لا تدوري راحتك على حساب غيرك وخصوصا أمك

السلام عليكم ورحمة الله وبركاته


جميع من على هذه الارض له ظروف وأعمال ما تخلص ، ومن هنا اريد أبدا بموضوعي واللي لاحظته في هالايام ،


تتصل البنت على أمها انها جايه لزيارتها وطبعا يمة لا تنسينا من الغدا ، وتوصل البنت هي وبزرانها عند حزة الاكل ، طبعا هالبنت عندها كوي و تحميم عيالها وتلبيسهم فاخذ وقتها وما قدرت تيجي الا عند الساعه وحده ، والام مسكينه ذابحه نفسها تطبخ وخصوصا اذا ما عندها بنات او شغاله . والادهى اذا عندها مرت ولد تساعدها راح يوسوس لها الشيطان اني شغاله لهم كل ما بغت تجي تحصل اكلها جاهز تاكل وتروح ، ليش ندخل الشيطان بيننا.

بصراحه لو زوج هالبنت قالها نروح سوق او رحله كان حصلناها جاهزه من 8 الصبح ، بس الانسان صار يحط ظروفه شماعه .


ذكرت هالمشد لانه قاعد يتكرر كثير ، الحين أمك كبيره بالسن والمفروض اذا تروحي تزوريها يكون زيارة رحمه ، تقومي انت بالواجب ، تشوفي هي شو محتاجه تاخذي معاك شي بيدك حلى او حتى سلة فواكه اذا انت مو قادره تطبخين ...اذا هي ما عندها شغاله من الادب انت تروحي تطبخين مو توصلين حزة الاكل وكأنك داشة مطعم !



ويا شين هالشي لو صار لام الزوج ، يتصل ولدها يمه احنا جايين عندكم ويوصل هو وحرمه بعد ما تكون الام تعبت من تجهيز وتحضير . الام راح تخدم لانك بنتها بس ام الزوج تظل غير .





حبيت اطرح عدة اقتراحات :

اولا : اتركي الشغل اللي يتأجل زي الغسيل والكوي ، وكوني مستعده من الليل للزياره . حاولي توصلي من وقت يازين تجلسين مع امك على القهوه .


ثانيا : اذا عندك مشكله زي اولادك مزعجين ومدمرين او زوجك رايح مكان وبيتاخر ، بامكانك تتصلي وتقولي لهم انك راح تحضرين الطبق الفلاني .


ثالثا : من الذوق تدخلين البيت وانت بيدك شي هديه او حلى او او ..........لانها لها دور كبير في الزيارات .



رابعا : اذا وصلتي لا تطيحين بامك مسكينه ولدي سوا وبنتي عملت وجنونوني و و و و...المفروض انت اللي تسمعين لها يمكن محتاجه شي ..الحين دورك تراعيها يكفي راعتك لحد ما انهد حيلها .









واخيرا السموحه :) ..........ولا ننسى ان اختلاف الرأي لا يفسد للود قضيه ...ذكرت هالموضوع لان بصراحه تكرر كثير قدامي اذا رحت مش عزومه ولكن تجمع عائلي تحصلي البنات معتمدين على الام والحجه هم مشغولين او الابيخ نريد ناكل من طبخ الغاليه (وهالغاليه ليش ما تاكل من طبخكم )




تحياتي

7 تعليق 1,298 مشاهدة

شاركي في النقاش

سجلي الدخول لإضافة تعليق.

التعليقات

7
  1. والله كلامك عين العقل ..... غير اللي كل ماجت تروح صديقه او مناسبه ترمي بزرانها على اهلها ..... تبي تتونس على حسابهم صح اهلك بس والله بزران هالوقت شياطين ومايتحملهم الا امهم وابوهم....... لان الغالبيه ماتبي احد يقول لعيالها شي يخدمها وهو ساكت......

    الله يرزقنا برهم والاحسان الى والدينا

    جزاك الله خير
  2. @hdaaa_ondaaa

    جزاك الله خير الجزاء بالرغم ان التاريخ طالع لي قديم الا انه عجبني جدا لدرجة نشره على الفيس بوك

    واتمننننننننننى الحوائيات يشوفونه ويستفيدون
  3. جزآك الله خيرآ
    من جد خلآص الام ربت وتعبت وصلت للعمر
    اللي هي تبي من يسآعدهآ ويكون لهآ معينآ
    مو جآيه تدورين من لماوصلت سن كبيره بسنههآ يالقوه تتحرك
    تطبخ لك وتنظف لك و تتحمل مسؤوليه اطفآل ..
  4. @shgraldr_3

    جزاك الله خيرا
    واهم نقطة الشكوى للوالدة من مشاكل الزوج والابناء
    لان هذا بيضايقها وماراح تلقين احد يهتم بك اكثر من نفسك مثل الوالدين وبث الشكوى لهم يالمهم كثيرا فمن البر عدم مضايقتهم والشكوى لهم تضايقهم

تابعي تجارب أخرى من هذا القسم.