السلام عليكم ورحمة الله وبركاته
بالنسبة للريداكت عزيزتي أنا استعملته وكل مرة قصتي معه شكل....(ورح قلكن بالتفصيل الممل)
أول مرة أخدت عيار 10 وبصراحة ما اتبعت ريجيم وما عمل معي شي وشهيتي متل ما هية حديد!!! وبعدين أخدت عيار 15 ونفس الشي ما اتغيرت..فوقفته وقلت لحالي دفعت مصاري عالفاضي
وقبل تقريبا شهر وشوي رجعت قلت لحالي والله بدي إرجع جربه..فأخدت عيار 15 ومن أول يوم انسدت الشهية عالآخر مجرد إني أفطر الصبح وبعدين ما عاد أتذكر الأكل أبدا ..حتى بقوم بسخن الأكل وبضل متل ما هو ما بمد إيدي عليه هيك شي أسبوع أو 10 أيام بالكتير وبعدين رجعت متل قبل ولا كأني عمباخد شي وكملت العلبة واشتريت غيرها وما في فايدة فقلت لحالي لوقفه حرام..وقفته أسبوعين ومن يومين رجعت آخده والحمدلله رجع سدلي الشهية بس أنا عمبلعب رياضة يوميا بنادي صارلي شهر وأسبوع ..
وبالنسبة لسلبياته أول يوم عمل معي شي غريب ما بعرف شو صارلي ما فيني حيل لشي متل كأني مخدرة بس وعيانة لكل شي يعني بالزور قوم صلي وأرجع عالتخت اتسطح ..وشغلة تانية إنو بنشف الريق وعلى طول شفايفي مشققين من العطش حتى الكلام ما بقدر احكي كتير بحس بدي بلل فمي مشان أعرف احكي..وزادت عصبيتي وخصوصا إني عصبية بطبعي (الله يعافيني ويحسن أخلاقي قولو آمين)
وتوتة توتة خلصت الحتوتة...زهقتكن ما؟؟
وبالنسبة للأخت اللي بدها تسافر على سوريا وسألت عنه ..هو اسمه ريداكت وفيه منو عيار 10 وفيه عيار 15 والعلبتين نفس السعر ..العلبة فيها 20 حبة وسعرها 350 ليرة سوري..يعني حوالي 26 ريال سعودي..وتقريبا 6.5 دولار..وطريقة استعماله بس حبة الصبح مع الأكل أو قبل الأكل ما بتفرق وبس
بتمنى إني كون فدتكن وأي سؤال أنا حاضرة
دواء ريداكت لسد الشهية
متابعة النقاش، صفحة 3