تزوج نصفي الثاني وأنا عروسه وحااامل / استوفى الردود

الله يعينك

يمكن كلامي غير عن كلام الاخوات ورايي يختلف

سامحيني اذا بزعلك مني بس تحمليني وفكري بعقلك وبموضوعيه اكثر


اكثر البنات او كلهم حطو الحق على زوجك باللي صار انا اقولك كل الرجال يهاذون بالعرس ويمزحون ويحبون يقهرون حريمهم بهالطاري عشان يشوفون الغيره بعيونها !!! خلال الملكه او بعد العرس !!!

بس مو كل الرجال يعرسون !!
مايعرس الا اللي خلاص وصل حده !

انتي تقولين بنفسك كان يحلم بالاستقرار اختي اكبر غلطه تقع فيها الزوجه انها على كل مشكله تروح بيت اهلها ! من عرستو زادت مشاكلكم والمصيبه ان اول سنه للزواج اكثرها مشاكل والحرمه الفاهمه العاقله هي اللي تحاول تفهم زوجها وتصبر على مشاكله وتروضه نفس ماتبغي !
اول سنه هي سنه تعارف واختلاف في الراي ومن يمشي كلامه على من والشاطره هي اللي تخلي زوجها يسوي اللي تبيه بدون مايحس !

صدقيني انا ما اتفلسف ولا اجيب كلام من عندي هذا انا جربته وجربوه كل اللي حوالي وشفته بكل اللي اعرفهم حتى اللي خذو بعض عن حب او فترة ملكه طويله واجهو مشاكل في اول سنه بس من توصل المشاكل برا عتبة الباب تكبر اكثر ويصير لمها اصعب !!

انا ماعرف المشاكل اللي مريتو فيها يمكن يكون هو بالفعل انسان ما يتعاشر وراعي مشاكل بس والله يختي احلفلك بالله اعرف وحده لسان زوجها متبري منه صعبببببببب وملسون وعصبي ناااااااااااار اول سنه كانت كله تبكي منه وتقول بنفسها ليش عرست وحاولت تدخل اهلها كذا مره كبرت المشاكل اكثر بعدين صبرت وهدت الامور بينها وبين زوجها وحلت مشاكلها بدون تدخل احد والحمدلله الكل لاحظ كيف زوجها تغير وصار هادي اللحين عندهم 3 والطفل الرابع بالطريق !!

الزوج اول العرس يبي بس يثبت انه هو الرجال والامر والناهي ويشوف حواليه رجال يوصفونهم بانهم ضعفاء قدام حريمهم وخوافين فكل واحد يعرس يبي يثبت انه حمشششش !!! خليه ينفخ ريشه مثل ما يبي وانتي خذي اللي تبينه منه باللين وبكيد النساء وباللعب على نقاط ضعفه !! مو بالصراخ والاهل !! احلى كلمه يبي يسمعها الرجال اول عرسه هي حاضر وان شاء الله وعلى امرك سمعيه يختي !! الكلام ببلاش العبره مو بالكلام بالفعل !! هو من يسمع هالكلمتين هدا وارتاح وبعدين انتي خذي اللي تبينه بالعقل والكيد !

الزواج الثاني اصعب على الرجال من المرأه يعني لا تحسبين ان اللي يعدد يقوم بهالخطوه بكل سهوله لا ابدا هالشي اصعب عليه منك انتي ولو ما كان بالفعل محتاج ما عدد !! ولو ما كان بالفعل وصل لمرحله يبي يكسر فيها عنادك ويثبت انه رجال ماتخوفينه باهلك ماعدد !!!!

الا اللي ماعنده ضمير واخلاق بالمره هذا شي ثاني !!

تعتقدين شو اللي لقاه عند الثانيه ولا كان عندك !!؟؟ ليش هو مرتاح عندها وما كان مرتاح معاك ؟؟!

ساعات الحقيقه قدامنا بس يعمينا العناد !

اختي يعلم الله اني مابغي اظلمك بس ابي انصحك راجعي نفسك الف مره واكتشفي عيوبك واصلحيها ! اهلك وابوك والنعم فيهم بس ساعات الاهل من حبهم لابنائهم يتدخلون بطريقه خطأ !!
لا تحطين الغلط كله على زوجك فكري بعقليه وحياديه وشوفي وين غلطك كان وعالجيه

نصيحتي لك حاولي تصفين ذهنك اللحين من كل شي واستعيدي زوجك بكل قوتك !! قوتك الانثويه وحبك وكيدك بدون ماتظلمين نفسك ولا تظلمين غيرك استعيني بالله سبحانه واذا يستاهل هالزوج انك تردين له حاولي تردين وتصلحين الامور وترا زواجه مو نهايه العالم يمكن تكون بدايه جديده وسعيده لك وله

اذا كان ما يستاهل وحصلت امور ما تقدرين تصلحينها لا تنكدين على نفسك عيشي يومك واستعيني بالله ماتدرين يمكن بكره ربي يكتبلك سعاده مع غيره او يرجع نادم ويبي يردك ماتدرين شو بالغيب

اتمنى ما تزعلين من كلامي وسامحيني مره ثانيه اذا كان رايي غلط

بس انا عكس كلام خواتي هو حبج وانتي حبيتيه بس صارت خلافات نسفت هالحب وعناد بينكم ماقدرتو تسيطرون عليه

الله يسر أمرك ويفرج همك

الله يفرج همك