السلام عليكم و رحمة الله و بركاتة
هلا كروشه
لكل حامل الله يتمم عليكن و يهونها يا رب و اتربن طبيعي و اتقومن بالسلامه ان شاء الله
بخبرج من تجربتي
اول شيء اتبهي على هل اشياء
- انتي في اي شهر بتربين هل بيكون شتا و لا صيف علشان اتعرفين شو بتشترين اذا شتا تبين شيء دافي حق البيبي و اذا صيف اخذي اشياء خفيفه
- اعرفي وزن البيبي و على هذا الاساس اشتري المقاسات اسالي الدكتوره و افضل تبدين تشترين الملابس في الثامن اذا بيبيتج صغير اخذي تايني اما اذا كان 2.9 او 3 ابدا لا تفكرين في التايني كل بيبي يختلف عن الثاني و مثل ما قلتلج يعتمد على الوزن
- لا تكثرين من الثياب اشتري بس حق اول شهرين لان مثل ما تعرفين المحلات اينزلن كولكشن ايديد و انتي ما تبين اتلبسين البيبي شيء جديم و اكيد بتطلعين و بتشوفين اشياء حلوه
- ابدا لا تشترين المقاسات الكبار مثلا 3-6 او 6- 9 لان مثل ما قدلج بيصيرن جدام و بينزل اشاء يديده
اوكي تبدا بأغراض البيبي
اول شيء الاشياء الاساسيه
- السله الي بينام فيه طبعا لا تفكرين في شيء الغالي اخذي شيء حلو و سهل التنقل اذا رحتي ويك اند و لا شيء انج اترومين اتشلينه معاج و ما ياخذ مساحه انا خذته من بيبي شوب و كان وايد مريح استخدمته لين ما دخلت بنتي الخامس و بعدين خذت المنز الخشب خذته من ماماز اند باباز وايد حلو
- مالت التبديل و فيها البانيو مال السبوح خذته من ماماز اند باباز وايد حلو و اكوالتي تحطين فيها اغراض البيبي من شاور جل و شامبوا و كريمات و بامبرز وايد عمليه اهم شيء ظهرج و راحته و اي حد ايقولج مش لازم وجهت نظره انا جربت بدونها و الصراحه صدق ظهري تم ايعورني و اجتوفي بعد اهم شيء راحتي انا علشان ما اتعب
- حق الحمام بتحتاجين اسفنجه مالت السبوحح الي ايحطونها في البانيو يوايد عمليه و مريحه ما بتخافين على البيبي انه يغرق و انتي بعد بترتاحين الاسفنجه بتلاقينها في مذر كير و بعد اسفنجه حق السوح
- اغراض السبوح انا ماخذه كله من ماركت سيباميد شامبو و شاور جل و لوشن و كريم علشان البانبرز ما يسوي حساسيه و وايبز و قطن مال الاذن وايد مفيد تقدرين اتنظفين فيه خشم البيبي من دون ما تاذينه
- البامبرز الماركه الي تيريحج انا استخدم بامبرز طبعا بتاخذين رقم 1 و بعد هذا كله مكتوب عليه وزن البيبي
- مقياس الحراره انا ماخذه ماركت براون بتلاقينه في محل شرف ديجي وايد ممتاز
- شفاطت الخشم خذتها من صيدلية بوت احسن بوايد من الي تنباع في محلات الاطفال
- العده الي ايي فيها المشط و المغراضه مالت الاظافر اختاري الي ايعجبج موجودات في جميع محلات الاطفال
- فيه في محل مذر كير ملهايه عن طريقها تقدرين تعطين البيبي الدوا سالي عنها وايد عمليه اذا البيبي ما يطيع ياخذ الدوا و بعد اخذي ملهايه عاديه بتحتاجينها
- رضعتين زجاج اصغار 50 ml وحده حق الماي وحده حق الحليب انا خذت ماركت giggles ما اذكر من اي محل خذتها يمكن بيبي شوب و بعدين يوم كبرت استخدملها الحين رضاعات ايفينت
- القواطي المقسمات الي اتحطين فيهن كمية الحليب الصناعي تلاقينهن في كل محلات الاطفال
- الاجهزه الي بتحتاجينهن خذت دفايه حق الرضاعه و جهاز التعقيم كلهن ماركت ايفينت موجودات في بيبي شوب و مذركير و اذا كانتي تشتغلين بتحتاجين جهاز الشفط علشان تشفطين عاد ما عندي خبره فيهن لاني ما خذت
