اشكر صاحبة الموضوع على موضوعها الرائع واللي اثر فيني سريع
وان شاءالله بكتب لكم الخطه اللي راح امشي عليها وارجع لكم نهاية الشهر اقولكم هل وفرت شئ او لا ؟
نبدأ بسم الله
طبعا سويت ظروف فيها الاشياء اللي راح اصرفها
1. ظرف مقاضي الأكل ( 400)
2. ظرف منظفات وكماليات(400)
3. ظرف طلعات ومطاعم (600)لأن دايم نطلع وقطات ولو ماطلعنا الناس جو عندنا
4. ظرف للمويه ( 420 ) لأني ساكنه جديد وكل 3 ايام احتاج وايت اعبي مويه
5. ظرف البقاله ( 200 ) لموية البراده والخبز وهالاشياء
6. ظرف صيانه عامه ( 200 ) يعني سباكه او كهرباء ووو
طبعا هذا بعد ما اخلص من الالتزامات اللي علي مثل السواق والأقساط والفواتير
نجي عاد للمقاضي
المواد الغذائية من محلات الجمله
اول كنت استخدم حليب السعودية الكراتين الصغار اخذ كرتون لولدي عشان الرضاعه وسعر فوق الـ 30 ، لكني بدلته بالمراعي الكرتون بـ 17 + حليب الشوكولاته
المكرونه الكويتيه او شئ مقارب لها كرتون او نص كرتون
كرتون زيت دلال
كب كيك كرتون وارخص كيسة بطاطس عشان المدارس
اندومي كرتونين لأننا نستهلك وبقوه
تونه كرتون .................. لكن ما اعرف وش الكويسه والرخيصه يقولون العلالي لكنها غاليه واليمنيه كويسه لكن برضو غاليه
السكر
الرز
ذره حبوب ، فول علب ، لوبيا ( الثلاجة العالمية )
مقليات ( الثلاجة العالميه )
شوربه كرتون
الحليب السائل نستهلك مرره لكن ابو قوس ب 2.5 والكرتون ب 200 :11:ويقولون لونا وهالشغلات مره خفيفه ماتصلح ابد وللحين محتاره وش اشتري بدالها
البيبسي طبعا انا ما قدرت استغني عنه فـ جبت لي القوارير واعبي
الخضروات اسبوعيا ماعدا البطاطس والليمون لأننا نستهلكه والفواكه ماناكلها او بالنادر مثل المنجا والكرز واليوسفي
نجي عاد للـ مواد الثانيه
صابون الملابس 25 كيلو ب 65 ريال تقريبا
الكلوركس علبة كبيره بس مدري وين القاه
القصدير والسفر واكياس الزباله صغير وكبير وصحون بلاستيك وكاسات بلاستيك وحفاظات بيبي جوي ( اول كنت بامبرز والفرق كبير بالسعر ) والفوط النسائية فام والمناديل العاديه مشوار غاليه ب 28 بشوف الثلاجه العالميه يقولون عندها نفس الشئ بس ارخص والمناديل الرول بعد طبعا كل هذول بالكرتون
جالون ملين الملابس الازرق 20 لتر ب 60 ريال
العملاق الأخضر ما استخدمه لكن استخدم بداله داك
تقريباً هذي هي التفاصيل كلها
وبتقولون اكيد 800 ماتكفي لكن بقسمها على شهرين واللي ممكن يتأجل بأجله الشهر الجاي واللي ضروري الحين راح اجيبه
والله يوفقنا جميعا ويقدرنا نمسك ايدينا ونصير حريم سنعات
ايه صح نسيت اقولكم اني صرت اكتب بالجوال كل يوم بيومه وش صرفت عشان اعرف بنهاية الشهر وش اللي مسبب لي الخلل في ميزانيتي
هنا نتجمع لنوفر من رواتب ازواجنا أو من راتبك أو مصروفك
متابعة النقاش، صفحة 152