معقولة صرت كذا ( في بيت اهلي ويمكن ،، اتطلق )

السلام عليكم ورحمة الله وبركاته
من قبل اتزوج كنت ادخل هالقسم واقرى المشاكل
وكنت احس انها خيال ومو ممكن تصير معي
لين ما تزوجت وعرفت ان مافيه شي اسمه خيال
كل شي ممكن يصير !!!
آه يا رب رحمتك

من تزوجت ولي سنتين وثلاث شهور وعشرين يوم
انا موظفه (معلمة ) وتزوجت موظف راتبه خمسه وشوي
بيننا بالعمر حوالي سبع سنين طبعاً هو اكبر
زواجنا تقليدي اخته تعرفني وخطبتني وتمت الملكة
وكأي مخطوبين مكالمات وزيارات
واحلام طرنا معاها للسماء !
بس لحظت عليه انه زعول ومزاجه متقلب الى ابعد حد
وما يهتم بنفسه وغير منظم ابد ونومة ملخبط مره
بس نعذرت له بان اغلب الشباب وبكره الزواج يغيره
وحسبت نفسي حكيمة زماني واني بقدر اغير سلوكة وطبعة بثقافتي
لين تم الزواج
وسافرنا شهر عسل والله يا بنات كان يتصرف تصرفات غريبه
ينام طويل او يسهر طويل ، فجأه يعصب ويزعل
مشيت الامور وقلت يمكن ما تعودنا على بعض
رجعنا ومضت الحياة
شفت منه انواع التقصير بحقوقي
طلباتي آخر همه رغم انها محدوده لاني جداً قنوعه
مصرفي من جيبي ومقاضي الشقه انا احاسب
وهو يجيب بعض الاغراض
مشغووول باصدقاءه والسهر لين وجه الصبح
مدمن دخااااان مره
ما يصلي !!
ماا يصوم !!
وانا افرغ جيوب ثوبه للغسيل لقيت حبه
بحثت وتقصيت بالنت
وانصدمت وبكيت ومتت مليون مره
لاني عرفت انه مدمن كبتاجون
واجهته زعلت برر لي مليون تبرير
ومشت علي الامور
بعدها بفتره لقيت معه مو بس حبه
الا كيس مليااان !
ونفس الموال زعل وهواش ويطلع منها وانا اسكت واقتنع واسلم امري لله
بحجة اني ادور الستر !
ادور الستر لدرجه انه صار هالامر عادي
وكنت اعرف انه ماخذ حبه اذا شفته مواصل يومين من غير نوم !
والعكس اعرف ان مفعولها زال لما اشوفه ساحبها نومة اكثر من يوم كامل
مهمل مهمل بنفسه ونظافته وببيته
طلباتي بالحسره
لين حملت بعد ثمان شهور من الزواج
فرحت مره وقلت ان شاء الله يكون وجه خير
لكن زوجي ما زال على وضعه
يوم زين وعشره الله المستعان
تطورت هوشاتنا وصارت شبه يوميه
يحب يعاندني ويحرق دمي وما يتقبل مني اي شي
وزادت وزادت هالحالة الين ما وصلت للضرب
وآه على سذاجتي !!
سكتت ولا علمت ابوي رغم انه طيييييب ومتفهم ويخاااف ربي وديّن
بحجة اني ادور الستر ولا ابي مغثته
كنت اسكت ما ابي الشماته
ولا ابي اككون اقل من غيري
كنت اقول رجلي مافيه منه
بس خلاص ما عدت استحمل
زعلت مرتين عند اهلي
وطبعا ما علمتهم التفاصيل ولا علمتهم بالضرب وكنت اقول خلافات
زعلاتنا ما تطول اسبوعين وثلاثه ونرجع
يرجعني اميرة زماني ويعتذر لدرجة انه يحب رجولي
ودايم كذا بعد هوشاتنا يقول انه يحبني مره !
ولدت وجبت ولدي ربي يحفظه
وامورنا زي ماهي متذبذبه
لين قبل شهرين المشاكل زااادت مرررره مرررره
والضرب زاد وقوى وصار يوجع وصار يترك اثر بجسمي
وكله على اشياء تافهه بس العناد راكب راسه
لدرجه انه مره ضربني بيده على وجهي وعلمت فيني واسبوع غبت عن المدرسه
وكل مره نفس الموال يجي يعتذر ويحب رجولي
الين يوم الثلاثاء 24/ 11
تهاوشنا وخلاااص طفح الكيل وضربني ورفسني برجلينه على رجلي ووجهي وشد شعري
كدمات بكل مكان وجرح يدي جركين لانه ضربني بلعبة ولدي
انا هنا خلاااص قلت ما ابييييك وانا اصيح وجلست ادعي عليه
قال روحي لاهلك ( كلمة دايم يقولها ) قلت هذا اللي بيصير بس قبل اروح الفضحك
وابغى اهلك يعرفون حقيقتك قبل اهلي
وامسك الجوال وادق على ابوه واطلبه يجي للشقه
هو حس ان فيه شي ، دقايق وجا
دخل وشافني وشكيت وعلمته ان هذا حالي من اخذته
هاوشه ومن هالكلام !
ووعدني عمي انها اخر مرره وطلبني اجلس وجلست
نمت في شقتي الصبح قمت بداوم رغم اني مكسره بس غيااابي كثر بسببه
صحيته وقام زي المجنون
والله ما تداومين ومن هالكلام
ووصلت للضرب ، ما نفع معاه كلام عمي حلف ما اطلع
ومشى وتركني وهو متوجه للباب قلت له حسبي الله عليك وجعلك تشوفها بحظك والله لا يردك
هذا آخر عهدي به !!
طلع وما رجع للبيت هديت شوي وجا المغرب واتصلت على اخوي ياخذني لاهلي زياره
رحت لاهلي وجاني اتصال من عمي وسالني عنه وهل نفع معه كلام الليل
قلت له لا والله رجع زي وضعه والصبح تهاوشنا على روحة المدرسه
وضربني
قال انتي وينك قلت عند اهلي زياره قال معك مفتاح للشقه قلت ايه
قال روحي وخوذي كل اغراضك وخليه يدشر وما يلقى اللي تضبه
هنا انا حسيت اني صحيت
وامسك امي وابوي واعلمهم بكل السوالف والضرب
والله هاوشوني هواش وشلون تسكتين انتي ذليتينا بسكوتك
المهم على طول ابوي واخواني في سيارتين نروح نجيب كل قشي
صادفناه بالشقه شافنا سلم ومشى ابوي ساكت واخواني بعد لان خلاص وش ينفع الكلام
قالو ناخذ بنتنا ونمشي
والحين لي اسبوعين ببيت اهلي انا وولدي
موفرين لي كل شي ومريحيني مره
وهو لا دق ولا شي
بس قبل امس وامس دق على اخوي الصغير يبغى الولد يشوفه
قالو اهلي كيفه ياخذه
اخذه شافه ورجعه
ابوي يقول مالي كلام معه ابد ابد
وعمي ما كلم ابوي ساكت شكله متفشل من ابوي
ابوي يقول ما ترجعين وراسي يشم الهوى
وامي تقول ان صلح حاله وشفنا عليه التوبه ترجعين وبشروط

