بسم الله بدينا
حيا الله خواتي المغتربات يالله كل وحده تولم كوب الكبتشينو وتجي تدلو بدلوها
أنا يا أخواتي عندي ولدين الصغير عمره سبع سنين والكبير عمره ١١ سنة الله يصلحهم
اللي لاحظته أن الصغير ما عليه خوف لأنهم بهالعمر عادة يلعبون على الصامت ما بينهم سوالف ونقاشات
وفيهم براءة يعني باختصار ما أشوف فيها أي قلق لو أختلطوا بأطفال غير مسلمين
لكن الهم الثقيل من الأطفال الكبار عشر سنين وفوق
بقولكم موقفي مع ولدي الكبير الآن هو في يير٦ وولدي هذا عقله أكبر من عمره بكثييير وعنده اعتزاز بالإسلام ما يقدر يخبيه مع أني مو متشددة لا أنا ولا أبوه لكن من كثر ما يقرا ويطلع
أحنا ساكنين في مجمع في البداية كنت مرتاحه لأني ما أشوف ظل طفل نازل
لكن ألحين طلع لنا ثنين الله يستر منهم واحد منهم في نفس فصل ولدي
ويا ليته أنجليزي كان أهون
أصله من كوبا وتوه جاي بقراطيسه وتخبرون أهل كوبا مواضيع الجنس عندهم مثل السلام عليكم المهم الولد الكوبي بدا يفتح هالموضوع لا بعد يبي ولدي يساعده عشان يقبل بنت في الكلاس معهم !!!! تخيلوا .. لأنه جديد وما يعرف أنجليزي يبي ولدي يفزع له ...
أنا طبعا وولدي يقول السالفه أحس أني عرقت وبردت أعصابي بغى يجيني جلطه
المهم ولدي يقول حاولت أصرفه يا ماما بس ما يفهم علي .... ولدي كان يسفهه أحيانا ويهاوشه أحيانا يقوله خلاص أنت مو صديقي
بس الولد ملزم إلى أن وقع المحضور .... وهالكوبي قبل البنت وفي الكلاس ومو مره وحده لا ثلاث مرات
والله ذاك اليوم جاني ولدي حايمه كبده ومتنفرز وفي نفس اليوم نزل نع ولد الجيران الثاني وأجتمعوا ثلاثتهم وقعد الكوبي يسولف عن مغامراته لين ولدي طرطع وقالهم كذا غلط وأحنا في الإسلام ما ينفع نسوي كذا سألوه طيب متى تسوي مثلنا قالهم لين أكبر وأتزوج
( أنا ماكنت متوقعة أن ولدي عنده هالمعلومة )
ولما قال هالكلام جلسوا يضحكون عليه قام هو طلع البيت وكان مره معصب وشوي ويبكي ليش يتريقون على الإسلام ؟!! ليش ما يحترموني ؟؟!! ومن هالحكي
أنا وقتها قلت له نهائي لا تفتح موضوع الإسلام مع أي أحد هم ما يعرفون شي عن الإسلام ولا يدرون وشو فطبيعي إذا قلت لهم عن أشياء زي كذا يضحكون ما يستوعبون ولا عمرهم قروا عن الإسلام
مع أني قد حذرته ما يفتح أي نقاش عن الإسلام لأنه قد صار موقف مع معلمته راح أقوله بعدين أن شاء الله
الآن أحاول قد ما أقدر أنه ما ينزل تحت ولا يختلط فيهم مع أنهم يحبونه بشكل و الولد البريطاني يوميا يحضر عند بابنا( شكل أهله مو لمه أبد) وكل يوم أصرفه وأحيانا أرحمه وأخليهم يسولفون عند الباب بس ....عشان أسمع وش يتكلون عنه ويكون ولدي تحت مراقبتي
طبعا أنا أشوف أنه أحسن شي الباب اللي يجيك منه ريح سده وأستريح
بعد فيه سلبيات أخرى غير هالموضوع بتكلم فيها
لكن بترك لكم المايك ألحين
•´`•. كوفي شوب المغتربات#2(أعياد الكفار الكرسمس مثالا) )
متابعة النقاش، صفحة 131