زوجي يحبني بطريقة مريضة.. افكر جديا بالطلاااق.ومحتاجة رأيكم جزاكم الله خير. / تم الرد

السلام عليكم بنات..
مالي غيركم افضفض له.. عشان ما ادوش اهلي بمشاكلي..
لاني لو علمتهم بوضعي معناته بتنتهي حياتي مع زوجي..
لان اهلي ولله الحمد مايرضون لي انذل واتمرمط..

انا يا بنات متزوجة لي سنه ونص وعندي ولد عمره شهرين..
اول ماتزوجت كان زوجي طاير فيني طبعا..
وبعد شهر كنا نسولف وقلت له مره.. انا احلى بكثير منك..
هالجملة يا بنات الى اليوم حازة بخاطر زوجي..
وهو فهمها بطريقة: احمد ربك اني قبلت فيك! وانك مو عاجبني!
خاصة ان تعليمي عالي وهو تعليمه ثانوي..
واهلي فعلا ناس راقيين وهو من عائلة شعبيه..


من بعدها وزوجي يحاول يشتري لي اغلى الاشياء..
على اساس ما اقل عن مستوى اخواتي وصديقاتي واهلي..
لكن يتمنن علي فيها..
يعني يقول كذا مره ترى الطقم اللي شريته كلفني كذا..!!
او يذكرني كل شوي انه اخذ لي شنطه بالمبلغ الفلاني..!!
رغم انه يكون جايب الشي من نفسه.. بدون ما اطلب..

بنفس الوقت يحاول يحبط من قيمه شكلي وعقلي..
دايما يقول: ترى جمالك مايهز فيني شعره..
وانتي حدك تنظيف البيت لان مخك فاضي!

ودايمااااااا نيته شينه.. يفسر بطريقة غلط!
ويحس على طول اني ما احبه..
مو واثق في انه مالي عيني.. ولا من حبي له..
واذا قلت له اني مع العشرة حبيتك..
يقول لاني صرت اعطيك على راسك!!
صار يقول: الحريم ماينفع معهم الا الدوس..

وللعلم.. يغيب عني بالعلاقة بالاسبوعين احيانا..
واذا كشخت او لبست حلو اختلق مشكلة..
يعني يحاول يحسسني اني ولا شي قدامه.. لا اثيره ولا اغريه..
وبفترة من الفترات كان بيفقدني ثقتي بنفسي..
وصارحته بهالشي.. وهو ابتسم وقال لي:
مانسيت جملتك اللي قلتيها اول ما اخذتك..
عشان كذا صرت اذا شفتك مقبله علي عطيتك ظهري ونمت..
عشان تشكين بعمرك وما تغترين...!


من اخذته وانا اداريه واداري حساسيته الفظيعه..
ومتحملة سوء نيته..
لأني ادري انه يموت فيني.. بس اسلوبه يقرف..
جاني احباط.. كرهته وكرهت طاريه..
ويكفيكم اخر موضوع كتبته بهالقسم..
لما نكد علي بسبب تغير لون اباطي من الحمل..
رغم ان التغير سمار بسيط مو سواد!
وهو قال لي بعدها بيوم:
ترى انا متحمل هالشي عشانك وما انقرفت..
مع انو لو اللي فيني فيك كان قرفتي وعايرتيني!!
وهو والله ماصدق.. لاني فعلا حبيته..
بس هو دايم يحقر نفسه قدامي..
باختصار.. زوجي عنده عقدة نقص قدامي..
يحاول يغطي عليها بمحاولاته الدائمه للتقليل مني..
وانا تجيني اوقات اطفش من هالاسلوب واعصب واقول طلقني..
يقوم هنا يبكي ويترجاني ارضى..
ومره باس رجلي عشان اسامحه..


بس والله يا بنات ماصرت احبه..
نكده الدايم نزع حبه من قلبي..
تخيلوا من طلعت من النفاس ماقابلني بريق حلو..
يقول اخاف يكبر راسك.. بالله هذا كلام..
والبارح قلت له بروح لاهلي..
عصب هنا وقال توك جايه من عندهم.. انتي ماتبيني ومنتي قد مسؤولية البيت..
وحلف اتي ما اروح لاهلي هالاسبوع.. وجلس مسنتر بالبيت عندي..
رغم ان اهلي بنفس المدينة..


ومن يومين قال لي بنسافر برا انا واياك..
قلت له: حلووو.. احببببك..
قال: تحبيني بس عشان بسفرك..
انا هنا انقهرت مرررره وقلت له خلاص اجل لاتسفرني..
قال: كويس وفرتي علي 30 الف.. وقام وخلاني..


