السلام عليكم
اممممم طبعا انا عضوموجود عندكم بس هذي العضويه الجديده حتى افضفض لكم وبعيد عن الحشريين تخبرون منتدانا داخل كل بيت سعودي
المهم الموضوع فضفضه نفسيه لحياة عشتها مدتها 14 سنة هي مدة زواجي ......
كنت قبلها بنت خالي قلبي من اي مشاعر تجاه اي أنسان بنوته همي البس والدلع هو صح انا من بيئة بدويه تقدس الرجل والرجل له الكلمه الاولى وله الحريه رغم ان ابوي جدا فاهم ودمقراطي ومخلي لنا حرية الاختيار بكل شي من ابسط شي ( وجبة مطعم ) الا اشياء مصيريه ( الزواج ) لكن مارلنا في مجتمع يشوف ان الرجل له الحق وان المرأه للبيت وبس
المهم تزوجت ولد عمتي وكان عمري 19 سنه
بنت بهذا العمر ماتعرف شي بالحياة ماخذه الدنيه ببرائة اعرف واجباتي وبس وكانت متمثله ( طبخ ولاده وبيت وبس) والي زاد حالتي احباط بهذا العمر كمية الحياء الي فيني وهذا شي طبيعي بنت صغيره صارت زوجة شخص اكبر منها ب10 سنوات اكيد بستحي منه وخصوصا ان ماعندنا شوفه شرعيه ولا مكالمات ولا تواصل بالرغم انه كنا مملكين (يعني شرعا حلال )
طبعا زوجي رجل محترم وله مكانته بين الاهل وظيفته حلوه ودخله زين وحلييو وهذا مكسب يعتبر لذلك تمت الموافقه وتم الزواج
طبعا انا حليوه بعد ( دمناواحد) من بيت الحمدالله له مكانته ابوي رجل له وزنه بالجماعه واخواني ينشد فيهم الظهر فعشان كذا محد يقدر يطق باب بيتنا الا الي زينا وبمستوانا ( ليش مدري ) وكلنا جماعه وحده
تم الزواج على خير ولقيت رجل حنون طيب وكريم حبيته ( كيف مدري ) بس حبيته مره
كان شهر العسل بمدينه بعيده عن اهلنا وهذي المدينه هي مقر سكنا
فكان شهر العسل اسبوع واحد ( الحمدالله) كان حلو ومرتب بعدها عاد رجعنا للواقع الي هي مشكلة النساء الازليه وهي سهر الرجل مع خوياه برا طبعا كان السهر للفجر وكنت استحي اقوله شي ( وهذا اكبر غلط-لازم تعرف كل وحده ان يحق لها ترفض سهر زوجها برا لوقت متأخر )
هنا تخيلو الوضع بنت في ديره ماتعرف احد فيها وزوجها من البيت لدوام للبيت ينام للمغرب ثم جلسه لين العشاء ثم سهر مع خوياه للفجر
على كثر الهدايه الي عطانياها الا ماكنت احس بطعمها عندي قناعه الي يحب يرغب بالجلوس مع حبيبته ....
الشهرين الاولى من الزواج كانت ازفت مرحله صح كنت اخذ الي ابيه ماديا بس ناقصني وجوده وماكنت اعرف احد من زوجات خوياه عاد بعدين تعرفت عليهم ظنيت اني بستانس بمعرفتهم لكن كان العكس ( عاد ياحبي لهن طيوبات وللحين مع بعض صرنا صديقات روح بالروح ) لكن يضايقني ان يوم خميس وجمعه اجلس لوحدي زوجي برا كالعاده وصديقاتي الي مع زوجها والي مع اهلها
هنا تخنقني العبره وابكي احس بوحده وغربه
ابي اهلي
بعد هالشهرين مرت سنه وكنت حامل قلت له ابي اروح لأهلي ( عشان اغير جو الكأبه الي عايشه فيه وجات الصدمه قالي طيب عشان بسافر مع خوياي ( ياالله مع خوياك ) طيب وانا يعني مايكفي سهرك معهم بتسافر بعد ( اخبر العرسان يكونون طايرين ببعض ) بس زوجي العكس ليش مدري رغم انه كريم ماديا المهم بلعت العبره ومشيت ورجعنا بعدها وقلت يمكن بيعوض وابد رجعنا لنفس الوضع هو طالع وانا بسلبيتي عايشه ومشت السنين يروح سفرات لعمله ويجي يسرد وناسته مافكر فيني انا الطلعات والتمشي قليل جدا لو اقولكم من 14 سنه اقدر اعد لكم كم مره طلعنا من قلها ولمانروح لديرة اهلنا ياكثر الطلعات بس لازم مع اهله ولا اهلي ( طبعا ليش مدري) في هذي الفتره عرفت النت وبديت ابحث عن حل طبعا شدني الليالي الحمراء والخضراء وحتى السوداء ( لا تضحكون ) سويتها لكن هل في تغير هل حس بأن في شخص بالبيت لا لين قلت خلاص 10 سنوات وانا انتظر وهو عايش حياته ومبسوط كلمته ابي حقي بجلوسك تغير لكن تغير وقتي وبعدها يرجع وانا مازلت احاول اذكره مره بطلب ومره بتغير جو البيت ( هالجو هذا الي دبل تسبدي صراحه مدري ليه نغير لهم جو المفروض حنا الي يتغير جونا) المهم قبل سنه طارت جنوني وبعدين معك ترا مليت وطفشت من الوضع ذا وصار في مصارحه صدمته من صراحتها قلت الي خاطري فيه والله الحمد تغير لكن بعد رجع لطبعه بعدها مدري وش صار فيني صرت ماعاد احس فيه ابد يروح ويجي عادي بزاويتي جالسه وبس ماعاد فيه اي تفاعل معه بالبيت هو حس بهذا الشي والحين غير من نفسه ( بس ماعاد اصدقه ابببببببد) والامر صرت ماأحسسس فيه ابد يبي نطلع لوحدنا دقايق وامل ابي ارجع للبيت يطري سفر ماأتحمس معه ابد كل الي ابيه اروح اغير جو عند اهلي وجودي ببيتي صار اداء واجب فقط لا غير
كنت قبل اتمنى ابطل اطلبه للجلوس معي وانه يشوفني صراحه كنت احس بالذل ( اطلبه يجلس معي ؟؟؟؟) ولما صار الي اتمناه دخلت بمشكلة التبلد (( ياناس صرت احسه اخوي مو زوجي ))
هي فضفضه صح بس الي حل كيف ارجع اشتاق له كيف ارجع احس بوجودي انا بالبيت
وشكرا
شاركي في النقاش
سجلي الدخول لإضافة تعليق.
التعليقات
19مواضيع مشابهة
تابعي تجارب أخرى من هذا القسم.