أقول بطلوكم الدلع واشتغلوا
انا عادة ماأنزل مواضيع احب بس اقرآ وآرد هنا ولا هناك
بس اليوم خلاص احس اني تشبعت بهذا الموضوع من كثر مااسمع من حولي واقرآ هنا في المنتدي
كل من فتح فمه يتحسب علي الشغالات ومشاكل الشغالات …والجدال لامنتهي عن افضل جنسيه ؟ هل اجيب اثوبيه ولا واندونسيه ولا فلبينيه ولامن جزر الواق واق!!!!!
ومواضيع الشغالات ابدا ماتنتهي !
مافي احد فكر انه يعيش من غير شغاله. ؟ ليش تعتمدي علي انسانه غريبه وتدخليها بيتك وتستآمينيها علي اكلك وشربك وعيالك وفوق هذا تعامليها بكل شك وترقب وتتوقعي الاسوآ منها
ليش يا بنات بتعيشوا نفسكم في الفيلم المرعب هذا ؟؟
معقوله ماتقدروا تتعتمدوا علي نفسكم ؟ من غير شغاله تنظف وراكم وتشيل معاكم ؟؟
امي الله يسعدها كانت ضد فكرة اننا نجيب شغاله مع اننا كنا ماشاءالله عائله كبيره وضيوفنا اكثر ؟ كانت دائما تقولنا اذا جبتها ح تتعلموا الكسل
وفعلا كلامها صحيح
في بيتنا كل شخص كان له شغل يسويه من اصغر ولد لاكبر بنت
اتعلمنا من وحنا صغار انه اذا وصخت شئ لازم تنظفه مافي احد ينظف وراك
اتعلمنا الاعتماد علي النفس
اخواني الشباب لما راحوا الجامعه في مدينه تانيه وكانوا ساكنين مع شباب هم الوحيدين للي كانوا يعرفوا كيف يغسلوا ملابسهم ويستعملوا المكواه والمكنسه …..من غير مبالغه
هل تدروا انه مافي بلد في العالم تعتمد العائله فيه اعتماد كلي علي الشغاله زي بلدان الخليج ؟
الآمر صار جدا مزعج
مافي شئ يقهرني زي لما وحده توها متزوجه وعلي طول تجيب شغاله ؟ طيب ليه ؟ وجاه ولا كسوله لهذه الدرجة ؟
مستحيل احد يقنعني انه في حالات لازم ولابد من وجود شغاله مسنتره في البيت اربعه وعشرين ساعه؟
مهما كنت مشغوله ومسؤلياتك كثيره مع شويه تنظيم للوقت تقدري تعيشي من غير قلق شغاله؟
والله اعرف وحده ماشاءالله عليها عندها ستة اطفال وحده منهم من ذوي الاحتياجات الخاصه واطفالها اعمارهم مابين ١٥ الي ٣ سنوات وهي تشتغل وتدير بيتها زي الساعه . احيانا تحسي البيت مافيه اطفال من النظافه والترتيب
ليش يابنات نعتمد علي الشغالات ؟ ليش مانعلم اطفالنا قيمة العمل والانضباط والاعتماد علي النفس ؟
ليش نربي جيل كسول اذا عطشوا نادوا الشغاله تجيبلهم المويه؟
ليش نحنا نتتآفف ونتحسب علي الشغالات وبلاويهم ومع ذلك مش قادرين نستغني عنهم ؟
ماتعتقدوا اننا عندنا مشكله لما بنت عمرها عشرين ماتعرف شئ في المطبخ غير كاسه شاي؟
ولالما شاب كبير طول بعرض يخلي حرمه ضعيفه ماتجيي نصف خصره تغسل سيارته في الشمس ولا تشيل شنط كبيره وهو قاعد؟
اتمني ماطولت عليكم بس من جد الموضوع هذا ينرفزني