السلآم عليكم ورحمة الله ...
أنا اول مره اشارك مع اني دائما اتابع هذا المنتدى الرائع ...
اعذروني لو طولت عليكم ...
ماادري كيف ابدأ بعرض مشكلتي .. لا لا والله مو مشكله ألا مأساه ..
انا معلمه سبق لي الزواج وتطلقت وبعدها تزوجت واحد متزوج وعنده عيال ..
قبل اعرض مأساتي احب اقولكم وش اللي خلاني ارضى فيه واصبر عليه ..
سبب عذابي في حياتي امي وابوي واخواني ..
امي من يوم عرفت الدنيا وهي تحرش ابوي عليه انا وخواتي وتقسي قلبه علينا . وصار دائما ينتقدني ويسبني ويخوفني بأنه بيضربني . ابويه ملا حياتي بالخوف والرعب لدرجة اني اذا قدني اجلس معهم على السفره مااقدر ابلع اللقمه من الغصه والخوف من انتقاده .
تخيلوا امي اول ماتزوجت اختي الكبيره جلسنا انا واخواتي حزينات على فراقها تدرون وش قالت امي !! قالت والله لو هو بأيدي لأجيب لكم حمار تتزوجونه .!! هي تفكر اننا كنا حزينيين علشان اننا ماتزوجنا ... كم جرحتنا بهذا الكلام .. تصدقون اني من كثر ماتعبت من معاملتها السيئه ليه فكرت اني اسوي شي يخليها ترحمني وتحسن لي فرحت المطبخ اصلح العشا وقليت بطاطس وبعدما خلصت كبيت قدر الزيت على ساقي فأنسلخ الساق كله طبعا قلت لهم اني بغيت اشيله من على الفرن فانكب عليه . ورحت المستشفى وتنومت . وطلعت وانا فرحانه واقول في نفسي اكيد بيرحموني ويحسنون معاملتي بس والله العظيم اني يوم طلعت جلست في غرفتي ومااحد دخل عليه وثاني يوم امي ارسلت عليه علشان اروح انظف المطبخ مع ان ساقي باقي ملفوف عليها الشاش . وهذا شي بسيييط من اللي اعانيه .
المهم بعد تخرجي تزوجت وجلست اقل من سنه وتطلقت .
جلست بعدها خمس سنوات اعاني منهم كل اصناف الذل والقهر.
طبعا كنت اعاني من امراض زادت من عذابي .كان عندي تضخم في الغده الدرقه وكنت اطلبهم يودوني المستشفى بس كانوا يتأففون مني فصبرت وماعاد رحت . طبعا بسبب الغده جاني نزيف حاد ورحت المستشفى وصلحوا لي عملية تنظيف ووالله ان ابويه يسبني وتوني طالعه من المستشفى يقول اني اشغلته . المهم بعدها بشهر تعبت من الغده الدرقيه فرحت المستشفى وقرروا يستأصلونها بسرعه لأن فيها ورم . وبعد العمليه بفتره رحت اخذ نتيجة التحليل فطلع الورم سرطاني .. والحمدلله على قدره . تصدقون والله ثم والله اني يوم رجعت البيت ودخلت غرفتي وانا في حال مايعلم به الا الله من الحزن والله العظيم ان امي ما دخلت عليه ولا وآستني لو هو بكلمه لا هي ولا ابويه ولا اخزاني خواتي. مدري كيف مرت عليه ذيك الليله كانت طويييله جدا وكنت جالسه على سريري ومطفيه نور الغرفه واللي زاد المي انهم ما جوا يواسوني ويهونون مصابي . اخواني امشيها منهم بس امي !! كيف ابي احد يفهمني.. ووالله العظيم اني من ذاك اليوم الى هذا اليوم ماسألني ابويه عن وضعي او هل ابغى اراجع مستشفى ثاني .طبعا يوم شفت ردة فعلهم على مرضي دعيت الله من قلب مجروح ان يرزقني الزوج الصالح الحنون اللي اقضي معه اللي بقى من عمري .ما مضى الا ثلاث شهور وجا واحد يخطب مطول لحيته ومقصر ثوبه ومتزوج وعنده عيال .وافقت عليه وتزوجت وياليتني ماتزوجته . عشت معه سبع سنوات كلها عذاب والم . دائما يضربني مره كف على وجهي ومره بالعصا ومره يشد شعري ويضربني بأيده .ودائما يتف على وجهي . هذا غير السب واللعن . رحت لأهلي مره بس ماقلت لهم انه يضربني لأني ماابغى اتطلق وارجع لهم . فجلست عندهم سته شهور وهو تزوج الثالثه . طبعا وانا عند اهلي استمرت معاملتهم لي زي اول . بعد زواجه بفتره كلمني وقال يبي يرجعني فوافقت بس قال ماعنده امكانيه يدفع اجار بيتين وقالي ادفعي اجار بيتك فوافقت ودفعت الأجار واثثت البيت بس استمر على نفس معاملته ومشيت حياتي وصبرت . وع فكره كان اذا زعل مني مايسميني الا العقيم علشاني ماحملت .. وبعد فتره تعالجت وحملت بعد معاناه بس استمر يضربني وانا حامل وسبب لي نزيف في الشهر الثامن وتنومت . والحمدلله جتني بنت قمر هونت عليه كثير من المي وحزني ..