بس !!!
انا خاااطري ارجع بس ما ودي ارجع لنفس وضعي
ابي ربي يصلحه
ما ابي غيره زوج لي
خلااااص صار ابو لولدي
ابي ربي بصلحه لولدي قبل يكون لي
دايم افكر فيه
فيه ايام حلوة مرت علينا بس اغلب ايامنا نكد
مشاعري تجاهه ملخبطه بس اللي متاكده منه اني ابي الرجعه
ابي ربي يرده لي تاااايب

فيه احد مثلي انهدى زوجها وتاب
ابي اسمع قصص تبعث فيني روح التفاؤل
الطلاااااق ما ابيه ما ابيه

تعبت تعبت من التفكير

202 تعليق 39,802 مشاهدة

شاركي في النقاش

سجلي الدخول لإضافة تعليق.

التعليقات

193
  1. @dmoaa_alsyf

    يختي حرام عليك تضيعين شبابك مع مدمن اليوم وضربك بكره يذبحك والايذبح ولدك انت بنت شيوووخ. ماتذلين نفسك لمدمن مخدرات لاترجعين اللي جابه يجيب غيره بعدين ماشاء الله معلمه مانتي بحاجته واهلك واقفين معك اشتري راحه راسك واخلعيه لو فيه خير ماقال لك ابوه روحي لاهلك واستخيري وشوفي
  2. @am_tala_olana_1

    خليك هالفتره عند اهلك واهو خليه يتعالج لانه يحتاج علاج لو طب نفسي وادويه نفسيه عشان تعوضه عن هالسم اللي ياخذه انصحيه يروح لمر كز مطمئنه والله يشفيه ويرده لكم
  3. @dnyty2

    أنتي أنسانه قبل ماتفكري انك زوجه ادمان وضرب وتهاون بالصلاه ولسه تفكري ترجعي ؟ خافي الله فنفسك وبولدك بكره تجيه عقد بسب مشاكلكم
    ابوك انسان متفأهم وشأيلك ع راسه ليش تبي ألأهانه؟

    كل شي يهون الا الادمان

تابعي تجارب أخرى من هذا القسم.