النهائية

وبعد ما تسمعوا الطقة ويرتفع الزر تقالبوا الرز بالملعقة وراح يصير الرز بهذا الشكل

وهذا اهني مع الدجاج على السفرة

تقدروا تعطوا نكهات ثانية
مثل اضافة مكعب دجاج وحبات الفلفل الاسود للماء اول بداية الطباخ

والرز راح يطلع بطعم جميل وعجيب وهذا هو شكله و انا قدمته مع الدجاج المشوي وسلطة زيتون