الحين انا ماعاد اقدر اعيش معه تعبت من الضرب والأهانه والتقصير . خمس شقق استأجرتها واثثتها واجلس فيها كم شهر واذا تعبت من سوء معاملته طلعت . الحين صار لي عند اهلي سنه بس والله تعبت من معاملتهم السيئه واللي زاد وغطى اخويه طلق زوجته وجا يجلس معنا في البيت والله بس اتحاشى الأحتكاك معه لأنه ممكن يمد يده عليه .
الحين انا مدري وش اسوي بحالي . ما ابغى ارجع للي اسمه زوجي ولا قدر اعيش مع اهلي ..
ارجوكم شوروا عليه وش اسوي كيف اتصرف . والله لولا بنتي ان ادعي ربي في كل لحظه ان ياخذ عمري واخلص . والله فكرت انتحر بس خايفه من عذاب ربي وراجيه عفوه وفرجه ورحمته ...
شاركي في النقاش
سجلي الدخول لإضافة تعليق.
التعليقات
56- ياااااااااااااااااااارب رحمتك كل يوم اقراء قصص مقاربه لقصتك
وش صار فقلوب الناس ماعاد ترحم حتى الام والاب ماعاد يحنون ويرحمون عيالهم
نفسي اعرف وش السبب !! وش القسوه هاذي
الله يفرج همك و يفتحلك باب رحمه من عنده من فوق سبع سموات هو وحده اللي قادر ينتشلك من اللي انتي فيه .. - بس تدرين الحمدلله انك مدرسه الله لايحيجك لعباده ولا منتهم
وظيفتك لاتفرطين فيها لو تقدرين تسكنين بشقه مستقله جنب اهلك حتى لو تجيبين خواتك يجلسون معك او تجيبي شغاله
تجلس معك الحمدلله ترتاحين منهم ومن شرهم خليك قويه ولا تخافييين منهم انتي تحملتي شي كثير وش بيسوون لك اكثر من كذا!!!
الله ينصرك على من ظلمك واذاك - الله يهون عليك ويجعله في موازين حسناتك
دامك موظفه وتقدرين تصرفين علي نفسك الشقه شقتك خليك في بيتك و اطلبي الطلاق علي ايه رجال
لا تروحين لأهلك الا زياره ساعه
واستخيري قبل اي شي - استخيري قبل كل شي
واذا تبين نصيحتي زوجك سايرية علشان لا يضربك
تنازلي وخاصه انك مو مرتاحه عند اهلك علشان مصلحتك
انا ضد الضرب وضد السكوت عليه
لكن بوضع مثل وضعك بالذات من الاسهل انك تتحاشينه وتاخذينه على قد عقله
لان لا اهل يسندونك وحتى لو اشتكيتي عليه ممكن يطلقك وترجعين لاهلك
والمثل يقول ان ماطاعك الزمن طيعه
واستغفري كثير لعل الله يفرجها عليك و يهديه لك - الحين امنا بالله ظروفك صعبة وتبين الفكة وتزوجتي متزوج وشفتي الويل معه وكل يوم ضرب واهانة وتروح تحملين بعد مو حرام عليك البنت هذي تعاني وفوق هذا انتي اللي تصرفين وتدفعين ايجار بالله وش تبين فيه هذا حرام عليك بنتك جبتيها وبكرة تعيش بعذاب
مواضيع مشابهة
تابعي تجارب أخرى من هذا القسم.