تجمعنا الـ17 لتباشير/مواليد/ ينايــ1ــر//فبرايــ2ـر2013 (حياكم الله)

بيبي ياحبي لك لاولدت ولا شي اليوم موعدي مع التحريض الم فضيع لانه عنق الرحم بعيد وقالت فتحته ل1 سم وبس ماقدرت اتحمل كانت تحاول تدخل اصبعين بس ماقدرت والطفل مو نازل في الحوض الله يعين احس تعب من جد رحت امشي وامشي وتغدينا بره وهالحين راجعه البيت وتقول على حسب الاستشاري اذا بيخاطر ويسون لك طلق صناعي على خفيف او مايخاطرون وعمليه الله يفرج علينا احيانا اقول بدل مايلعبون فيني اقولهم عمليه واخلص واحيانا يجيني خوف من ابره الظهر وماابي البنج الكامل الله يعين ان شاء الله ربي يفرج علينا ويرحمنا برحمته ويوفقنا للصالح

المى الله يفرجها عليك ويرزقك الولاده السهله الميسره انتي وروحي هايمه وجميع الكروشات يارب

غرام لاتخافين ولا شي لا توسع ولاهم يحزنون نفس الشي حصل مع بكري لا توسوسين

الله يسهل ولادة الجميع يا رب

بيبي دودو : انا ما ولدت قبل قيصري بس معي سكر حمل ووصلت للاسبوع 38 وحولتني الدكتورة ولادة

انا ابد ما حسبت بألم اليوم واحس برهبة وخوف من بكرة
صحيح موكلة امري الى الله ولو مؤ متوكلة على الله كان طنشت وعقدت عزمي على الروحة بكرة

احس الإشعاع في تناقص وودي أريح وأنام بس مدري بيجيني نوم او لا

قصدي لو مو متوكلة على الله ما عقدت عزمي على روحة بكرة
احس الساعات في تناقصوودي أريح وأنام بس مدري بيجيني نوم او لا

مبروك لكل اللي و لدوا و ربي يهون ع البقية
بيبي دودو و ألمى ربي يهون عليكم و ييسر لكم و يرزقكم الولادة السهلة الميسرة ،قلبي معكم و ان شاء الله تبشرونا قريب

