ساعدوني الله يفرج لكم :(

إحنا أسرة مكونه من 6أشخاص كلنا عايشين ببيت واحد وأمي وابوي الله يخليهم لنا ويطول باعمارهم pb189 .. مشكلتنا مع " أبوي" من أول ماتزوج أمي وهو شخصية شديده ولا يحب سوالف اللف والدوران .. كبرنا وكبرت معنا هالمشكله .. كل ماكبر كل ماتحجر مخه أكثر .. له اللحين سنه متقاعد مايبي يطلع ولا يبي يروح ولايجي ابداَ طول اليوم قدام جهازه الكمبيوتر في مكتبه .. ولا يبينا لا نطلع ولا نروح ولانجي ولا نزور أحد .. ولو وافق لنا وطلعنا نرجع نلقاه معصب وماله نفس يتكلم مع أحد ويدخل هالمكتب ويبدا يدخن..
طبعا الحمدلله ابوي وبشهاده الكل وشهادتنا رجل محافظ على صلاته والسنن والقران يخاف ربي . مدخن من كان عمره 14 سنه .. وللحين .. حاول كثير انه يترك الدخان بس ماقدر .. كل مره يحاول ويرجع اكثر من اول .. حاولنا معه بس اللحين بعد هالسن يئسنا منه ..
نرجع لمشكلتنا معه .. اذا عصب لسانه يتبرا منه .. كل كلمه سب قدامه ممكن يقولها ..
قبل فتره كنت طالبه اغراض ووصلت لشركه الشحن وقلت له يرسل السواق يجيبهم قال لي بكرا .. قلت سم وابشر .. لما جا بالليل قال لي وين رقم الشحنه قلت اللحين ارسله لك .. قام انفجر علي يصرخ .. كانه معبا بنزين وجته شراره . صرخ علي صراخ مو طبيعي واني انا لاهيه بالجوال ولا ادري وش يقول ووش مايقول وانا والله العظيم متاكده ان كل الي قال لي بكرا واني رديت بسم وابشر وامي شاهده على الموضوع ..
يومها انا ماقدرت اتحمل .. وقلت له لو سمحت تفاهم معي شوي شوي .. مو لازم على كل شي تصرخ .. ترا الصراخ مو حل ..
قال لاتعالي علميني شلون اتعامل معكم .. ووشلون اربيكم ..
جلسنا ساعه نتناقش ومحور كلامه انه هو المسؤول في البيت وانه لازم يصرخ ويهاوش ويعصب عشان يمشي سير البيت والكل يمشي على اوامره ولا أحد يسوي شي الا من بعد أذنه .
حاولت افهمه ان الرسول وصى وخصوصا بالنساء وقال "رفقاً بالقوارير" وماقالها عبث بس لانهم من رقتهم بسهوله كسرهم وجرحهم .
استدليت بنقاشي معه باحاديث كثيره وامثله كثيره .. لكن اخره هالنقاش لف لامي قال لها جهزي شنطتي انا بطلع من هالبيت .. عيالك مايبوني ..ربيهم انتي لحالك
قلت شدعوا انت ابونا ومالنا غنا عنك بهالبيت وحياتنا بدونك ماتسوى ولانقوى نعيش من دونك .. بس عادي كل منا يخطي واحنا نقول عشان نوجهك ولانتضايق منك لان النفس لها قدره بالتحمل ..
المهم بعد هالسالفة جلس فتره مايكلمني .. لين رضا .. لكن صراخه مستمر وهواشه مستمر
الاسبوع الي فات طلبت منه اطلع انا وامي واختي عشان اشتري لي فلات للجامعه ووافق ..
طلعت ومالقيت الي انا ابيه .. طلعت من المول كلمت السواق وتاخر علي ساعه كامله وتعرفون شوارع الرياض وزحمتها .. كل الي تاخرته مايجي ساعه ونص
وصلت البيت كان يستنا عند الباب .. وقف في وجهي وقام يصرخ علي صراخ مو طبيعي .. وقال كلام استحي اقوله .. انو انا **** الي اخليكم تطلعون وانا **** الي مفلتكم بالشوارع و و و كلام يطووووول مع ان روحتي السوق كلها عشان هالغرض ورجعت مادخلت اي محل ثاني وتاكد هو من السواق انه السواق الي تاخر مو انا
يومه كله يقضيه قدام الكمبيوتر في مكتبه جنب الصاله .. من يصحى الفجر .. لين ينام الساعه 11 او 12
مايبي يطلع من البيت ابداً ابداً .. بنص الاسبوع هذي الطلعه محرمممممه الا لاقصى الاشياء مستشفى او شي اربعاء وخميس نروح نتقضى للبيت ونتعشا احيانا قليله ونرجع
طبعا مو كل ويكند كذا مرات يمر شهر ماطلعنا معه ..
اللحين الجامعه نفس الشي .. اذا اضطريت اخليه يرجعني يسوي لي سالفه ويهاوش وانا تقاعدت عشان ارتاح وانتو تعبتوني
طبعا من تقاعد وحنا نقنعه يفتح بقاله سوبر ماركت اي شي المهم يصير عنده شي يطلع له يغير فيه جو .. وكل الي يرد علينا انا تقاعدت عشان ارتاح مو عشان افكر بأي شي ثاني
اخواني وانا كلنا صايرين نكره البيت ومن نجلس معه كلنا ساكتين لانه بيفسر كلامنا من راسه ويجلس يصرخ ويهاوش .. اتمنى اموت ولا اضطر اقول له اني بطلع او بروح او ابي شي
لاني حتى لو اطلع مع اخواني او خوالي يقوم الدنيا علي انا واختي
الوضع صاير لايطاق .. مره صرت اختنق منه .. وكل يوم عن الثاني يزيد ويزيد تحجره ..يعني دايما وبالعاده اذا طلعت الاربعاء ماطلع الخميس او العكس
اللحين لا مايبيني اطلع فيهم كلهم ولو فيه مناسبه ولا شي .. مايبي ابدا
ابي حل له .. امي كلمته وجلست معه وحاولت فيه بس يعيد نفس الكلام انا بمشي واترك لكم البيت ..
احنا حاولنا نزعل نرضا نسكت مانقول نبي نطلع بس مافيه .. مو حل اني بنحبس بالبيت بعد ..
اسفه ع اطالتي بالكلام .. بس ابي حل لموضوعي