دايما يقارني بأخس انواع الحريم..
ويقول انتي انانيه..
وانا قسما بالله صرت له زوجه وحبيبه وصديقه وشغاله..
مع ذلك يقول انتي تاخذين ماتعطين..
واذا جلست اناقشه بهدوء.. مايسمع الا نفسه..
ماعنده استعداد يعترف بغلطته.. ومستحيل يلوم نفسه..
دايما يشوف نفسه الانسان اللي محد يقدر جهوده..
علما بانه احيانا يساعدني بشغل البيت وكل شي ابيه يجيبه..
وانا عالطالعه والنازله اشكره وابوسه وادعي له..
يعني احسسه بالامتنان على ادنى شي يسويه..


بالنسبة لشخصيتي فهي صريحه وعاطفيه..
وفيني ثقة بنفسي ولله الحمد..
ودايما احب اتدلع وادلع نفسي وامزح واتغنج..
وزوجي ينبسط على هالشي وتبهره حركاتي..
لما اغير صوتي واتكلم زي البيبي.. او اغمز بعيوني..
ولما اسوي اي شي واتفنن بالترتيب والديكور..
غير اناقتي وشياكتي اللي دايما تبهره.. حتى لو ماتكلم..
ويحكي فيني عند اهله بأني اتابع الموضه أول بأول..
ودايما يقولون له الناس: زوجتك رااااقيه..



انا فسخت دبلتي امس وهو لاحظ يدي..
وقلت له ما ابيك طلقني.. كل حياتنا نكد وهموم بسبتك..
قال انتي ماتستحين..
وطلع من البيت وتركني.. ورجع بعدها بنص ساعه..
واليوم ولدي يصيح الفجر..
شلته وانا اقول: الولد ينكد والزوج ينكد.. اففف قرفت..
وهو كان صاحي بس سوى نفسه مايسمع..





اضافة بعد التعديل..
بنات انا لا شايفه نفسي ولا شي..
بس جالسه اكتب لكم بعيون زوجي..
ومضطره اكتب الشغلات اللي دفعته للتعامل كذا معي..
وسالفة راقين وشعبيين.. هذي الناس قالوها ماقلتها انا..
انا تزوجته عن قناعه.. رغم ان اللي حولي استغربوا اختياري..
بس لاني جد حبيته وحبيت بساطته وتعلقه فيني..
حتى امي الله يطول لي بعمرها.. قالت لاختي بفترة الملكة..
استغرب اختك طايره كذا بالرجال وحبته على طول..
رغم انه اقل من عادي ومافيه زود عن غيره..
علما بأني امي كانت تتمنى لي شخص افضل.. وقالت هالشي لي..

انا ما سمعت لاحد.. واخذته..
بمزاياه وعيوبه.. حبيته وقبلت فيه..
والجمله اللي قلتها ببداية الزواج كنت اتغلى واتدلع وقتها..
يعني ماكنت اعايره.. بس هو خلاها شماعه لتصرفاته..
وسبق كلمت استشاريه عن زوجي.. وقالت عنده عقدة نقص!
صح ان كثيييير ناس يعانون من عقد النقص..
بس ترى لها اثار نفسيه مدمره.. خصوصا اذا توجهت للزوجه..


جربت امدحه واطيره للسماء..
قال ايه لاني ماصرت اعطيك وجه صرتي تركضين وراي!
جربت اطنشه واثقل عليه..
قام يتعمد يختلق مشاكل من امور تاااافهه بس عشان نتجادل ونتناقش..

ومرات يطلع لي بطلعات غريبة مدري من وين يخترعها..
مثلا: انتي تغارين من بنات اختي لانهم يحبوني!
انتي ماتحبين اهلي لانك تشوفين نفسك احسن منهم!

ومره يقول.. انتي ماتقدريني..
واذا راق يقول.. مستحيل القى زوجه تقدرني مثلك..
مدري يستهبل والا ايش!!!

واللي ماتنصحني بالطلاق فياليت تعطيني حل ثاني..
لاني تعبت من النكد معه..
احسه يتضايق اذا شافني مبسوطه.. يحب يقهرني..
غير كذا صار يتمادي بالتخاطب معي..
يعني وقت مايعصب يقول لي مثلا: غبيه.. طسي..
وانا وربي ماعمر احد قال لي هالكلام..
هو يحسب كل ماكسر عيني بيكسبني واركض وراه..
وانا بالعكس.. هالاسلوب صار يكرهني فيه..
بديت اعافه واعاف حياتي معه..