انا المفروض تنويمي بكرة و العملية الاحد 29 بس أنوسي استعجل و ماانتظر
طبعا طلقي كان بارد و كنت رايحة بس لاني اشتكي من تحجر ياخذ خمس دقايق
تخيلوا ماكان فيه مغص و لاألم بالظهر متواصل بس تحجر اغلب الوقت و كان ذاك اليوم عند ولدي الكبير موعد و انا بالخرج و الموعد بالرياض بمدينة الملك فهد و انا اتابع اصلا بمدينة الملك فهد 
الاحد كان موعد و انا من يوم الاربعاء ماكنت ع بعضي كلن رحمني و يقولون مرة شكلك تعبانة كان ذابحني التحجر و بس منسدحة
الخميس اخوي و اهله سافروا لاستراليا و هو مبتعث ماامداه يشوف انوس و بعدها بثلاث ايام ولدت اخوي يقول وليدك مستحي منا مايبغانا نشوفه ،ماراح يشوفونه الا اذا كمل عشر شهوووور و الله قهر بس الحمدلله اهم شيء الصحة و العافية
المهم ليلة الاحد كانت معاي تحجر مااقدر اوقف منه و نزلت علي افرازات صفراء ،عطيت امي خبر لاني عندهم من اسبوع مااقدر اقوم بعيالي من التعب ،قالت اذااستمر التحجر روحي معانا بكرة لموعد ولدك لانها تروح مع زوجي لمواعي ولدي الاخيرة ماعاد اقدر اروح
المهم سويت حليب و حليته بعسل قلت اذا طلق بيزيد و اذا مو طلق خلاص
شربت الحليب و نمت انا و عيالي و طول الليل مافيني شي حتى قلت خلاص ماني رايحة 
قمت الفجر دق زوجي قال هاه بشري تعبانة تروحين معنا او لا قلت مايحتاج التحجر فكني و راح
المهم اقوم ولدي الصغير وديته الحمام و اعطيته حليب و خبزة و امي قعدت تجهز ولدي الكبير علشان الموعد و تلبسه و تتجهز و فجاة و انا واقفة مسك معاي تحجر شديد شهقت منه و كهرب بالوركبن احس اني باطيح تمسكت بالسرير الين فكني التحجر بعد خمس دقايق ،قالت امي ياالله جهزي نفسك تروحين معنا على الاقل يسوون اشاعة يتطمنون لان التحجر مو طبيعي
توكلت على الله و جهزت ولدي الصغير لان اختي بالجامعة و ماتقدر تغيب فاخذناه معنا و جهزت لهم ملابس و اغراضهم
طول الطريق و انا التحجر يروح و بجي بصراحة ماتوقعتها ولادة لان دايم طلقي بالظهر و مغص و هذا ماكنت حاسة بمغص بس الم بسيط بالظهر
نزلني زوجي بالطواريء و خلص اوراقي و راح هو و امي لموعد ولدي
من يوم حطوا جهاز التخطيط و مع كل تحجر المؤسر يرتفع ،الدكتورة تقول معاك تقلصات شديدة و انا اقول لها بس تحجر،قالت التحجر الطويل و المنتظم يعتبر طلق و بعد الكشف لقت الرحم مغتوح اثنين سانتي و اكثر و خلاص كتبوا لي تنويم و عملية طارئة و خلصوا اوراقي و طلعوني فوق غرف اللي قبل الولادة الجراحية
اخذت ثلاث ساعات و انا اطلق تعبت ،و عذرهم انه فيه حالات طارئة أشد مني بحاجة انهم يدخلون قبلي
و انا علي كلامهم وضعي مطمئن ونبضات الجنين مطمئنة
بعدها زاد الطلق و بدأ نبض الجنين يلعب يرتفع او ينزل على طول الممرضة دقت بالتلفون و مادريت الا و هم جايين يركضون و يقولون ياالله ولادة الحين و ركبوا القسطرة و جاني حق التخدير سألني اي نوع تخدير فلت له ابي نصفي 
حط لي بنج موضعي و بعدها دخل ابرة التخدير و بهذلني دخلها كم مرة و طلعها حوالي ست مرات حسيته ماعرف ،و بعدها حط المخدر ،بديت احس برجولي تتخدر
و ماحسيت الا بزي وخز السكين ع بطني طلعت الدكتوة تحسب اني خلاص تخدرت و تبي تشقني فريت و شهقت و قعدت اصرخ عليهم و اقول لحظة لاتشقوني ذذ عشت رعب بشكل غير طبيعي حسيت بالمشرط يوم حطته بس اشوا ماشقت ،جا حق التخدير و قال لي حركي رجولك و حركتها، انهبل ع بالهم خلاص تخدرت
اخرتها قالوا خلاص بنج كامل و قعدت ارتجف من الخوف و هو يقول توكلي ع ربي مافيه شيء و ماادري ايش و بعدها ماعاد حسيت بشيء الا و هم يصفقوني ذذ يقوموني و ذبحتني الكحة، و يقولون مبروك جبتي ولد
طبعا امي و زوجي معهم العيال اخذ زوجي شقة عند مدينة الملك فهد لانهم مايقدرون برجعون الخرج و ماتطمنوا علي
ولدت الساعة 2 و 45 دقيقة و ماطلعوني بالملاحظة الا 4 الا ربع جاني زوجي ماحسيت فيه يقول كانك سكرانة ذذ اكلمك و تفتحين عيونك بالغصب و ترجعين تصكينعا يقول خوفتيني اسأل الممرضة اقول لها وش فيها تقول عادي هذا من التخدير و بعدها بساعة طلعوني للتنويم و الساعة ست وقت الزيارة جت امي حبيبة قلبي و عيالي و الله يوم شفتهم احس ردت لي روحي و قعدت ابكي ،كنت مدخدخة و ماني قادرة اتكلم بس حسيت القلق بعيون امي ربي يحفظها و لايحرمني منها بكفي ضمتها لي حسيتني بالامان و كنت بحاجة لها ذاك الوقت
و الحمدلله رجعوا للخرج و امي قلبها معي تقول ودي ارافق معاك بس من يمسك العيال قلت لها مايحتاج
الممرضات ماقصروا و ربي سخرهم لي قاموا فيني،توقعتهم بيودوني مرة وحدة لدورة المياة و يساعدوني ،ربي سخر لي وحدة راحمتني تشوفني مااقدر اتحرك و اقوم ساعدتني اربع مرات توديني ادورة المياة و بعدها الحمدلله قمت بنفسي
والحمدلله طلعوني الاربعاء و يازين بيت الاهل ووجود الام و الاخوات حولك ربي يسعدهم و لايحرمني منهم
و الحين الحمدلله الالم خف بس احس العملية مشدودة و مااقدر انام الا ع ظهري
العملية كبس تجميلية مافيها خيوط و لاشيء و نفس مكان عمليتي الاولى
ربي ييسر للجنيع و يهون عليكم ويرزقكم ولادة طبيعية و الله ان الطبيعي نعمة و رحمة بس الحمدلله ع كل حال اهم شيء ربي يسعدنا بسلامة اطفالنا و الحمدلله فترة تعب و الم و تعدي باذن الله



اعذروووني ع الاخطاء داخلة من الايفون