بنات الله يرضى عليكم انا اول مرة اشوف التجمع و حبيت استفسر منكم
بنت اختي يا قلبي عليها كملت سنه ما شاء الله بس لدحين للاسف ما تمشي او تتحرك و تتعب لو خلتها امي ع بطنها عشان تحرك راسها لانها للاسف ما تقدر غير هالفترة الاخيرة شي بسيط ( يعني احنا نشوفوا انوا تحسن الحمدلله )
انولدت ما شاء الله مافيها اي شي ربي يسعدها قمررر ما شاء الله طالعه و كونها اول بنوته عندنا من بعد العيال ما شاء الله عملنالها سبوع من تاني اسبوع بعد الولاده >> و ياريت ما عملناه للاسف من بعدوا ما قام وضعها يتغير
للاسف لاننا برى المملكه ندرس ف أختي ماكانت عارفه لما يجي لبنتها التشجنات انوا هذا شي مو طبيعي مررة خصوصا انها اخذتها للمستسفى اكثر من مرة والله يقطع ابليسهم ما عرفوا السبب و قالوا عادي مافيها شي و ان شاءالله مناعتها الطبيعية تتقوى و تحارب هالاشياء
جلست ع هذا الحال قرابة 4 شهور , جات اجازة و نزلنا ل جده و قالوا بعد التشخيصات انوا عندها كهربا زايده بالمخ
احتمال بسبب انها ما بكيت اول ما انولدت و كمان طلع عندها نقص بالاوكسجين والله يسامح المستشفى مدري ليش تهاونوا بالشي هذا مدري يمكن للاننا مسلمين الله اعلم
كمان روحنا لمشايخ لان البنت ماشاء الله حليوة خفنا صار شي من بعد السبوع قولنا يمكن عين او مس او اي شي لا سمح الله >> فعلا قالوا اصلا انوا اختي معمول لها عمل بدليل لما شربت موية زمزم مقري عليها بعد كم ساعه قامت تحس بمغص قوي والله يكرمكم نزل منها زي كتل الدم السودا
وقالوا ان الشي هذا اتنقل لبنتها حتى حبيب لما تسمع سور معينه من القران كانت تموت من البكااا و قومنا اخذنا من كل العايلة اثر و غسلناها فية بس ما تغير شي وحتى لما فكرنا ناخذ اثر من اللي حضر السبوع للاسف الاغلبية سافروا كل وحده ع بلدها
وربي انكسرت فرحتنا بيها و شلناا كلنا همها و صرنا مضاايقين كثير عليها >> رحنا مكه و المدينه ودعينالها من قلبناا
طبعا جلست تتعالج بالادوية فقط طووول هالفترة كانت تقريبا شهرين وحتى لما رجعنا تاني عشان الدراسة برضوا علاجها كان بس بالادوية
لكن قبل فترة قالوا الحمدلله الكهرباء رااحت ربي لك الحمد >> بس لاحظنا انوا اوقات يجيها تشنج ع بسيط مو زي زمان ربي لك الحمد (كيف طيب معقولة راجت الكهرباء ولسى التشجنات)
اختى مسكينه تعبت كثير معاها لانها حتى النوم ماتناااااام الا كم ساعه بس قليله مرررة و تقوم منها
قبل شهرين جات الوالده واخذتها عشان تساعد اختي لانها بقوة صارت جلد ع عظم مقهورة ع بنتها فرحتها الاولى
حاليا صايرة شبة احسن لانها صارت من يد ليد ( من امي لابوي لاخواني ) بس لسى ابدا اللي يشوفها يقول طبيعية بس مي اكبر من 4 اشهور او خمسة بالكثير
يعني قامت تناغي شوية و تعصب لو نامت ع بطنها و لو طفينا النور و ممكن حرك راسها ع خفيف مرررة ممكن ما يتلاحظ لو سمعت شي قريب من اذنها لكن مو كل مرة (مرة كل يمكن 10 مرات او اكثر)
وزنها اقل من الطبيعي ب كيلويين تقريبا
المشكلة ان ادوية التشجنات لدحين تاخذها و هي سبب ف خمولها
ابغى اعرف ف فرق بين الشلل الدماغي و نقص الاكسجين؟
ممكن مع العلاج الطبيعي نشوفها تمشي و تتحرك و تتكلم ياارب؟
التشنجات الحمدلله خفت كثير عن اول و لو جات تكون بنسبة بسييطه (تتوقعوا لو وقفنا الادوية حق التشنج كويس ولا لاا ) لازم نكلم الطبيب؟
تعتقدوا انوا لو صار حمل تاني ممكن يطلع نفس الشي لا سمح الله؟
اعرف وحده هنا معايا ولدها كان ياخذ دوا للتشنجات لغاية 6 شهور بعدين جاه دكتور تاني و قال خلاص يتوقف العلاج
هو حاليا عمروا تقريبا نهاية 3 سنين بس ما شاءالله صار يمشي من قبل لا يكمل سنتين ع قولها و يتكلم صح مو كل الكلام نقدر نفهموا بس اشوفوا طبيعي كونوا ف السن هذا غالبا الام تكون ادرى بكلام ولدها و يستوعب ما شاءالله
يمكن صح جسموا نحيف بس انا اقول عادي لان اصلا الام والاب نحاااااف , و يمكن الشكل من عند عينوا تحسي كانوا فية شي بس الحمدلله اشوفوا جداا عاادي
ممكن بنت اختي تكون زي كدا ولا لا سمح الله راح تمر بالمراحل اللي ذكرها اغلبكم؟
نفسي والله اشوف الابتسامه والفرحه ع اختي لاني حااسه مررة بيها حتى دراستها للاسف اهملتها بس صابرة عشان مصاريف العلاج كونها ع الحكومه تكون لانها للاسف هي و زوجها مبتعثين و مالهم وظيفه
وصارت مسكينه شايلة هم اكثر كيف لو خلصت ورجعت راح تقدر ع مصاريف العلااج والله مي قليلة و انتوا ادرى اكيد
ما تبغى تهملها و مي عارفه كيف تعالجها من بدري خصوصا انوا لدحين محنى لاقيين مركز سعروا معقول للعلاج الطبيعي
آآسفه ع التطويل بس والله انقهرت ع اطفالكم و بنت اختي و حابة اعرف اجوبة للاسئلة عشان نطمن و نشوف كيف نتصرف
والله يشفي كل مرريض يارب
تجمع امهات اطفال نقص الاكسجين والشلل الدماغي (( الثاني))
متابعة النقاش، صفحة 340