متزوجه .. مخطوبه ..تفضلي وافيدينا ~

بسم الله الرحمن الرحيم
السلام عليكم ورحمه الله وبركاته


حبيت ان كل وحده منكم وخااصه المتزوجات يفيدوونا بحكمه او موقف تعلمت منه ويقدر يفيدنا احنا

اللي ع وجه زواج في حياتنا ....


ثاني شي ابي اخذ رائيكم بموضوع انا قبل 5 سنوات مرضت بالخبيث والحمد الله ع كل حال
تشافيت منه تماما ولاعد اخذ ادويه ولاشي لكن تعرفون متابعه من سنه لسنه وطبعا طاح شعري كله
ورجع نبت نااعم وصحي لكن خفييف وحبته خفيفه من النعومه احيان اضطر استخدم
شعر مستعار اثبته مع شعري بس حتى يعطي كثافه وحجم مو باروكه لا خصلات
وسألت واجازو لي بسبب وضعي وانا مهتمه بشعررري حيل ومعتنيه فيه


هالمرض مااثر ع حياتي الحمد الله كملت تعليمي وخلصت جامعتي وبالعكس سرت متفائله اكثر
ومثقفه والان مقدمه ع الماجستير مع صغر عمري >>22 (ماشاء الله)


عندي موضوع محتاره فيه الحين كثرو خطابي وكل يومين والثاني خاطب لكن دايم ارفض ومايسير نصيب
فيه موضوع مؤرقني الحين فيه ناس متكلمين فيني وانا راح اتجنن من التفكير


بنات لو جت ام الولد عادي لو استعملت الخصلات ؟؟! كتجميل شعري عادي بدونها
لكن معاها افضل بكثييير وماودي اغشهم احس بتأنيب ضمير قوووي لكن احس النظره
الاولى هي اللي تجذب وقلت لو تم وصار نصيب وقت النظره ماراح استعلمها


ويشوفني ع طبيعتي لان مرات الاهل يبالغون وينتبهون مو مثل الرجال
والشي الثاني متى اقول لاهله وامه عن تعبي ؟؟! مراآاآاآت اقول وقت ماتزورنا امه ونتفق
ومرات اقول بعد النظره الشرعيه علشان يمكن يشوفني ويتعلق فيني ويكون الموضوع عادي
وبنفس الوقت متخوفه انه يرفض ويمكن ينكسر قلبي وقتها




بنات سامحوني ع الكلام الحمد الله انا مؤمنه بربي وراضيه بحياتي وجمييييله ومحترمه
وخلوووقه بشهاده الكل وشخصيتي متزنه وواثقه من نفسي
هالشخص حسيت انو اول مره اتعلق بسالفه زواج واحس فيه
توافق واخذت الموضوع بجديه لاول مره ولا ابي ابدا زواجي بكذب وخداع لكن متردده




انتظركم وافيدوني يالحكيمات

8 تعليق 978 مشاهدة

شاركي في النقاش

سجلي الدخول لإضافة تعليق.

التعليقات

8
  1. @am_maatz_6

    خذي في اعتبارك هذي الايه ..وجعلنا من أنفسكم أزواجا لتسكنو اليها .... ولم يقل لتسكنو معها تعالى ربي عن كل نقصان الحكمه هنا كوني ودوده وان تجعلي بيتك سكننا هانئا لزوجك
    وتجنبي كل مايغضبه حتى يتجنب هو كل مايغيضك
    ثانيا خذي بالاعتبار هذي الايه ..إن من أزواجكم وأولادكم عدوا لكم
    لاتجعلي زوجك سببا يلهيك عن طاعة الله وأجعلي رضا الله بالمقام الاول بل شجعيه على الطاعات بما اوتيتي من قوه

    اتمنى لك التوفيق والسعاده ومبروك مقدما
  2. @mdmozyl_khanom

    امممم
    لاتخلين زوجك محور حياتك
    خلي حياتك زي ماكنتي قبل الزواج
    اطلعي وروحي جمعات وعزايم
    بس بعد ماتخلصي امور زوجك وبيتك

    لاتقصري على زوجك وبنفس الوقت لاتسخري كل وقتك له
  3. ياقلبي بطقاق يطقهم معليك اكشخي وتمكيجي وقابلي امه وكلكك
    ثقه واناقه ولاتعلمون اهله بلبدايه وادخلي وشوفي خطيبك امكن انتي ماترتاحين له ويصير ماحد دري بموضوعك اذا الولد وافق وانتي ارتحتي خلاص يجي الولد وابوه ثاني مرة وعلموهم الموضوع وهم بكيفهم وحطي في بالك ان رفض مع السلامه وان وافق كويس وخيرة وع فكرة لو جينا ع الغش ياكثر الي يغشون انا واحدة منهم حسبي الله ونعم الوكيل معليك ولايهمونك انتي الف واحدد يتمناك الله يفرح اهلك فيك بس الله الله بشهادة انا ندمت حيل هي الزوج والاهل بعد ربك
  4. @roh_mdfonh

    طيب شعرك ما راح يتعدل ؟
    إذا بيطلع مثل أول أتوقع عادي تستخدمين الخصل !
    و ماشاء الله تبارك الله جميله و مثقفه هذا الاشياء تكفي !
    ربي يوفقك : )

تابعي تجارب أخرى من هذا القسم.