\ بقلم Ammar Salem
أيامْ و بْتِمْرُقْ .. بترجعْ شمسْ تِشرُقْ
و عيونْ رحْ تبرُقْ .. تفرَحْ قلوبْ صْغارْ
بشي طفلْ عم يلعبْ .. لحَدْ ما يتعبْ
منّو بنتْ تغضَبْ .. ترجعْ رِكدْ عالدارْ
مكتوبْ و مْقدّرْ .. فينا الجرحْ يكْبَرْ
يا قلبْ يا مْعَتّرْ .. شو اللي بِحالكْ صارْ
ناطِرْ بَقالي دْهورْ .. عَ بابنا المكسورْ
و الله القلبْ مَقهورْ .. حاملْ وجَعْ قنْطارْ
يا رَيْتْ الحكاية .. يبقى إِلا نْهاية
بكرا الفرحْ جاية .. يبقى الوجَعْ تذكارْ
شو هَمْ لو نِفْرَحْ .. بْقلبي إِلكْ مَطْرَحْ
بْيِكْفي بعضْ نِجْرحْ .. حضْنْ الوطنْ غَفّارْ
غَيْمة و خلصْ مَرْقِتْ .. من بَعد ما عَبْقِتْ
شوف الشمس شَرْقِتْ .. فَتّحْ وردْ هالدارْ
يا ربْ يا عالي .. حقّقْ لي آمالي
غالي الوطن غالي .. تِبْقى بلدنا عَمَارْ
م\عمار 2\12\2012