- بروش غسيل الرضاعات ماركت ايفيت وايد عمليه
- اكياس علشان التعقين فيهن البامبرز يوم البيبي بيسوي كاكونه ^_^ علشان ما تفوع في الزباله
- جهاز تسمعين البيبي فيه اذا صاح انا خذت ماركت ايفينت تقدرين تستخدمينه بالبطاريه او الكهربا حبيته وايد
- كارسيت للبيبي مالاتماماز اند باباز وايد حلوات و بعد التروليات
- شنطه حق اغراض البيبي اذا بتطلعون
اعتقد جي خلصت الاغراض الاساسيه
اني حق الملابس
- ملابس داخليه قياس نيوبون و 0-3 حبيت مالات ماماز اند باباز القطن وايد حلو اين في باكج 7 حبات نص كم
- افرولات انصح فيهن اكثر من البدلات لان اكثر وقت البيبي بيكون مقمط و نايم ملات نيكست وايد حلوت و الخامه وايد حلوه بعد حبيت مالات مذركير اما بيبي شوب ابد ما حبيتهن طبعا بعد هذا يعتمد على وزن البيبي شوفي السايز كله مكتوب لا تاخذين شيء قبل ما تشوفين انا غلطت و خذت تايني و نيوبورن و صغرن بسرعه على بنتي سالي الدكتوره عن وزن البيبي لا تنسين
- كابات 4 او 5 دليقات لا تكثرين لان الافرولات فيهن اريول
- سليب باق خذي 2 او 3
- قمطه فيه في بيبي شوب القطن المطاطي افضله اكثر علشان البيبي ما يطلع ايديه و بعد انا فصلت 4 قمطه اشتريت من المخزن العماني قطع قطن ملونه و اشترين دانتيل و خيطناه
- ابات الي تحتهن بلاستك مش قطعه انتبهي انا خذتهن و ما نفعني بشيء
- فوط لسبوح
هذا الي اذكره ان شاء الله ذكرت كل شيء
اني حق اغراضج طبعا هذيل الاغراض اترومي اتخلصينهن و انتي في السابع او حتى قبل
- طبعا فرشت المستشفى
- ملابس داخليه حقج سنتيانات مالات رضاعه بتلاقينهن في women secret وايد احسن من الي عند ماذر كير و مارك اند سبينسر
- قطن مالات الصدر علشان ما اتخيس السنتيان بالحليب انصحج ماركت ايفينت
- ثيابج الي حق المستشفى اخذي شيء ايريحج و فيه فتحه علشان اترضعين
- الغطا الي حق ارضاعه وايد مهم الناس ما اتقول خير اتحملي اطلعين صدرج جدام حد غريب حت لو كانو هلج العين حق و هذا الغطا وايد بيريحج تلاقينه في بيبي شوب و مذركير موجود سالي عنه
- في المستشفى بتحتاجين اغراضج المعتاده الي تاخذينهن معاج اذا رايحه ويك اند مثلا شاور جل و بادي لوشن و بادي بيري و ديودرنت و شامبو و بسم و فرشاة اسنان و معجون و مشط و سشوار و ميك اب و شباصات حق الكشخه
- لا نتسين العباه الي بتطلعين فيها من المستشفى
- كريم ميبو حق الخياطه
- ملح عشان تتنقعين فيه بس لمدة عشر دقايق
- فوطه السبوح
- سليبرز
هذا الي اذكره
بخصوص الاهتمام من ناحيت الكريمات حطيت زبدة الكاكاو بس تبين الصدق مافيه مفر من الخطوط طلعت بعد الولاده و هو يعتمد على نوعية الجسم و الجلد
بخصوص الاكل اكلي اكلج الطبيعي و اذا وزنج ايزيد فوق الطبيعي خفي ايدج اشوي يعني انا قبل الحمل كان وزني 77 و لين ربيت 93 اف و الله شيء ايتعب و لا بتقدرين اتسوين رجيم علشان ما يخف حليبج و حاليا يالسه اسوي رجيم عني يا حلوات انبهن على عماركن
عليكن بشدا الي ايشد البطن و بعد سون رياضه يعطونكم برشور في المستشفى متى تبدن و بعد رياضة كيجل وايد مهمه
هذا كل شيء و اي سوال انا حضره ان شاء الله اكون فدتكن لان كنت محتاجه حد ايقولي هل الاشياء و الخوات ما قصرن
شاركي في النقاش
سجلي الدخول لإضافة تعليق.