إهتمامي أزعجه ، فهل أهمله ، وكيف ؟

احبي بل اعشقي نفسك اجعلي يومك لك البسي الألوان التي تحبينها انت اجعلي لك طقوسك الخاصه بك افرضي رأيك عند اللزوم لا تتنازلي عن حقوقك اجعلي زوجك جزء من حياتك وليس كل حياتك استعمليه وسيلة تضيف لحياتك صدقيني سيحترمك وعن تجربة والله تعالى شاهد على كلامي

حبي نفسك .. يحبك زوجك
احترمي نفسك ورغباتك يحترمها هو بعد

يا اختي المرأة اللي تخلي زوجها رقم واحد عندها فتأكدي انه ماراح يحس بأهميتها ..
لأنه في منطقه انها ما تستحق بدليل انها ماخلت نفسها رقم واحد .

كثرة التنازل اللي ماله داعي يحسسه انك ما تستحقين هالامور اللي تنازلتي عنها .
تفكير الرجال غير المرأة .. منطقه غير منطقها .
لذلك نجد غالبا الرجال اللي زوجاتهم يعطونهم بغير حدود ويتنازلون على حساب أنفسهن .. غالبا يهملون زوجاتهم ومايهتمون بهم ويبخلون عليهم سواء عاطفيا أو ماديا ويرون انهن مو كفو يضغطون على أنفسهم عشانهن .
وبعضهم في الأخير يتزوج على زوجته وحدة ثانية تتدلع عليه وتتدلل وتطلب .. وهو نفسه تتغير شخصيته معها يصير منساق لها ويدللها
ممكن نقول انها ساحرته لكن الحقيقة غير كذا .. الحقيقة ان الرجل بحاجة لمرأة تتدلل .. وهو يدللها
الدلال يا اختي للمرأة مو للرجل .

اهتمي ببيتك وبزوجكمن ناحية حقوقه وواجباتك فقط .. غير كذا من دلال وتنازلات ورمي النفس عليه لا ..
خليك ثقيلة وطالبي باللي تحتاجينه بكل إصرار .. مو بوقاحة ورفع صوت وإلحاح مزعج .. لكن بطريقة مؤدبة وإلحاح مدروس على حسب شخصية زوجك لأن بعضهم يستسلم للإلحاح بسرعة وبعضهم مع الإلحاح يعاند .
فأنت شوفي كيف تطلبين منه بشكل يخليه يفهم انك مصرة على طلبك .. لأن الرجل إذا حس لو واحد بالمية انك مترددة في طلب شيء ما ماراح يلبيه لك .. لكن لو حس انك مصرة وواثقة انك تبينه يحققه لك ..
ممكن اختي إذا خايفة انه يحقق لك طلب معين .. اطلبي في البداية طلب كبير أكبر من الأساسي عشان إذا رفظه تقولين أجل أبي كذا ( الطلب الأساسي ) أتنازل وأطلب أقل فحققه لي .. ( مو علطول هالتنازل .. يكون بعد تكرار أكثر من مرة ..
ولأنه يخاف ترجعين للطلب الكبير بينفذ الأصغر .
شوي شوي مع الأيام يتعود على تلبية طلباتك مهما كانت ( بالعقل طبعا )

اختي ضروري ضروري توسعين دائرتك الإجتماعية ... أقارب .. جيران ..
خلي لك أوقات تتفرغين فيها لنفسك فقط لا غير .. تهتمين بنفسك .. تسترخين فيها .. تروقين على قهوة أو شاي .. لحالك مو معه
وقت خاص بس بك .
أي هواية قديمة نسيتيها مع الأيام ارجعي نميها .. لو ما عندك حاولي تكتشفين وش الشيء تحبينه وتهوينه وإبدأي مارسيه ونميه كهواية ..
نصيحة لو ما عندك هواية معينة أو شيء تحبينه أهم شيء القراءة ..
القراءة وتنوعها توسع مداركك وتزيد من ثقتك بنفسك وثقافتك ..
زوجك إذا حس بإهتمامك بنفسك وبراحتك بدون ما تقصرين في حقوقه أو بيتك .. صدقيني يهتم بك ..
كل ما حسيتي أنت بأهمية نفسك هو يحس بأهميتك ... كل ما دلعتي نفسك دلعك .. كل ما حسيتي انك تستحقين شيء وطلبتيه من هالمنطلق بيجيبه لك لأه يحس انك تستحقينه .

خليك ثقيلة شوي ولا تندلقين عليه ... الدلع والإهتمام الزايد عن الواجب هذا انسيه .. لاتعطينه إلا إذا أعطاك ..
هو يصير يقدر عطائك لأنه ببساطة مو متعود عليه بالتالي يحس بقيمته إذا حصل عليه ..
مثل الطفل تعطينه لعبة كل يوم .. ماعاد تهمه الألعاب ولا يحس بقيمة أو يفرح بأي لعبة أو يتذكرها حتى
لكن لو ما تعطينه إلا في السنة حسنة .. وبمناسبة أو لسبب أو مكافئة لشيء معين قام به .. يصير يقدر ألعابه ويحس بقيمتها ويتذكر كل لعبه أعطيتيه .
حسسيه ان الأوقات اللي تقضينها معه أو بوجوده أو قربه مو هي بس أسعد اللحظات اللي تعيشينها ..
خليه يدخل يشوفك تسولفين بالتلفون ومبسوطة مع اختك أو امك أو جاره ..
أو تلعبين مع طفلك ومبسوطة معه أومنسجمة مع كتاب ومروقة على كأس شاي ..
مو لازم إذا حطيتي له الشاي أو القهوة تصنمين عنده تصبين له وتسولفين عليه وتسلينه ..
أنت سويتي له شاهي .. خلاص سيصب لنفسه وأنت روحي سوي شيء ثاني .. لو سألك قولي مشغولة شوي .. أو بريح وشي بعد شغل البيت ..
أو تشربين معه شاهي ولاهية بكتاب .. يعني مو تركزين عليه في الجلسة وبس .

الرجال سبحان الله يطنش زوجته ومايعطيها إهتمام في الجلسة إلا إذا شافها لاهية بشيء ثاني غيره !!
تلقينه يسولف ويناديك تجلسين معه ووجهه كله لمك .. بينما لو أنت متفرغة تماما له ومقابلته على القهوة تصبين له وتسولفين عليه هو لاهي بجريدة أو جهاز التلفون أو يقول اسكتي شوي خل اروق .. أو يخليك تتكلمين على نفسك وهو مو معطيك وجه ولا يتجاوب معك .
يعني الثقل زين ..

لاتقولين ماعاد ينفع عقب هالعمر أعوده على شيء ثاني .. لا ينفع يمكن أصعب من انك معودته من البداية لكن أبد مو مستحيل
وشيء ممكن .. بس طولي بالك شوي .. وغيري نفسك شوي شوي .. مو فجأة تصدمينه بالتغيير من جميع الجهات ..
ونصيحتي ان توسيع دائرتك الاجتماعية ماتكون البداية .. خوفا من انه يعتقد ان هالتغيير بتأثير من الناس فيمنعك عنهم .

سبحان الله

سبحان الله وبحمده سبحان الله العظيم